¹ ಕಟ್ಟಾಳೋ ನಖಾವಜು ದಾಡಿ ಅರಜ್ ಕರ್ತೆರೆಣೂ ಕನ್ ಉ ಉನೇತಿ ಎ ಸಾಟುವಾನ್ ಕೋ . ² ಏಕ್ ಶೇರೆಮಾ ನೇವ್ ಕರೇವಾಳೋ ನಾಯಕ್ ಎಕ್ಲೋರ .ಉ ದೇವೆನ ಚಮಕೇನಿಜು ಮನಕ್ಯಾನ ಖಾತರ ಕರೇನಿಜುರ. ³ ಓ ಶೇರೆಮಾ ಏಕ್ ರಾಂಡ್ ಬಿರ್ ಸದಾವೆತ್ತಿ ಉ ಓರ್ ಡಾoಯಿ ಘಣ್ ಹಪ್ತಾ ಆನ್ ಮುನ್ನನ ಮಾರ್ ದುಸ್ಮನೆರ್ ನೇವ್ ಕರಕನ್ ಪೂಚತಿ ಆಯಿ. ⁴ ಪಣ್ ಉ ತೋಡಾ ದಾಡ್ ದಲ್ದಿನೊಕೊನಿ ಪಚ್ಚ ಉ ಮ ದೇವೆತಿ ಚಮ್ಕುನಿಜು ಆದ್ಮೀರ್ ಖಾತರ್ ಕರೇನಿಜು ರೆತ್ತೋ ಸದಾ, ⁵ ಈ ರಾಂಡ್ ಬೀರ್ ಮನ ಕಟಾಳೋ ಖೋರರೀಚ್ ಜೆರ್ವಾಸ್ ಉ ಘಡಿ ಘಡಿ ಮಾರ್ ಡಾoಯಿ ಆನ್ ನೋರಾ ನಕರಜು ಓನ ನೇವ್ ಕರುಚು ಕನ್ ಓರ್ಮಾ ಉಜ್ ಕೆಲ್ದೋ. ⁶ ಉಜ್ಜಿ ಪ್ರಭೂ ಹನೂಕೊ -ಅನ್ಯಾಯತಿ ಭರೋಜಕೋ ಉ ನೇವ ಕರೆವಾಳೋ ಕೋಜಕೋ ವಾತ್ ಸಾಂ ಳೋ . ⁷ ಉ ನಿಯಂ ಕಿದೋಜೆನ್ ಆದ್ಮಿ ರಾತನ್ ದಿಯೇ ಓರ್ ಬಾರೇಮಾ ಅರಜ್ ಕರ್ತ್ತೋ ರಜನಾ ಉನೇನ ದೇವ ನ್ಯಾಯಂ ಕರೆನಿ ಕಾಂಯಿ? ⁸ ಉ ಉನೇನ ಜಲ್ದಿ ನೇವ್ ಕರಚ ;ಉ ಸಾಮಳ್ತೊ ರಜಕೋ ಉನೇರ್ವಾಸ್ ಕೋನಿಕಾಂಯಿ/ಕನ್ ತಮೇನ ಕೆರೋಚು .ಹನೂವತೋ ಮನಕ್ಯಾರ್ ಬೇಟಾ ಅವಜನಾಧರ್ತಿ ಉಮ್ಪರ್ ವಿಶ್ವಾಸ್ ಕಾಂಯಿ? ⁹ ಓಜ್ ನಿಯತೇದಾರ್ ಕನ್ ಉಂದೆನಜ್ ವಿಶ್ವಾಸ್ ಕರ್ಲೆನ್ ದುಸ್ರೆ ಹಾಳ್ಕಿದೆಜೇ ತೋಡಾಸೇಕೆತಿ ಯೇಸು ಈ ಸಾಟುವಾಕೋ. ¹⁰ ಅರಜ್ ಕರೆನ್ ದೀ ಆದ್ಮಿ ದೆವಳೇನ್ ಗೆ ;ಉನೆಮಾ ಏಕ್ ಪರಿಸಯಾರನ್ ಏಕ್ ಸುಂಕರಿಯಾವಾಳೋ ರ . ¹¹ ಪರಿಸಯಾ ಹುಬ್ರೇನ್ ಎದೇವ್ ,ಮ ಚೋರನ್ ಅನ್ಯಾಯ ಕರೆವಾಳೋ ಚಜಕೋ ದುಸರ್ ಆದ್ಮಿ ಸರಿಕನ್ ಈ ಸುಂಕರಿಯಾರ್ ನೈ ಸದಾ ಮ ಚೆನಿಕನ್ ತೋನ್ ವಿಂತಿ ಕರ್ರೋಚು . ¹² ಸಾತ್ ದಾಡೆಮಾ ಮ ದೀ ಹಪ್ತಾ ಭೂಕೋ ರೆರೋಚು ;ಮ ಕಮಾವಣಿಮಾ ಸೇ ದಸ್ಮೋ ಹಾಂಸೋ ದೆರೋಚು ಕನ್ ಓರೆಮಾ ಉಜ್ ಅರಜ್ ಕರ್ತೋರ . ¹³ ಪಣ್ ಸುಂಕರಿಯಾ ಘಣಂ ಹುಬ್ರೇನ್ ಆಸ್ಮಾನೆಸಾಂ ಅಂಕಿ ಪಾಡೇನ್ ಸದಾ ಹಿಮ್ಮತ್ ನರಜು ಛಾತಿ ಮಾರ್ತೋ ,ಎದೇವ್ ,ಪಾಪಿ ಚುಜಕೋ ಮಾರ್ ಉಮ್ಪರ್ ದಯಾ ದಕಾಳ್ಕನ್ ಕೋ, ¹⁴ ಓತಿ ಈ ದೇವೇರ್ ಮುಂಡಾಗ್ ನಿಯೇತ್ ದಾರ್ ಕನ್ ಕೇರಾನ್ ,ಓರ್ ಘರ್ ಡಗರ್ ಗೋಕನ್ ತಮೆನ್ ಕೆರೋಚು ;ಓರ್ ಉಜ್ ಮೋಟೋ ಕೇಲಜಕೋ ಹೇಟ್ ವೇಜಾ ಕನ್ ,ಓರ್ ಉಜ್ ಹಾಳ್ ಕೊ ಕೇಲಜಕೊ ಹೇಟ್ ವೇಜಾ ಕನ್ ,ಕನ್ ಓರ್ ಉಜ್ ಹಾಳ್ ಕೊ ಕೆಲಜಕೋ ಉಂಚ್ ವೇಜಾ ಕನ್ ಕೊ. ¹⁵ ಉನೇರ್ ಛಚ್ಯಾಬರೂನ್ ಚಿಪ್ಣೂಕನ್ ತೋಡಾಸೇಕ್ ಉನೇನ್ ಓರ ಡಾoಯಿ ಲಾಯೇಜನಾ ಓರ್ ಚೇಲಾ ಉ ದೇಕನ್ ಲೇನ್ ಆಯೇಜೇನ್ ದಲ್ ಕಾರೇ , ¹⁶ ಪಣ್ ಯೇಸು ಉನೇನ್ ಓರ್ ಡಾoಯಿ ಬಲಾನ್ ನಾನ್ ಕ್ಯಾ ಛಚ್ಯಾಬರೇರ್ ಆಡೋ ನಜಾವಜು ಉನೇನ್ ಮಾರ್ ಡಾoಯಿ ಆಯೇದೋ ದೇವೆರ್ ರಾಜ್ ಉನೇರ್ ಸರಿಕಜ್. ¹⁷ ನಾನ್ ಕ್ಯಾ ಛಚ್ಯಾಬರೇರ್ ನೈ ದೇವೆರ್ ರಾಜೆನ್ ನಲಜಕೋ ಓರೆಮಾ ಕನ್ನಾಯಿ ಜಾಯೇನಿ ಕನ್ ತಮೇನ್ ಸಾಸಿಜ್ ಕೆರೋಚು ಕನ್ ಕೋ. ¹⁸ ಎಕ್ ಯೂದರ್ ನಾಯಕ್ ಓನ್ ದೆಕನ್ ಆಚೋ ಬೋದಾ ಕರೆವಾಳ್ ಶಾಶ್ವತ್ ಹಕ್ದಾರ್ ವೇನ್ ಮ ಕಾಯಿ ಕರಣೂ ಕನ್ ಓನ್ ಪೂಚೋ. ¹⁹ ಜೆರ್ವಾಸ್ ಯೇಸು -ಮನ ಆಚೋ ಆದ್ಮಿಕನ್ ಕಸೇನ ಕೆರೋಚಿ ?ದೇವ್ ಎಕ್ ಲೋಜ್ ಪಣ್ ಕೋಯಿ ಸದಾ ಆಚೋ ಆದ್ಮಿ ಛೆನಿ . ²⁰ ವಡಾಳೋ ನಕರ್ಣು ತಾರ್ ಆದ್ಮಿನ್ ನಮಾರ್ ನಾಕ್ಣೂ ಚೋರಿ ನಕರಣೂ ಲಬಾರಿ ನಕೇಣು ತಾರ್ ಯಾಡಿ ಬಾಪೆನ ಮಾನ್ ಕರ್ನೋ ಕನ್ ಕಜಕೋ ಹಕ್ ಮೆನ್ ಮಾಲಂ ಚೆನಿಕಾಂಯಿ ?ಕನ್ ಓನ್ ಕೋ. ²¹ ಜೆರ್ವಾಸ್ ಉ ನಾನ್ಕ್ಯಾರುಜನಾತಿ ಎ ಸೇರ್ ನೈ ಚಾಲ್ ಜಾರೋಚುಕನ್ ಕೊ. ²² ಯೇಸು ಸಾಮಳನ್ ತೋನ ಉಜ್ಜಿ ಎಕ್ ಕಂ ಛ ತೊನ ಚಜಕೋ ಸೇ ವೆಚನ್ ಗರಿಬೇನ್ ದ :ಜನಾ ಸ್ವರ್ಗ ಲೋಕೇಮಾ ತೋನ ಧನ್ ಮಳಚ .ತು ಮಾರ್ಲಾರ್ ಆಜೋ ಕನ್ ಓನ್ ಕೋ . ²³ ಉ ಘನೋ ಸಾವಕಾರ್ ಜೆರ್ವಾಸ್ ಎ ವಾತೆ ಸಾಮಳನ್ ಘನೋ ದುಃಖಪಾಯೋ . ²⁴ ಉ ದುಖಪಾಯೋಕನ್ ಯೇಸು ಓನ್ ದೆಕನ್ ಧನೆವಾಳ್ ದೇವೇರ್ ರಾಜೇಮಾ ಜಾಯೇರ ಕತ್ರಾಯಿಕೋ ವೇಲಾ. ²⁵ ಧನೆವಾಳ್ ದೇವೇರ್ ರಾಜೇಮಾ ಜಾವಜೆತ್ತಿ ಸುಯಿರ್ ನಾಕೆಮಾ ಹೂoಟೆ ಧರ್ಸೆ ಜಕೋ ವ್ಹಳಿ ಛ ಕೋ . ²⁶ ಎ ಸಾಮಳ್ ಜಕೋ ಹನೂವತೋ ಕುಣ್ ರಕ್ಷಣ್ ಲೆಸಕಚ ?ಕನ್ ಪೂಚೆಜನಾ , ²⁷ ಉ -ಆದ್ಮಿತಿ ವನ್ಗಾಯೇನಿಜಕೋ ದೇವೇತಿ ವಚ್ಚಕನ್ ಕೋ . ²⁸ ಪೆತ್ರು ಇದೇಕ್ ,ಹಂ ಹಮೇನ್ ಚಜಕೋ ಸೆ ಚೋಡದೆನ್ ತಾರ್ ಲಾರ್ ಆಯೆಕನ್ ಕೊಜನಾ, ²⁹ ಯೇಸು ದೇವೇರ್ ರಾಜ್ಯಾಮೆರ್ವಡಿ ಘರೆನ್ಕೋ ,ಮಾ ಬಾಪೇನ್ ಕೋ ಭಾಯಿ ಭಂದೇನ್ ಕೋ ,ಗೋನ್ನಿ ನ ಕೋ ,ಬೆಪ್ಪಾನಕೋ ಚೋಡ್ ದಿನೋಜಕೋ ಕೋಯಿ, ³⁰ ಈ ಜಗತಿಮಾ ಘನೋನನ್ ಸ್ವರ್ಗೆಮಾ ಶಾಸ್ವಿತ್ ಜೀವೇನೇನ್ ಪಾಯೇನಿಜು ರೆನಿಕನ್ ಸಾಸಿಜ್ ತಮೆನ ಕೆರೋಚು ಕನ್ ಕೋ . ³¹ ಉ ಓರ್ ಭಾರೆ ಚೆಲಾವುನ್ ಬಲಾನ -ಇದೆಕ್ ,ಯಾರುಷಲೆಮೆನ್ ಜಾರೇಚಾ ಆದ್ಮೀರ್ ಬೇಟಾರ್ ಬಾರೆಮಾ ಭಕ್ತಿದಾರುತಿ ಲಕ್ಮೆಲೆಜಕೋ ವಾತ್ ಸೇ ಪೂ ರೋವಚ್ಚ ಕನ್ ಕೊ. ³² ಉ -ಪರಲ್ ಜನೂನ್ ಹವಾಲ್ ವಿಯೆ ;ಓ ಓನ್ ಠಟ್ಟ ಕರನ್ ಇಜ್ಜತ್ ಕಾಡನ್ ಓರ್ ಉಪರ್ ಥುo ಕನ್, ³³ ಓನ್ ಹಂಸೂಡೆತಿ ಮಾರನ್ ಮಾರ್ನಾಕ್ಯೇ ,ತಿನ್ ದಾಡೆರ್ ಪಚ್ಚ ಉ ಫರನ್ ಉಟ್ಚ್ ಕನ್ ಕೋ . ³⁴ ಎ ವಾತೆಮಾ ಏಕ್ ಸದಾ ಓ ಮಾಲಂ ಕರ್ಲಿದೆ ಕೊನಿ ;ಈ ವಾತ್ ಉನೆನ್ ಗೋಕಾಗಿ ಜೆರ್ವಾಸ್ ಉ ಕೊಜಕೊವಾತೆ ಉನೆನ ಮಾಲಂ ವಿಕೊನಿ . ³⁵ ಉ ಯರಿಕೋ ಶೆರೆರ್ ಡಾoಯಿ ಆಯೋಜನಾ ಎಕ್ ಆಂದೋವಾಟೆರ್ ಬಗಲ್ ಭೆಸನ್ ಭಿಕ್ ಮಾಂಗ್ ತೋರ . ³⁶ ಜನೇರ್ ಮಳಾವೋ ಲಂಗನ್ ಜಾರೇಜಾರ್ ಆಟ್ ಸಾಮಳನ್ ಈ ಕಾಂಯಿಕನ್ ಪೂಚೋಜನಾ , ³⁷ ಓ ನಜರೇತರ್ ಯೇಸು ಎವಾಟೆಪರೇನ ಜಾರೊಚ್ ಕನ್ ಓನ ಕೇ. ³⁸ ಜನಾ ಉ ಯೇಸು ದಾವಿದೇರ್ ಬೇಟಾ ಮಾರ್ ಉಪರ್ ದಯಾದಕಾಳ್ ಕನ್ ಕಲ್ಕಾರಿ ಮಾರ್ರೋಜನಾ, ³⁹ ಗಚ್ಚಬ್ ರಕೇನ್ ಆಂಗ್ ಚಾಲ್ರೆಜಕೋ ಓನ್ ದಲ್ಕಾರೆ ;ಪಣ್ ಉ ಉಜ್ಜಿ ಜಾದಾ ದಾವಿದೇರ್ ಬೇಟಾ ,ಮಾರ್ ಉಪರ್ ದಯಾದಕಾಳ್ ಕನ್ ಕಲ್ಕಾರಿ ಮಾರೋ. ⁴⁰ ಜನಾ ಯೇಸು ಹುಬ್ರೇನ್ -ಓನ್ ಮಾರ್ ಡಾoಯಿ ಲಾವೋ ಕನ್ ಕೋ. ⁴¹ ಉ ಡಾoಯಿ ಆಯೋಜನಾ ಉ -ಮ ತೋನ ಕಾಂಯಿಕರಣೂಕೇನ್ ಓನ ಪೂಚೇ ಉ -ಪ್ರಭೂ ನಂಜರ್ ಆವಜು ಕರ್ ಕನ್ ಕೋ. ⁴² ಯೇಸು -ನಂಜರ್ ಲೇಲ ;ತಾರ್ ವಿಶ್ವಾಸ್ ತೋನ ಆಚೋಕಿದೋ ,ಕನ್ ಓನ್ ಕೋ. ⁴³ ಉಜ್ ಉ ನಂಜರ್ ಲೇಲೇನ್ ದೇವೇನ್ ಮಹಿಮಾ ಕರ್ತ್ತೋ ಓರ್ ಲಾರ್ ಡಗರ್ಗೊಜನ್ ಸೇ ಓನ್ ದೇಕನ್ ದೇವೇನ್ ಸ್ತೂತಿಕಿದೇ.