¹ Human sa kamatayon ni Sara, naminyo si Abraham ug laing babaye, nga ginganlan ug Ketura. ² Sa wala madugay nanganak siya ug unom ka mga anak nga lalaki: nga sila si Zimran, si Joksan, si Medan, si Midian, si Isbak, ug si Shua. ³ Si Joksan ang amahan sa duha ka anak nga lalaki nga si Sheba ug Dedan. Ang mga kaliwatan ni Dedan mao ang pundok sa mga tawo nga taga-Asiria, ang taga-Letus, ug ang taga-Leum. ⁴ Ang mga anak nga lalaki ni Midian mao sila si Efa, Efer, Hanoc, Abida, ug Elda. Silang tanan mao ang kaliwatan ni Ketura. ⁵ Nagsulti si Abraham nga kung mamatay na siya, si Isaac gayod ang makapanunod sa tanan niyang gipanag-iyahan. ⁶ Apan samtang buhi pa si Abraham, gihatagan niya ug mga gasa ang mga anak nga lalaki sa iyang mga ka puyopuyo ug gipalakaw sila halayo gikan sa iyang anak nga lalaki aron mamuyo sa yuta sa sidlakan. ⁷ Nabuhi si Abraham hangtod 175 katuig. ⁸ Namatay siya nga tigulang na kaayo ug gitipon sa iyang mga katigulangan nga nangamatay na kaniadto pa. ⁹ Gilubong siya sa iyang mga anak nga lalaki nga sila si Isaac ug Ismael didto sa langob sa Macpela, duol sa Mamre, sa uma nga napalit ni Abraham gikan sa anak nga lalaki ni Efron nga si Zohar, nga kaliwat ni Heth. ¹⁰ Didto gilubong nila ni Isaac ug ni Ismael ang iyang lawas, kay didto man usab gilubong ni Abraham ang lawas sa iyang asawa nga si Sara. ¹¹ Human mamatay si Abraham, gipanalanginan pa sa Dios ang iyang anak nga si Isaac. Nagpadayon sa pagpuyo si Isaac duol sa Beerlahairoi. ¹² Mao kini kadtong mga kaliwatan gikan sa anak nga lalaki ni Abraham nga si Ismael, nga gipanganak sa ulipong babaye ni Sara nga si Hagar nga taga-Ehipto. ¹³ Mao kini ang ilang mga ngalan, subay sa ilang pagkahimugso: Ang kamagulangang anak nga lalaki ni Ismael ginganlan ug Nebaiot. Sunod kaniya nahimugso sila si Kedar, si Adbeel, si Mibsam, ¹⁴ si Misma, si Duma, si Massa, ¹⁵ si Hadar, si Tema, si Jetur, si Nafis, ug si Kedema. ¹⁶ Ang dose ka mga anak nga lalaki ni Ismael nangulo sa mga tribo nga nakabaton niadtong mga ngalana. Ang matag usa kanila adunay kaugalingong pinuy-anan ug dapit. ¹⁷ Nabuhi si Ismael hangtod 137 katuig. Unya namatay siya ug gitipon sa iyang mga katigulangan nga nangamatay na. ¹⁸ Ang iyang mga kaliwatan namuyo sa dapit taliwala sa Shur ug Havila, duol sa utlanan sa Ehipto ingon nga tawo nga milakaw ngadto sa Ashur. Apan wala nagmalinawon ang ilang pagpuyo. ¹⁹ Mao kini ang nahitabo mahitungod sa anak nga lalaki ni Abraham nga si Isaac. Si Abraham ang amahan ni Isaac. ²⁰ Sa dihang 40 na ang panuigon ni Isaac, naminyo siya kang Rebeca nga anak nga babaye ni Betuel. Si Betuel mao ang usa sa mga kaliwat ni Aram nga gikan sa Padanaram. Si Rebeca mao ang igsoon nga babaye ni Laban, nga Aramihanon. ²¹ Sa gidugayon sa ilang kaminyoon, wala pa gihapon makabaton ug mga anak si Rebeca. Busa nag-ampo si Isaac ngadto kang Yahweh mahitungod sa iyang asawa, ug gitubag ni Yahweh ang iyang pag-ampo. Namabdos ang iyang asawa nga si Rebeca . ²² Ug adunay duha ka bata sa iyang sabakan ug kanunay kining nagdinut-anay sa usag usa. Busa miingon siya, "Nganong nahitabo man kini kanako?" Busa nangutana siya kang Yahweh mahitungod niini. ²³ Miingon si Yahweh kaniya, "Duha ka nasod ang motungha gikan sa kaluha sa sulod sa imong tiyan. Ug kanang duha ka mga nasod mabahin sa usag usa, ug ang usa labing malig-on kaysa sa usa. Ug ang magulang magaalagad sa manghod." ²⁴ Sa pagpanganak ni Rebeca, tinuod gayod kini! Gipahimugso ang kaluhang anak nga lalaki! ²⁵ Ang unang migawas bulagaw ug balhiboon ang tibuok lawas niini, sama sa panapton nga hinimo sa balahibo. Busa ginganlan nila kini ug Esau. ²⁶ Unya ang iyang igsoong lalaki nahimugso nga naggunit sa tikod ni Esau. Busa ginganlan nila kini ug Jacob. Ug 60 na ang panuigon ni Isaac sa pagkahimugso sa kaluha. ²⁷ Sa dihang nanagko na ang kaluha, nahimong hanas nga mangangayam sa ihalas nga mga mananap si Esau. Naggahin siya ug daghang panahon sa kaumahan. Apan, hilomon nga tawo si Jacob nga kanunay lamang anaa sa balay. ²⁸ Mas nagustohan ni Isaac si Esau, tungod kay lamian man siya sa karne sa mga mananap nga ginapangayaman ni Esau. Apan mas nagustohan ni Rebeca si Jacob. ²⁹ Usa ka adlaw niana samtang nagluto si Jacob ug pipila ka mga liso, miabot si Esau gikan sa uma nga gigutom pag-ayo. ³⁰ Miingon siya kang Jacob, "Hatagi ako nianang pula nga linat-an aron makakaon ako karon dayon, tungod kay gigutom na gayod ako!" (Mao kana ang hinungdan nga ang lahi nga ngalan ni Esau mao si Edom). ³¹ Miingon si Jacob, "Hatagan ko ikaw kung ibaligya mo kanako ang imong katungod sa pagkamagulang aron makapanunod sa katigayonan sa atong amahan." ³² Mitubag si Esau, "Himalatyon na ako sa kagutom. Kung mamatay man ako karon, ang akong katungod ingon nga pagkamagulang dili makatabang kanako." ³³ Miingon si Jacob, "Panumpa una kanako nga gihatag mo na kanako ang imong katungod sa pagkamagulang!" Busa mao kana ang gibuhat ni Esau. Gibaligya niya kang Jacob ang iyang katungod sa pagkamagulang. ³⁴ Unya gihatagan ni Jacob si Esau sa pipila ka tinapay ug linat-ang mga liso. Mikaon si Esau ug miinom, ug unya mitindog siya ug milakaw. Sa pagbuhat niana, gipakita ni Esau nga dili bililhon alang kaniya ang iyang katungod sa pagkamagulang.