¹ ಉ ಯರಿಕೋ ಶೆರೆರ್ ಮಾಯಿವೆನ್ ಲಂಗನ್ ಜಾರೋತೋ . ² ಇದೇಕ್ ವಾಟೆರ್ ಪೀಸಾ ವಸೂಲ್ ಕರೆವಾಳೋ ರ ಸರ್ದಾರ್ ಏಕ್ಲೋ ವೆತ್ತೋ ಉ ಜಕ್ಕಾಯಾ ಕನ್ ಕಜಕೋ ಧನೆವಾಳೋ ;ಉ ಯೇಸು ಕೂಣ್ ಕೋಕನ್ ದೇಕೆನ ಆಸಾಕಿದೋ . ³ ಪಣ್ ಉ ಪೊಟ್ಕಾಸೊರ .ಯೇಸುರ್ ಘರೆನ್ ಜನ್ ಗೋಳಾವೇನ್ ರ ಜೆರ್ವಾಸ್ ಉ ಓನ್ ದೇಕೆನ ಬಣಿಕೋನಿ ⁴ ಜನಾ ಯೇಸು ಉ ವಾಟೆನೆ ಆರೋ ಜೆರ್ವಾಸ್ ಆಂಗ್ ಧಾoಸನ್ ಓನ್ ದೇಕೇನ್ ಘುರ್ಲೆರ್ ಝಾಡ್ ಛಡ್ಗೋ. ⁵ ಯೇಸು ಓ ಜಾಗೆಕನ್ನ ಆಯೋಜನ್ನ ಆಂಕಿಪಡನ್ ದೇಕನ್-ಜಕ್ಕಯ್ಯಾ ಜಲ್ದಿ ಉತರನ್ ಆ ;ಮ ತಾರ್ ಘರೆಮಾ ರೇಣುಕೇನ್ ಓನ್ ಕೊಜನಾ, ⁶ ಉ ಜಲ್ದಿ ಉತ್ರನ್ ಖುಷಿತಿ ಓನ್ ಡಾoಯಿ ಕರ್ಲಿದೋ . ⁷ ಸೇ ಓನ್ ದೇಕನ್ -ಈ ಪಾಪಿರ್ ಮನಕ್ಯಾರ್ ಡಾoಯಿ ವಸ್ಸೇನ್ ಜಾರೋಚ್ ಕನ್ ಕೋ ⁸ ಜಕ್ಕಾಯ್ಯಾ ಹುಬ್ರೇನ್ -ಇದೇಕ್ ಪ್ರಭು ,ಮಾರ್ ಧನೆಮಾ ಆದೋ ಗರಿಬೇನ್ ದೇರೋಚು .ಮ ಕೇರಿಕನ್ ಕಾಂಯಿ ಭೀ ಅನ್ಯಾಯೇತಿ ಲೇಲ್ದೋವತೋ ಓನ್ ಚಾರ್ ಹಾಂಸೋ ದುಂಚುಕನ್ ಪ್ರಭುನ ಕೋ. ⁹ ಜೆರ್ವಾಸ್ ಯೇಸು -ಇ ಸದಾ ಅಬ್ರಾಹಾಮೆರ್ ಬೇಟಾ ಕಸೆನ್ಕತೋ ಆಜ್ ಎ ಘರೇನ ರಕ್ಷಣಾ ಆಯೋಚ . ¹⁰ ನಾಸವೆಗೊಜೆನ್ ಧೂoಡಣ್ ರಕ್ಷಣ್ ದೇನ್ ಮನಕ್ಯಾರ್ ಬೇಟಾ ಆಯೋಕನ್ ಕೋ. ¹¹ ಓ ಎವಾತೆ ಸಾಮಳ್ರೆಜನಾ ಉ ಎ ಯರುಸಲೆಮೆರ್ ಡಾoಯಿರ ಜೆರ್ವಾಸ್ ದೇವೇರ್ ರಾಜ್ ಜನಾಜ್ ದಕಾವಕೆನ್ ಉ ಕೇಲ್ದೇ ಜೆರ್ವಾಸ್ ಉ ವಜ್ಜೇಕ ಸಾಟುವಾ ಕೋ . ¹² ಕಾಂಯಿಕತೋ -ಏಕ್ ರಾಜೇರ ಬೇಟಾ ಏಕ ರಾಜೇನ ಕಮಾಲೆನ ಫರನ್ ಆವನುಕರನ್ ಘಣಂ ಚಜಕೋ ಮಲ್ಕೆನ ಜಾಯೇನ ತಯಾರವೆನ್ ನಿಕಳೋ ದಸ್ ದಿನಾರೆರ್ ಸಾಟುವಾ ¹³ ಓರ್ ದಸ್ ಬಾಂಯಾನ್ ಬಲಾನ್ ಉನೇನ ದಸ್ ಮ ಹೋಟೋ ಆವಜೆತಾಣು ಏತಿ ವ್ಯಾಪಾರ್ ಕರೋಕನ್ ಕೋ. ¹⁴ ಪಣ್ ಓ ವ್ಯಾಪಾರೇವಾಳ್ ಓರ್ ಉಪರ್ ರೀಸ್ ಕರ್ಲೆನ್ ಇ ಹಮಾರ್ ಉಮ್ಪರ್ ರಾಜ್ಕೆರೆರೋ ಹಾಮಾರ್ ಖಾತರ್ ಚೆನಿಕೆನ್ ಓರ್ ಲಾರ್ ಆದ್ಮಿನ್ ಕೆಮಲೇ. ¹⁵ ಉ ಓ ರಾಜೇನ್ ಕಮಾಲೇನ್ ಫರನ್ ಆಯೋಜನ ಹರ್ಯೇಕ್ ಆದ್ಮಿನ್ ವ್ಯಾಪಾರೆತಿ .ಕಾಂಯಿ ಕಮಾಯಾಕೋ ಮಾಲಂ ಕರ್ಲೆಮ್ ಉ ಪೀಸಾ ದಿನೋಜೆರ್ ಬಾಂಯವುನ್ ಓರ್ ಡಾoಯಿ ಬಲಾಯೇನ ಹಕಮ್ ದಿನೋ. ¹⁶ ಅಗಡಿರ್ ಬಾoಯ ಓರ ಮುಂಡಾಗ್ ಆನ -ಬಾಪು ,ತಾರ್ ದಿನಾರೇತಿ ದಸ್ದಿನಾರ್ ಕಮಾಯೋ ಕನ್ ಕೊಜನಾ, ¹⁷ ಉ -ಶಬಾಸ್ ,ಆಚೋ ಬಾಂಯ ತು ;ಎ ತೋಡಾಸೇಕೆಮಾಸಾಸ್ಪನೆತಿರೋ ಜೆರ್ವಾಸ್ ದಸ್ ಶೆರೆಪರ್ ಹಕಮ್ದಾರ್ ವೆನ್ ರ ಕನ್ ಕೋ. ¹⁸ ಜನಾ ಡಿಮೋ ಬಾಂಯಾ ಆನ್ -ಮಾಲಿಕ್ತಾರ್ ದಿನಾರೆತಿ ಪಾಂಚ್ ದಿನಾರ್ ಕಮಾಯೋ ಕೊಜನಾ , ¹⁹ ಉ ತು ಸದಾ ಪಾಂಚ ಶೆರೆಪರ್ ರಕನ್ ಓನ್ ಕೋ. ²⁰ ಜನಾ ಉಜ್ಜಿಕ್ ಬಾಂಯಾ ಆನ್ -ಮಾಲಿಕ್ ,ಇದೇಕ್ ತು ದಿನೋಕೋ ದಿನಾರ್ ಓನ್ ಲತ್ತಾಮಾ ಬಾಂದನ್ ಗೋಕ್ದಿನೋ ತು ಕಟಿನ್ ಛೀ ಜೆರ್ವಾಸ್ ಮ ಚಮಕಗೋ. ²¹ ತಾರ್ ಚೇನಿಜನ್ ಪಾಲ್ದೇವಾಲೋ,ತು ಬೋಯೇಸನಿಜೆನ್ ಕಾಚೆವಾಳೋ ಕನ್ ಕೋ . ²² ಜೆರ್ವಾಸ್ ಉ -ತು ಮಾಂದೋ ಬಾಂಯಾ ತಾರ್ ಮುಂಡೆರ್ ವಾತೇತಿ ತೋನ್ ನೇವ್ ಕರುಚು ;ಮ ಮಾರ್ ಚೆನಿಜೇನ್ ಪಾಡೆವಾಳೋನ ಬೋಯಿಸ್ ನಿಜೇನ್ ಕಾಟೆವಾಳೋನ್ ಕನ್ ತೋನ್ ಮಾಲಂ ರಜನಾ, ²³ ಹನುವತೋ ತು ಮಾರ್ ಪಿಸಾನ ಸಾವುಕಾರೆಕನ್ನ ಕಸೇನ್ ರಕಾದೋಕೋನಿ ;ಹನು ಕಿದೋ ವಸ್ತ್ತೋ ಮ ಆನ್ ವೆಜೆರ್ಸ್ಸಾತ್ ಓನ್ ಲೆಲ್ತೋ ಕನ್ ಕೆನ್, ²⁴ ಎರ್ ಡಾoಯಿತಿ ಓ ದಿನಾರ್ ಕಾಣೆಕನ್ ದಸ್ ದಿನಾರ್ ಚಜೆನ ದೋಕನ್ ಡಾoಯಿ ರಜೇನ್ ಕೋ. ²⁵ ಓ -ಬಾಪ್ ಓನ್ ದಸ್ ದೀನಾರ್ ಚಕೇನ್ ಕೆ , ²⁶ ಜೆರ್ವಾಸ್ ಉ -ಚಜೆ ಹರ್ಯೆಕೆನ್ ದೇವಚ ,ಚೆನಿಜೆರ್ ಡಾoಯಿತಿ ಚಜಕೋ ಸದಾ ಕಾಣಾಕಚಕನ್ ತಮೇನ ಕೆರೋಚು ಕನ್ ಕೋ. ²⁷ ಅನ್ ಉನೇರ್ ಉಪರ್ ರಾಜ್ ರೇನ್ ಖಾತರ್ ಚೆನಿಜೆಮಾರ್ ದುಸಮನುನ್ ಅತ್ತಲಾನ್ ಮಾರ್ ಮುಂಡಾಗ್ ಮಾರ್ ನಾಕೋ ಕನ್ ಕೋ. ²⁸ ಯೇಸು ಎ ವಾತೇಕೆನ್ ಯರುಶಲೆಮೇನ್ ಜಾವಣು ಕನ್ ಅಂಗ್ ಚಾಲನ್ ಡಗರ್ ಗೋ. ²⁹ ಒಲಿವಾರ್ ಗಟ್ಲಾಕನ್ ಚಜಕೋ ಬೆತ್ಸೆಪೆನನ್ ಬೇತನಿಯ ಕನ್ ಕಜೆ ಗಾಮೆಕನ್ ಉ ಆಯೋ ಜನಾ ಓರ್ ಚೆಲಾಮಾ ದಿಯೇನ್ ಬಲಾನ್- ³⁰ ಸಾಮು ಚಜೆ ಗಾಮೆನ್ ತಮ್ ಜಾವೋ ;ಓಮಾ ತಮ್ ಜಾವತೆಖಂ ಭಾಂದ್ಮೇಲೆಜಕೋ ಏಕ್ ಗದ್ದಿರ್ ಪಿಲ್ಲಾ ತಮೇನ ದಕಾವಚ ;ಓರ್ ಉಪರ್ ಕಿನ್ಸಿ ಆದ್ಮಿ ಕನ್ನಾಯಿಜ್ ಬೇಟೆಕೊನಿ ;ಒನ್ ಚೋಡನ್ ಡೋರ್ಲಾವೋ . ³¹ ಕೊಯಿತೋಯಿ-ತಮ್ ಕಸೇನ್ ಎನ್ ಚೋಡ್ ರೆಚೋಕನ್ ತಮೆನ್ ಪುಚುತೋ ಈ ಪ್ರಭುನ್ ಛಾವಣು ಕನ್ ಓನ್ ಕೋ ಕನ್ ಕೇನ್ ಉನೇನ್ ಮೇಲೋ. ³² ಮೆಲಾಯೇಜಕೋ ಜಾನ್ ಉ ಉನೇನ್ ಕೋಜುದೇಕ್ಲೇನ್ಓ ಗದ್ದಿರ್ ಪಿಲ್ಲಾನ್. ³³ ಚೋಡತೆ ರಜನಾ ,ಓರ್ ಮಾಲಿಕ್ -ತಮ್ ಗದ್ದಿರ್ ಪಿಲ್ಲಾನ ಕಸೇನ್ ಚೋಡರೆಚೋ ಕನ್ ಉನೇನ ಪೂಚೋ. ³⁴ ಜನಾ ಓ -ಈ ಪ್ರಭುನ್ ಚಾವಣೂ ಕನ್ಕೆ; ³⁵ ಪಚ್ಚ ಓ ಯೇಸು ಕನ್ ಒಂಡೋರ್ ಲೇನ್ ಆನ್ ಓ ಗದ್ದಿರ್ ಪಿಲ್ಲಾ ಉಂಪರ್ ಉನೇರ್ ಲತ್ತಾ ವಚಾನ್ ಯೇಸುನ್ ಓರ್ ಉಪರ್ ಭೆಸಾಡೆ. ³⁶ ಉ ಜಾರೋಜನಾ ಉನೇರ್ ಲತ್ತಾ ಸಾರಿ ವಾಟೆರ್ ಉಪರ್ ವಚಾಯೇ, ³⁷ ಓಲಿವಾರ್ ಗಟ್ಲಾತಿ ಉತ್ರೆರ್ ಜಾಗೆ ಡಾoಯಿ ಉ ಆರೋಜನಾ ಚೆಲಾರ್ ಮಳಾವೋ ಸೇ ಖುಶಿಕ್ತರೆ, ³⁸ ಪ್ರಭೂರ್ ನಾಮೇಪರ್ ಅವಜಕೋ ರಾಜ್ ಅಸಿಸ್ ವೆಜಾಯೇದ,ಸ್ವರ್ಗಲೋಕೆಮಾ ಶಾಂತಿ ಸೇತಿನ್ ಉಂಚೋ ಚಜಕೋ ಮಲ್ಕೆಮಾ ಮಹಿಮಾ ರೆಜಾಯೆದ ,ಕನ್ ಓ ದಿಟೆಜಕೋ ಸೇ ವಿಚಿತ್ತರ್ ಕಾಮೆರ್ವಾಸ್ ಮೋಟೋ ಘೋಗೆತಿ ದೇವೇನ್ ಧೋಕ್ದೆನ್ ಸುರೂಕಿದೇ. ³⁹ ಓ ಮಾಳೆಯೇಮಾ ರಜಕೋ ತೋಡಾಸೇಕ್ ಪರಿಸಾಯುಲ್-ಬೋದಾಕರೆವಾಳೋ ,ತಾರ್ ಚೇಲಾವುನ್ ದಲ್ಕಾರ್ ಕೇನ್ ಕೆಜನಾ, ⁴⁰ ಉ ಉನೇನ ದೇಕನ್ ಎ ಗಚ್ಚಬ್ ರತ್ತೋ ಎ ಭಾಟಾ ಕಲ್ಕಾರಿ ಮಾರಚ ಕನ್ ತಮೇನ್ ಕೆರೋಚುಕನ್ ಕೊ. ⁴¹ ಉ ಶೆರೆರ್ ಡಾoಯಿ ಆಯೋಜನಾ ಒನ್ ದೆಕನ್ ಓರ್ ಕಾಣ್ ರೋನ್- ⁴² ತುಸದಾ ಎತಾರ್ ದಾಡೆತಿ ಶಾಂತಿರ ಕಾಣೆರ್ ವಾತ್ ಮಾಲಮ ಕರ್ಲಸ್ತ್ತೋ ತೊನ ಕತ್ರಾಯಿಕೋ ಆಚೋ ಪಣ್ ಅಬ್ಬ ಓ ತಾರ್ ಅಂಕಿನ್ ಗೋಕ್ ಮೇಲೇಜು ಛ. ⁴³ ಪ್ರಭು ತೋನ್ ದರ್ಸನ್ ದಿನೋಜನಾ ತು ವಳ್ಕೋ ಕೋನಿ ಜೆರ್ವಾಸ್ ತಾರ್ ವೇರಿ ತಾರ್ ಘರೇನ್ ಪಾಳ್ ಬಾಂದನ್ ಚಿಪ್ಲೇನ್ ಚಾರಿವಾಡಿತಿ ತೋನ್ ಆಡೋಕರನ್ ತಾರ್ ಮಾಯಿ ಚಜಕೋ ತಾರ್ ಚಚ್ಯಾಬರೆತಿ ಸದಾ ತೋನ್ ಜಮಿಮಾ ಬೇಳನ್, ⁴⁴ ತಾರ್ ಮಾಯಿ ಭಾಟಾಪರ್ ಭಾಟಾ ರೇನಿಜು ಕರೇರ್ ದಾಡೋ ಅವಚಕನ್ ಕೋ. ⁴⁵ ಉ ದೇವಳೆಮಾ ಜಾನ್ ಓಮಾ ವೆಜೆವಾಳೋತಿ ಮಾರ್ ಘರ್ ಅರಜ್ ಕರೇರ್ ಘರ್ ಕನ್ ಲಕ್ ಮೇಲೆಚ ; ⁴⁶ ಪಣ್ ತಮ್ ಓನ್ ಚೋರೆರ್ ಖೋಳಾರ್ ನೈ ಕಿದೆ ಕನ್ ಕೇನ್ ಉನೇನ್ ದಲ್ಕಾರೆನ್ ಸರೂಕಿದೋ. ⁴⁷ ಯೇಸು ದಾಡಿ ದೇವಳೆಮಾ ಬೋದಾ ಕರ್ತ್ತೋರ ಜನಾ ಮೋಟೋಯಾಜಕಾನ್ ಪಂಡಿತನ್ ಜನೂಮಾ ಮೋಟೋ ಓನ್ ಮಾರ್ನಾಕೆನ್ ದೆಕೋಕಿದೆ, ⁴⁸ ಪಣ್ ಜನ್ ಸೇ ಓರ್ವಾತ್ ಸಂಳೇನ್ ಓನ್ ಚುಂಟನ್ ರಜೆರ್ವಾಸ್ ಓನ್ ಕ ಮಾರ್ನಾಕ್ ಣೂ ಉನೇನ್ ಮಾಲಂ ವಿಕೋನಿ.