¹ ಉಜ್ಜಿ ಯೇಸು ಓರ್ ಚೇಲಾವುನ್ ಹನೂಕೋ-ಎಕ್ ಸಾವಕರೆಕನ್ ಎಕ್ ಘರೆರ್ ಲೆಕೊದೆವಾಲೋ ವೆತ್ತೋ ಉ ಓರ್ ಆಸ್ತಿನ್ ನಾಸ್ ಕರೋಚ ಕನ್ ಓರ್ ಉಪ್ಪಾರ್ ಧಾವ್ ಘಾಲ್ರೆಜನಾ, ² ಉ ಓನ ಬಲಾ ಮಂಗನಾ -ತಾರ್ ಬಾರೆಮಾ ಮ ಸಾಮಳ್ ರೋಜಕೋ ಈ ವಾತ್ ಕಾಂಯಿ ?ತಾರ್ ಘರೆರ್ ಆಸ್ತಿರ್ ಲೋಕೋದ ತು ಅಬ್ಬೇತಿ ಘರೆರ್ ಲೋಕೊದೆವಾಳೆರ್ ನೈ ರೇನ್ ಚಾಜೆಸನಿಕನ್ ಓನ್ ಕೋ ³ ಉ ಘರೇರ್ ಲೇಕೊದೇವಾಳೋ ಓರ್ ಮಾ ಉಜ್ -ಮಾರ್ ಸಾವಕಾರ್ ಈ ಘರೇರ್ ಲೇಕೋದೇವಾಳೆರ್ ಕಾಮೆಮಾಯಿತಿ ಮನ್ ಕಣಾಕಚ ಜೆರ್ವಾಸ್ ಮ ಕಾಂಯಿಕರು ಖೋದೇನ್ ಜೋರ್ ಚೇನಿ ;ಭಿಕ್ ಮಾಂಗೆನ ಲಾಜ್ ಚುಟಜ್? ⁴ ಈ ಮನ್ ಘರೆರ್ ಲೇಕೊದೆರ್ ಕಾಮೆಮಾಯಿತಿ ಕಡಜನಾ ಉ ಮನ ಉನೇರ ಘರೇಮಾಯಿ ಡಾoಯಿ ಕರ್ಲಜು ಕಾಂಯಿ ಕರ್ನು ಓರ್ ಮಾಲಂ ಕನ್ ಕೇಲೇನ್, ⁵ ಓರ್ ಸಾವುಕಾರೇರ್ ಕರಜೆವಾಳೂನ್ ಏಕ್ ಏಕೂನ್ ಬಲನ್ ತು ಮಾರ್ ಸಾವುಕಾರೆನ್ ಕತ್ರಾ ಕರಜ್ ದೆಣುಕನ್ ಅಗಡಿ ಆಯೋಜ್ ಆದ್ಮಿನ್ ಪುಚೋ . ⁶ ಉ ಸೋಮಣ್ ತೆಲಕನ್ ಕೇತೆಖಂ ತು ತಾರ್ ಚಿಟಿ ಲೆಲೇನ್ ಜಲ್ದಿ ಬೇಸನ್ ಪಚ್ಚಾಸ್ ಮಣ್ ಕನ್ ಲಕ್ ಲ ಕೋ . ⁷ ಪಚ್ಚ ಉ ತು ಕತ್ರಾ ಕರಜ್ ಚೀಕನ್ ಉಜ್ಜೇಕನ್ ಪುಚ್ತೆಖಂ ಉ -ಸೋ ಮಣ್ ಘಂವು ಕನ ಕೋಜನಾ,ಓನ್ ತು ತಾರ್ ಚಿಟಿ ಲೇಲೆನ್ ಪಚ್ಚಾಸ್ ಮಣ್ ಕನ್ ಲಕಲ ಕನ್ ಕೋ . ⁸ ಅನ್ಯಾಯ ಕಿದೊಜಕೋ ಉ ಘರೇರ್ ಲೆಕೊದೆವಾಲೋ ಹುಷಾರೇತಿ ಚಾಲೋ ಕನ್ ಓರ್ ಸಾವುಕರ್ ಓನ್ ಮೆಚ್ಲಿದೋ ;ವಜಾಳೆರ್ ಚಚ್ಯಾಬರೆತಿ ಈಜಗೇರ್ ಛಚ್ಯಾಬರ್ ಉನೇರ್ ಬಗಲ್ ಚಜೇತಿ ವೇಪಾರ್ ಕರೆನ ಘಣ್ ಹಕಮತ್ ದಾರ್ಚ . ⁹ ಎ ಜಗರ್ ಧನೇತಿ ತಮೆನ್ ದೊಸ್ತಿಯೂನ್ ಕಮಾಲೋ ;ಕನ್ ಕೋ ಉ ಧನ್ ತಮೇನ ಚೋಡಾವಜನಾ ಶಾಶ್ವತ್ ದಾಡ್ ಹುಬ್ರೆಜಾ ಘರೂಮಾಓ ತಮೆನ ಕೆರೋಚು . ¹⁰ ಜನಾ ದಸ್ಸೇಕೆಮಾ ವಿಶ್ವಾಸೇತಿ ರೇವಳೋ ಜಾದಾಮಾ ಸದಾ ವಿಶ್ವಾಸೇತಿ ರಚ . ¹¹ ಜೆರ್ವಾಸ್ ತಮ್ ಎ ಜಗೇರ್ ಧನೇರ್ ತಮರ್ ಹಾತೇನ ಕುಣ್ ಹವಾಲ್ ಕರಿಯೆ? ¹² ತಮ್ ಪರಲೆರ್ ಆಸ್ತಿರ್ ಬಾರೆಮಾ ಸಾಸ್ಪನೆತಿ ನರತ್ತೋ ತಮಾರ್ ಧನ್ ತಮನ ಕುಣ್ ದಚ ? ¹³ ಕುನ್ಸಿ ಬಾಂಯಾ ದೀ ಮಾಲಿಕುರ್ ಡಾoಯಿ ಸೇವಾ ಕರ್ಸಕೆನಿ ;ಉ ಎಕೇತಿ ದುಸ ಮನೇವೆನ್ ಉಜ್ಜಿಕೇನ ಪ್ರೇಂ ಕರೋನವತ್ತೋ ಎಕೆರ್ ಲಾರ್ ಜಾನ್ ಎಕೇನ್ ಚೋಡ್ದಚ್ ತಮ್ ದೇವೇನನ್ ಧನನ್ ಸೇವಾಕರ್ ಸಕೋನಿ ಕನ್ ಕೋ. ¹⁴ ಈ ವಾತ್ ಸೇ ಪರಿಸಯುಲ್ ಸಾಮಳೆನ್ ಓನ್ ಠಟ್ಠಾ ಕಿದೇ ;ಕಸೆನ್ ಕತೋ ಓಪಿಸಾನ್ ಪ್ರೇಮ್ ಕರ್ತೆರ ರ. ¹⁵ ಒನಾಯೇಸು ಉನೇನ -ತಮ್ ಮುಂಡಾಗ ನೆಕಿದಾರ್ ಕನ್ ಕೆರಾವೋ ;ಪಣ್ ದೇವೇನ್ ತಮಾರ್ ದಲ್ ಮಾಲಂ ,ಆದ್ಮೀರ್ ನಂಜರೆಮಾ ಮಾನ್ ಚಜಕೋ ದೇವೆರ್ ನಂಜರೆಮಾ ಭುರೋಚ . ¹⁶ ದಾಡೆಲಗು ಧರಂಶಾಸ್ತ್ರಾ ಭಕ್ತಿದಾರುರ್ ಲಕ್ಣಿ ಅಮಲ್ ವೆತ್ತಿ ರ ;ಜಾನಾತಿ ದೇವೇರ್ ರಾಜೇರ್ ಆಚ್ ಖಬರಿನ್ ಪ್ರಾಚಾರ ಕರೇಚ ,ಹರ್ಯೇಕ್ ಆದ್ಮಿ ಓ ರಾಜೇಮಾ ಜೋರ್ ಭಾರಿತಿ ದರಸರೇಚ. ¹⁷ ಧರಂ ಶಾಸ್ತ್ರೆಮಾ ನಾನ್ಕಿಸ್ ಲಕಣಿ ಸದಾ ಪಡಜಾವಜೆತಿನ್ ಆಸ್ಮಾನ್ ಧರ್ತಿ ನಾಸ್ ವೆಜ್ಯೇರೋ ಜರುರ್. ¹⁸ ಓರ್ ಗೋನ್ನಿನ್ ಚೋಡ್ದೇನ ಉಜ್ಜಿಕೆನ ವಾಯು ಕರೆವಾಳೋ ಹರ್ಯೇಕ್ ವಡಾಳೋ ಕರೋಚ ;ಘರೆವಾಳೆನ್ ಚೋಡಾದಿನಿಜೇನ್ ವಾಯ ಕರೆವಾಳೋ ವಡ್ಡಾಳೋ ಕರೋಚ. ಧನೆವಾಲೋನ್ ಉಜ್ಜಿ ಲಾಜರ್ ¹⁹ ಎಕ್ ಸಾವುಕರ್ ವೆತ್ತೋ ;ಉ ಘನೋ ಮೊಲೆರ್ ಪಾತಲೋ ಲತ್ತಾ ಪೆರಲೆನ್ ದಾಡಿ ಘನೋ ಸೋಖೆತಿ ರೇವಳೋ ²⁰ ಲಾಜರ್ ಕಜಕೋ ಎಕ್ ಗರೀಬ್ ವೆತ್ತೋ ಓರ್ ಜೀವಸಾರಿ ಗುಮಡಿತಿ ಭರಾನ್ ರ .ಉ ಸಾವುಕರೆರ್ ಘರೆರ್ ಅಂಗನೆಮಾ ಪಡನ್ ರ . ²¹ ತಕ್ತಾಪರೆತಿ ಬಾಟಿರ್ ತುಕ್ದಾತಿಭುಕ್ ಹಟಾಲೂ ಕನ್ ಕೆಲ್ದೋ ಆತ್ರಾಜ್ ಕೋನಿ ಕೋತ್ರಾ ಆನ್ ಒರ್ ಗುಡಿನ ಚಾಟ್ ತೆ ರ ²² ಉ ಗರೀಬ್ ಲಾಜರ್ ಮರ್ಗೋ ಜನಾ ಅಬ್ರಹಾಮೇರ್ ಚಾತಿಪರ್ ಅಡಕಾಯೇನ್ ದೇವೇರ್ ಸೋಜಾ ಓನ್ ಲೆಗೆ .ಸಾವುಕಾರ್ ಸದಾ ಮರ್ಗೋ ಜನಾ ಓನ ಲೆಜಾನ ಖಾಡೆಮಾ ಘಾಲ್ ದೀನೇ. ²³ ಜನಾ ಉ ಸಾವುಕಾರ ನರ್ಕೆಮಾ ತರೆಕರ್ತೋ ಆಂಕಿಪಾಡನ್ ಅಬ್ರಾಹಮೇನನ ಓರ್ ಛಾತಿ ಉಂಪರ್ ಅಡಕ್ರೋಜೆ ಲಾಜರೇನ ದೇಕನ್, ²⁴ ಬಾಪೂ ಅಬ್ರಾಹಾಂ ಮಾರ್ಪರ್ ದಯಾಕರನ್ ಓರ್ ಅಂಗಳಿರ್ ಪೂoಗ್ ಪಾಣಿಮಾ ಡಬೋಳಿನಾ ಮಾರ್ ಜಿಬೇನ ಸಿಳಕರೆರ್ ಲಾಜರೆನ ಮೇಲ್ ಮ ಎ ಅನ್ಗಾರೆರ್ ಝಾಳೆಮಾ ಭಾವೆಟಿ ಕರೋಚು ಕನ್ ಕಲ್ಕಾರಿ ಮರಾನ್ ಕೋ . ²⁵ ಜೆರ್ವಾಸ್ ಅಬ್ರಾಹಾಂ ಬೇಟಾ ತು ಬಂಚನ್ ರಸ್ಜಾನ ತಾರ್ ಖಾತರ್ ಅವಜು ಸೋಕ್ ಪಾಯೋ;ಹನೂಜ್ ಲಾಜಾರ್ ದೋಕ್ ಪಾಯೋ ಕನ್ ಹರ್ದೆಲಾ ಅಬ್ಬ ಉ ಅತ್ತ ಸೋಖ್ ಪಾರೋಚ ತು ದೊಕ್ ಪಾರೋಚಿ. ²⁶ ಅತ್ರಾಜ್ ಕೋನಿ ಅತ್ತೆತಿ ತಮಾರ್ ಕನ್ ಲಂಗನ್ ಆಸ ಕರೆವಾಳ್ ಲಂಗನ್ ನ ಅವಜು ಓತ್ತೆರ್ ಹಮಾರ್ ವಚ್ಚ ಮೋಟೋ ಖಾಯಿ ಚಕನ್ ಕೋ . ²⁷ ಜನಾ ಉ -ಬಾಪು ,ಹನುವತ್ತೋ ಮಾರ್ ಪಾಂಚ್ ಭಾಯಿಚ . ²⁸ ಓ ಸದಾ ಎ ಭಾವೆಟಿರ್ ಜಾಗೆಮಾ ನ ಅವಜು ಉನೇನ ಗವಾಯಿದೇನ ಮಾರ್ ಬಾಪೇರ್ ಘರ್ ಓನ ಮೇಲ್ಣೂ ಕನ್ ತೋನ ನೋರಾಕರರೊಚು ಕನ್ ಕೋ . ²⁹ ಜೆರ್ವಾಸ್ ಅಬ್ರಾಹಂ -ಉನೇರ್ ಡಾಯಿ ಮೊಷೆರ್ ಗ್ರಂಥನ್ ಭಕ್ತಿದಾರುರ್ ಪುಸ್ತಕ್ ಚ ;ಓ ಉನೇರ್ ವಾತ್ ಮಾನೆದ ಕನ್ ಕೊಜನಾ , ³⁰ ಉ -ಎ ಬಾಪ್ ,ಅಬ್ರಾಹಾಂ ಹನುಕಮತ್ ;ಮರ್ಗೆಜೆರ್ ಮಾಯಿತಿ ಎಕ್ ಉನೇರ್ ಡಾಯಿ ಚಾವತೋ ಓ ದೇವೆರ್ ಸಾಮ್ ಆಯೇ ಕನ್ ಕೋ ³¹ ಅಬ್ರಾಹಾಂ -ಓ ಮೊಷೆರ್ ವಾತೆನನ್ ಭಕ್ತಿದಾರನ್ ಕಜಕೋ ವಾತೆನ ಓ ಸಮಳೆನಿತೋ ಮರ್ಗೆ ಜೇಮಾಯಿತಿ ಎಕ್ ಉಟನ್ ಆವತೋ ಸದಾ ಓ ವಿಶ್ವಾಸ್ ಕರೇನಿ ಕನ್ ಕೋ .