¹ Karon tigulang na kaayo si Abraham. Gipanalanginan ni Yahweh si Abraham sa daghang mga paagi. ² Usa ka adlaw gisultihan ni Abraham ang pangulo sa sulugoon sa iyang panimalay, ang tawo nga sinaligan sa tanang gipanag-iyahan ni Abraham, "Ibutang ang imong mga kamot taliwala sa akong mga paa aron sa matinud-anong pakigsaad nga buhaton nimo kung unsa ang akong isulti kanimo. ³ Hibalo-i nga naminaw si Yahweh, ang Dios nga naghimo sa kalangitan ug sa yuta, pagsaad nga dili nimo ipaasawa ang akong anak nga si Isaac, gikan sa mga anak nga babaye sa katawhan sa Canaan diin ako nagpuyo karon. ⁴ Hinuon, lakaw ngadto sa akong nasod ug sa akong mga kaparyentihan. Pangita-i ug mapangasawa ang akong anak nga si Isaac gikan kanila. ⁵ Nangutana ang sulugoon kaniya, "Kung makakita ako ug babaye diha sa imong mga kaparyentihan, unsa may akong kinahanglan buhaton kung dili siya gustong mouban kanako balik niining yutaa? Kinahanglan ko bang paadtoon ang imong anak sa nasod nga imong gigikanan, aron nga makakita siya ug asawa ug mopuyo didto?" ⁶ Mitubag si Abraham kaniya, "Dili! Siguradoha nga dili nimo dad-on ang akong anak didto! ⁷ Si Yahweh, ang Dios nga nagbuhat sa kalangitan, nagdala kanako dinhi. Gidala niya ako gikan sa panimalay sa akong amahan ug gikan sa yuta diin nagpuyo ang akong mga kaparyentihan. Nakigsulti siya kanako ug matinud-anong nanaad kanako. Miingon siya, 'Igahatag ko kining yuta sa Canaan ngadto sa imong mga kaliwatan.' Magpadala siya ug anghel nga mag-una kanimo didto ug makahimo kanimo nga makakita ug asawa alang sa akong anak ug dad-a siya aron mopuyo dinhi. ⁸ Apan kung ang babaye nga makaplagan nimo dili mokuyog kanimo, gawasnon ka na sa pagbaliwala sa imong gisaad. Ang usa lamang ka butang nga dili gayod nimo angay buhaton mao ang pagpapuyo sa akong anak didto." ⁹ Busa gibutang sa sulugoon ang iyang mga kamot taliwala sa paa ni Abraham ug naghimo ug matinud-anong saad mahitungod niadtong mga butang. ¹⁰ Unya gikuha sa sulugoon ang napulo ka mga kamelyo sa iyang agalon ug gibutangan kini sa tanang matang sa mga butang nga gihatag sa iyang agalon kaniya aron dad-on. Unya mibiya siya aron moadto sa Aram Naharaim, nga atua sa amihan sa Mesopotamia. Ug miabot siya sa siyudad sa Nahor. ¹¹ Sa pag-abot sa sulugoon sa Nahor, kilom-kilom na kadto, ang takna nga tingsag-ob ug tubig sa mga babaye didto sa atabay. Gipaluhod niya ang mga kamelyo duol sa atabay, nga anaa sa gawas sa siyudad. ¹² Nag-ampo ang sulugoon, "Yahweh, ang Dios nga gisimba sa akong agalon nga si Abraham, himoa akong magmalampuson karong adlawa! Nagmatinud-anon ka kanunay sa akong agalon, nga si Abraham! ¹³ Paminawa ako. Nagtindog ako duol sa atabay nga may tubig, ug ang mga anak nga babaye sa katawhan sa siyudad nagpadulong na aron sa pagsag-ob ug tubig. ¹⁴ Pangayuon ko kini kanimo: Sultihan ko ang usa sa mga babaye, 'Palihog ipaubos ang imong banga aron makainom ako.' Kung moingon siya nga, 'Pag-inom, ug kuhaan ko usab ug tubig ang imong mga kamelyo,' makahibalo ako nga siya mao na ang babaye nga gipili nimo aron maasawa sa imong sulugoon nga si Isaac, ug makahibalo ako nga nagmatinud-anon ka sa akong agalon." ¹⁵ Sa wala pa matapos ang iyang pag-ampo, miabot didto ang dalaga nga si Rebeca, nga nagpas-an ug banga. Siya mao ang anak nga babaye ni Betuel, ang anak ni Milca, nga asawa sa manghod ni Abraham nga si Nahor. ¹⁶ Maanyag kaayo siya ug usa ka ulay. Wala pa gayoy lalaki nga nakadulog kaniya. Milugsong siya ngadto sa atabay, gipuno niya ug tubig ang iyang banga, ug unya mitungas siya pagbalik. ¹⁷ Midagan dayon ang sulugoon ni Abraham aron sa pagtagbo kaniya, ug miingon, "Palihog hatagi ako ug gamayng tubig gikan sa imong banga." ¹⁸ Mitubag siya, "Inom sir!". Gipaubos niya ang iyang banga gikan sa iyang abaga ngadto sa iyang mga kamot ug gipainom siya. ¹⁹ Human niya siya mahatagan ug mainom, miingon siya, "Mokuha usab ako ug tubig alang sa imong mga kamelyo, hangtod nga may igo na silang mainom." ²⁰ Gidali dayon niya pagbubo ang tubig sa iyang banga ngadto sa pasungan nga paimnanan sa mga mananap. Unya midagan siya pagbalik ngadto sa atabay, ug nagkuha pa ug tubig alang sa tanang mga kamelyo. ²¹ Nagtan-aw lamang ang sulugoon kaniya, nga walay gisulti bisan unsa. Gusto niya mahibaloan kung si Yahweh ba ang hinungdan nga magmalampuson ang iyang lakaw o dili. ²² Sa kataposan, human makainom ang mga kamelyo, gipagawas sa sulugoon ang ariyos nga alang sa ilong nga may gibug-aton nga unom ka gramo, ug duha ka polseras alang sa iyang mga bukton, ang matag-usa may gibug-aton nga 110 ka gramo, ug gihatag kining tanan ngadto kang Rebeca, ug gisultihan niya siya nga isul-ob kining tanan. ²³ Unya miingon siya, "Sultihi ako kung kinsa ang imong amahan. Sultihi usab ako, kung aduna bay lawak didto sa pinuy-anan sa imong amahan alang kanako ug sa akong mga tawo aron katulogan karong gabhiona?" ²⁴ Mitubag siya, "Ang ngalan sa akong amahan mao si Betuel. Siya mao ang anak ni Nahor ug ang iyang asawa mao si Milca. ²⁵ Oo, aduna kami lawak diin makatulog kamong tanan karong gabhiona, ug aduna usab kami daghang dagami ug mga kumpay aron ipakaon sa mga kamelyo." ²⁶ Miyukbo ang sulugoon ug misimba kang Yahweh. ²⁷ Miingon siya, "Gipasalamatan ko si Yahweh, ang Dios nga gisimba sa akong agalon nga si Abraham. Nagpadayon siya sa pagpakita sa iyang pagkamatinud-anon ug kasaligan ngadto sa akong agalon. Yahweh giyahi ako sa akong paglakaw padulong sa panimalay sa kaparyentihan sa akong agalon!" ²⁸ Midagan ang babaye ug gisultihan ang tanan nga anaa sa panimalay sa iyang inahan mahitungod sa nahitabo. ²⁹ Si Rebeca adunay igsoong lalaki nga ginganlan ug Laban. Midali pag-adto si Laban sa sulugoon, nga atua sa gawas didto sa atabay. ³⁰ Natingala siya sa pagkakita sa ariyos sa ilong ug sa mga polseras nga anaa sa mga bukton sa iyang igsoon ug sa pagkadungog sa pagsulti ni Rebeca sa gisulti sa tawo ngadto kaniya. Busa migawas siya ug nakita niya ang lalaki nga nagtindog tapad sa mga kamelyo, duol sa atabay. ³¹ Miingon siya ngadto sa lalaki, "Dayon, ikaw nga gipanalanginan ni Yahweh! Nganong nagtindog ra man ka dinhi sa gawas? Giandam ko na ang lawak alang kanimo didto sa balay, ug ang dapit aron kapahulayan alang sa imong mga kamelyo." ³² Busa ang sulugoon midayon sa pinuy-anan, ug gihaw-as sa mga sulugoon ni Laban ang dala sa mga kamelyo. Gihatagan nila ug mga dagami ug kumpay ang mga kamelyo, ug tubig nga kahimasaan sa tiil alang kaniya ug sa iyang mga kauban. ³³ Giandam nila ang pagkaon sa iyang atubangan aron siya makakaon, apan miingon siya, "Dili ako mokaon hangtod nga ikasulti ko ang akong angay nga isulti." Busa miingon si Laban, "Sultihi kami!" ³⁴ Busa ang sulugoon miingon, "Sulugoon ako ni Abraham. ³⁵ Gipanalanginan gayod pag-ayo ni Yahweh ang akong agalon busa nadato gayod siya. Gihatagan siya ni Yahweh ug daghang mga karnero ug mga baka, daghang mga bulawan ug mga plata, mga sulugoong lalaki ug babaye, mga kamelyo ug mga asno. ³⁶ Ang asawa sa akong agalon nga si Sarah, nanganak ug usa ka lalaki alang kaniya sa pagkatigulang na niya, ug gihatag sa akong agalon sa iyang anak ang tanang butang nga iyang gipanag-iyahan. ³⁷ Matinud-anon akong nakigsaad sa akong agalon, nga nag-ingon, 'Ayaw pagpili ug asawa sa akong anak gikan sa mga anak nga babaye sa katawhan sa Canaan, sa yuta diin kami nagpuyo. ³⁸ Hinuon, balik ngadto sa pamilya sa akong amahan, sa akong kaugalingong kaliwatan, ug pagpili gikan kanila ug usa nga asawa alang sa akong anak.' ³⁹ Unya akong gipangutana ang akong agalon, 'Unsa man ang angay nakong buhaton kung ang babaye nga ihatag nila kanako dili mouban sa akong pagbalik?' ⁴⁰ Mitubag siya, 'Si Yahweh, nga kanunay nakong gituman, magpadala sa iyang anghel uban kanimo, ug siya ang hinungdan nga magmalampuson ang imong pagpanaw. Mahimo niya nga ikaw makapangita ug asawa alang sa akong anak gikan sa akong kaliwatan, ug gikan sa pamilya sa akong amahan. ⁴¹ Apan kung ang akong kaliwatan magdumili sa pagtugot kaniya sa pag-uban kanimo pagbalik, gawasnon ka na sa pagkatinunglo tungod kay wala ka nakatuman kanako. ⁴² Sa akong pag-abot karong adlawa sa atabay, nag-ampo ako, 'Yahweh, ang Dios nga gisimba sa akong agalon nga si Abraham, kung himoon mo akong magmalampuson niining lakawa, palihog buhata kini alang kanako: ⁴³ Nagatindog ako daplin sa atabay, diin mag-abotan ang mga babaye aron sa pagkabo ug tubig. Manghangyo ako kanimo nga kung mosulti ako sa usa ka babaye, "Palihog, hatagi ako ug mainom nga tubig gikan sa imong banga," ⁴⁴ ug kung motubag siya kanako, "Sige, pag-inom, ug kuhaan ko usab ug tubig ang imong mga kamelyo," hinaot unta nga kanang bayhana mao na ang imong gitagana alang sa anak sa akong agalon!' ⁴⁵ Sa wala pa ako mahuman sa pag-ampo, nagpadulong si Rebeca nga nagpas-an ug banga. Milugsong siya ngadto sa atabay ug mikabo ug tubig. Miingon ako kaniya, 'Palihog hatagi ako ug mainom!' ⁴⁶ Gipaubos dayon niya ang iyang banga ug miingon, 'Pag-inom! Ug mokabo usab ako ug tubig alang sa imong mga kamelyo.' Busa miinom ako ug tubig, ug nagkabo usab siya ug tubig alang sa mga kamelyo. ⁴⁷ Unya nangutana ako kaniya, 'Kang kinsa ka man nga anak?' Mitubag siya, 'Ang anak nga babaye ni Betuel, nga anak ni Nahor ug si Milca ang iyang asawa.' Gipabutangan ko ug ariyos ang iyang ilong ug gipasul-oban ug mga polseras ang iyang mga bukton. ⁴⁸ Unya miyukbo ako ug misimba kang Yahweh, ug nagpasalamat ako kang Yahweh nga Dios, siya nga gisimba sa akong agalon nga si Abraham, siya nga naggiya kanako sa husto nga dalan aron makaplagan ang apo nga babaye sa igsoon sa akong agalon aron mahimong asawa sa anak sa akong agalon. ⁴⁹ Karon, kung ikaw nagmatinud-anon ngadto sa akong agalon ingon nga kabahin sa iyang kaliwatan, sultihi ako nga buhaton nimo kung unsa ang akong gihangyo. Kung dili mo kana mabuhat, sultihi usab ako niana, aron nga makahibalo ako kung unsay buhaton. ⁵⁰ Mitubag si Laban ug si Betuel, "Naggikan gayod kini kang Yahweh. Busa kaming duha dili makaingon nga mao kini ang husto o ang sayop nga pagabuhaton. ⁵¹ Ania si Rebeca sa imong atubangan. Dad-a siya ug lakaw na, ug ipaasawa siya sa anak nga lalaki sa imong agalon, sama sa gisulti ni Yahweh." ⁵² Sa pagkadungog sa sulugoon ni Abraham niining mga pulonga, mihapa siya sa yuta alang kang Yahweh. ⁵³ Unya gipagawas sa sulugoon ang plata, ang alahas nga bulawan, ug ang mga bisti, ug gihatag kini ngadto kang Rebeca. Ug gihatag usab niya ang mga gasa ngadto sa iyang igsoong lalaki nga si Laban ug sa iyang inahan. ⁵⁴ Unya nangaon sila ug nanginom. Ang mga lalaki nga kauban sa sulugoon ni Abraham nangatulog usab didto niadtong gabhiona. Pagkabuntag niana, ang sulugoon miingon, "Tugoti ako karon nga mobalik na ngadto sa akong agalon." ⁵⁵ Apan mitubag ang iyang igsoon ug ang iyang inahan, "Pasagdi una nga magpabilin ang babaye dinhi kanamo sa napulo lamang ka adlaw. Human niana, dad-a na siya ug panlakaw na kamo." ⁵⁶ Apan mitubag siya kanila, "Gibuhat ni Yahweh nga malampuson ang akong panaw, busa ayaw na ako pugngi. Tugoti na ako karon sa pagdala kaniya balik ngadto sa akong agalon!" ⁵⁷ Miingon sila, "Tawagon nato ang babaye ug pangutan-on siya kung unsa ang iyang gustong buhaton." ⁵⁸ Busa gipatawag nila si Rebeca ug gipangutana siya, "Mokuyog ka na ba niining tawhana karon?" Mitubag siya, "Oo, mokuyog ako." ⁵⁹ Busa gipalakaw nila si Rebeca kauban ang sulugoong babaye nga nag-atiman kaniya sa tibuok niyang kinabuhi aron mokuyog sa sulugoon ni Abraham ug sa mga lalaki nga miuban kaniya. ⁶⁰ Unya gihangyo nila ang Dios sa pagpanalangin kang Rebeca ug miingon ngadto kaniya, "Among igsoong babaye, nanghangyo kami kang Yahweh nga makabaton ka unta ug minilyong mga kaliwatan, ug tugotan sila nga mobuntog sa hingpit sa tanang nagdumot kanila." ⁶¹ Unya nangandam na si Rebeca ug ang iyang mga babayeng sulugoon. Misakay sila sa ilang mga kamelyo ug mikuyog sa sulugoon ni Abraham. Gidala niya si Rebeca ug mibiya. ⁶² Karon si Isaac atua nagpuyo sa kamingawan sa habagatan sa Judea. Miabot siya gikan sa Beerlahairoi. ⁶³ Usa ka gabii niana migawas siya sa uma aron mamalandong sa iyang paglakaw. Mihangad siya ug natingala sa pagkakita niya sa nagpadulong nga pipila ka mga kamelyo. ⁶⁴ Mitan-aw usab si Rebeca ug nakita niya si Isaac. Mikanaog siya sa kamelyo ⁶⁵ ug gipangutana ang sulugoon, "Kinsa man kanang nagpadulong nga lalaki?" Mitubag ang sulugoon, "Mao kana si Isaac, ang akong agalon." Busa gikuha niya ang iyang pandong ug gitabonan ang iyang nawong, aron sa pagpakita sa kaligdong sa atubangan niya. ⁶⁶ Gisuginlan sa sulugoon si Isaac sa tanang mga nahitabo. ⁶⁷ Unya gipasulod ni Isaac si Rebeca sa tolda nga gipanag-iyahan sa iyang inahan, nga si Sara, ug gipangasawa niya siya. Gihigugma niya siya. Sa niini nga paagi nahupay ang kasubo nga gibati ni Isaac mahitungod sa pagkamatay sa iyang inahan.