ሃፑክ 5 ሐናንያዬ ሰጲራዬ ¹ ውር እን ሺጜ ሐናንያጝ፤ ከኝያ ኔኒ ሰጲራዬ ጉዋሩጙሻ ዳሊ፤ ² ኝያ ኔኒዻ እባጅባዬ ሺዕሺ ቢሬ ዶክ ኦካ ውር እን ኡዋሩጙሼዬ ቦው ጊታይ ሺዺዬ ኣጁጛ ኦካ ጃፍካ ሐዋርያታን። ³ ዬ ጴጥሮስ ሺጝ እያጝ፤ ሐናንያ ዮ፤ ከሾሮሼ መንፈስ ቅዱሴ ከሺዕሺዬ ኦካ ውር እን ኡዋሩጙሹጝ ሃናንዳካኦ እጁጝ ቋቄ ሻን ኑኑ ክያኑጝ? ⁴ እባ ከሌሜን የካኔ ኡዋሩጙሺኬኔ ማር ኑኑዬኒ? ኤ የኡዋሩጙሾጝካ ጩዋ ቢሬ ኔኒ ማር ቡዋ ኑኑ ክያኒ ኣኔኒ? ኣይባዬ የቃቢ እያን ክያጃጝ ከሻን ኑኑ? እን የሾሮሾጝ ሃባሪዮ ዬ ማር ውሬን። ⁵ ሐናንያዻ ዋዬ እኑጝ ቡዴ ኣርሻ፤ ውር ጊታይ ዋይ እኑጝ ፓይላ ሪጊ ታቺ ጎማ እንግን። ⁶ [ባርሻንዻ ናሹጜ ጉዋጛ ሻላ]፤ ቦዻዬ ቱቱካ። ⁷ ከሰዓት ጅያን ሳጊዮጝ ጩዋ፤ እን ኣይ ኝያ ኔኑጝ እባጅኬኔ ኩኔ ሁሉካ፤ ⁸ ጴጥሮስዻ ዋይሼ እሺ፤ ይንዻ ሜይሼየ ኡዋው፤ የኡዋሩጙሽቴ ዳሊ ጉዩጝ ሃኬ ቢሬ ጊታጲኒ? እሺዻ ሺጝ እህ ሃኬ ቢሬ ጊታጝጵን። ⁹ ጴጥሮስዻ ሺጝ፤ ከፓታንሲቴ መንፈስካ ታቺ እጝ የቱሙያ እያን እያጝ? እየዎ፤ ውር ጊታይ ቱቱኪ ኡማ ኑኑጝ ዋኬ ፓዬኔ ጃፍ ጊዬይ ኣኔን ኦይካ ሻኑጝ፤ ጎም እንዻዬ ቁጁዋ። ¹⁰ እሺዻ ይሪካ ቡድ ኦካ ጃፍ ኔኒዬ ኣርሻ፤ ባርሻንዻ ሻውያጝ ኣርሼ ጌያ እሺ፤ ቡሌ ቱቱካ ኦካ ቆጩርካ ኡማ። ¹¹ ውርካ ቶኦካ ይሁኔን ፓይላዬ ውር ጊታይ ዋይ እኔ ፓይላ ሪጊ ታቺ ጎማ እንግን። ¹² ሐዋርያታንዻ ከኦካ ጫቃንካ ዛርሲ ጋሽክያ ዹዋልሺኔን ባሺባሺዬ ዋድማ ሹቃሹቃዬ፤ [ውርካ ይሁኔን ፓይላ ኣኔን ኦይካ ሃፑክ እን ሺጜ ካዋኬ ጆሌንካ ሰሎሞን ፑጪዬን]። ¹³ ውር ክየምጵንዻ ኬና ዎሽኬ እንግን ሆርምኔን ኣኔኬን፤ ኣይባዬ ዛርሲ ኣኔን እንግን ካሎን ጌጳሲዬን። ¹⁴ ጁሙ ጁዋኑዬ ሃኣጚዬ ከሹ ፓይላ ኣምኒኬ ታቺ እኔ ኣኔን ሃሚን ጊዬይ ካይምኔን። ¹⁵ እን ናሹጝኬ እንዻ ጴጥሮስ ሳጊኬ ኦይንያጝ፤ ኣይን ሙሆል ሄክሼ ውር ጩዋማጵኑጝ ሺጜ እያይ ቡልሼ ውርካ ቡርቃን ሹኑኬ ጋኔን ከኣልጋዬ ከሻላዬ ጉዋር ክያኒ ዎኦሲዬን። ¹⁶ ኬከተማ ጊታይ ጌዬን ከራቅ እን ኣኔን ኢየሩሳሌም፤ ውር ጊታይካ ቡርቅዬ ውር ጊታይ ጎሜ ቦፓይኔ ውር ጊታይ ¹⁷ እን ናሹጝኬ እኑጝ ታታቻንካ ውርካ ቃሼ ውርካ ሰዱቃውያኔ ጊታይ ጋዬኬ ጋጜ ፓይላዬ ቋቁሻ ቦውንታ፤ ¹⁸ ጎም ሐዋርያታንዻዬ ዾቅሼያ ቶኦካ ቁሜን። ¹⁹ ካኣይባዬ ውርካ ኤርጎካ ባሪዮ ከምክር ቡል ሃፑካ ቶኦካ ቁሜኔ ቡል እንግኔ ሺጝ፤ ²⁰ «ፓይባ፤ ጎርባ ኦካ ጳንካ ቶኦካ ይሁኔንዻ፤ ክያጃጝካ ዻቆዻ ፓይላ ሜይቴ ዛርሲ። ²¹ ሃርሽባ ከእያይ ሜይሼ እንግኑጝ፤ ፓዬ ሻው ሃምካ ጳልካ ቶኦካ ይሁኔኔ ካርሲያ ዛርሲ እርርሲዬን። ታታቻንካ ውርካ ቃሼ ውር ጊታይ ጋዬኬ ጋጜ ፓዬኔ ፑኡሺያ ውር ታታቻንካ ካራምካ ውርካ ኣይሁዴ ውር ጌጵሹጋንካ እስራኤል ፓይላ ክየምጵንዻ፤ ካቦይኔ ሐዋርያታኔ ይዕሲሼያ ውር ሃምካ ቶኦካ ቁሜኑጝ። ²² ውር ጊታይ ይዕሲሼ ሃምካ ቶኦካ ቁሜንዻ ፓዬ ካኒ ጌይኬን እንግን፤ ዋኬ ፓዬ ዋይሼ እንግን እያጝ፤ ²³ ቶኦካ ቁሜን ከኣኩሉክ ሃጌዬ ውር ጊታይካ ባኪኔንዻ ጎር ኦይካ ሃፑኬ ሃጌያያ፤ ዬ ሃቦዋ ሻዋያጝ ቱዎጝ ውር ክየምጵንዻ ኣኔኬን። ²⁴ ውር ጊታይ ጌጵሲዬ ኦካ ቶኦካ ይሁኔኔ ታታቻንካ ውርካ ቃሼ ሹ እን ዋዬ እኑጝ ዻዹጝኔያ ክያጃ እን፤ ካቢሜናዻ። ²⁵ ከሹ እን ውር ክየም ኩኔ ሺጝ፤ እየዎ፤ ውር ጊታይ የዾቅቴ ቶኦካ ቁሜኑጝ ጎር ሃምካ ጳልካ ቶኦካ ይሁኔኔ ጋኔን ዛርሲ እርርሲዬን። ²⁶ ታታቻንካ ውርካ ባክኔንዻ ፓያ ከፓፃኗን፤ ጎሜ ቦፓይኔያ እንግን፤ ዬ ቦፓይኖጝ ዛርሲ ናንዳካጝ ሪግሼ እንግን ከባይ ሙሬኑጝ ካኒ ሻምኬን እንግን ከቁዋቅቲ ጊዲ። ²⁷ ቦፓይኔ ሐዋርያታኔ ሪባ ኦካ ሌሜንካ ካራም፤ ታቺ እንካ ውርካ ቃሽዻ ሺጝ እያጜ ኣንሻ እንግን፤ ²⁸ ካማርኬ ሮጝ እን እርርሲዬኔ ኣጅሻ እንግን ካሎን፤ ዬ እየው የቋቁሻያ እርርሲዬን ጉዩ ኢየሩሳሌም፤ ፕር እንቃ ናንዳካ ኒያቡካ ውሩጝ ከሻምቴ ኡዋው ውርካ ኣንሺኔን የቱሙዬ የናሹጛያ/ ²⁹ ጴጥሮሴ ሐዋርያ ዶኬ ሺጝ እያጜ ዋሻ፤ ከኦካ ውር ሳጊ ካዋይቴ ክያጃካ ባሪዮጝ ሁሉኩሼ ኡዋባ/ ³⁰ እን እየው የሮይቴ ሻሪ ክያኒዬ ኢየሱስ እን የኒሽቶጝ፤ ሹቡጌን ጉዋዩ ኣምላክ ቲታ እሺ ከኣርሼን ክያኒ፤ ³¹ እሺዻ ናንዳካ እስራኤል ካኣይኔ ይሁኔኔ ሺዕሺዬንካ ሴሶዬ፤ ባሪዮ ሻም ካዻዓሺ ፓይላዬ ሻማ ቡዎን ኔኒ ዼግዼግ። ³² ኡዋዻ ሃኣያ ማኝካ ኦግታጝ፤ ፕር ባሪዮ ናንዳካ ጊታይ ኣሽኪ ክያጃ ኔኑጝ ኣይኖጝ ሃመንፈስ ቅዱስ እን። ³³ ውርዻ ሹ እን ዋዬ እኑጝ ማኒሻ ካሎን፤ ዎሻ እንግን ኒሼንዻ። ³⁴ ኣይባዬ ከኦካ ዛርሲ ፓይላ ኬና ጌጳሲዬ ውርካ እርርሲዬን ከክያጃ ክየም፤ እሺዻ እን ሺጜ [ገማልያል] ውርካ ፈረሳዊ ናሹጜ ዾር ኦካ ጫቃንካ ካራሜ ካቡልሼ ሐዋርያታን ሹኑኬ ካጌዬ ካፑጝ ሜይሼያ ውር፤ ³⁵ ዋይሼ ውር ጊታይ ኣኔን ካራም ክያንዻ እያጝ፤ «ውርካ እስራኤል ዮ፤ እን የቃቢቴ ውራን ጊታጝ ሻምሼኑጝ ከእያምቴ ሹቃጝ ሁሉኩሼ እየውባ። ³⁶ ከሌሜንካ ይጝ፤ ቴዎደስ ሻም እሺ ኤምኑ ታቺዬ ኳሜ ናሹጜ፤ ሻምሼያ ውር ዽብ ኣሁር ሃሚን ኔኑጝ ኣይባዬ ኒሻ እሺ፤ ውር ጊታይ ዻዬ ጆሌ እሺዻ ላልሜና፤ ክያጃ እንዻ ማቲያ ከኦኮኑጝ ኑጝዻ ማሬ ኣኔኑጝ። ³⁷ ከኦኔኒ ጩዋ፤ ከዋዳካ ዛርሲ ኮሜን ይሁዳ እንካ ገሊላጝ ናሹጜ፤ ፑኡሺያ ዛርሲ ጁዋኑ፤ ጌያ ውርካ ዻይኔንዻ፤ እሺዻ ካህያ፤ ውርካ ዻይኔን ኔኒዻ ላሊሜና። ³⁸ ዬ ጋን ካዋይሼ እየው ኦይድባ ውራን ጊታጝ፤ ኦይድ እንግን ዱምቴን፤ ቃቦ ጊዬይ ወይ ዋድማ ጊዬይ ሃኬ ውርያጝ ካይባዬ፤ ³⁹ ዬ ሃኬ ባሪዮያጝ የቻሊያኬን እንግን ጁጁሬን፤ የፓቅቴያ እያይ ከባሪዮያጝ የጌያባ። ⁴⁰ እንግንዻ ናሺ ክሊማ እጜ፤ ሺው ሐዋርያታኔ ሙሩሻ እንግን፤ ካማርኬ ሮጝካ ኢየሱስ እንቃ ሃሳውኔኔ ሜይሼ እንግኔ ይዕሲያ። ⁴¹ ሐዋርያታንዻ፤ ናንዳካ ሮጝ ኔኒ ቦውንታ ቦወን ከሹዋጵሼን ጊዬይ ዋዝንዽዬ ቱልኬ ኦይንካ ውሬ ፓያ፤ ⁴² ከሹ ጮል ኣይን ኦጉዋይካ ቶኦካ ይሁኔን፤ ኣይን ኦጉዋይካ ቶኦ ጊዬዩጝ፤ ኢየሱስ ኣዬ ክርስቶሱጝ ከእርርሲዬኔ ክሊዬኔ ክየምጵንዻ ካኒ ዋክሼኬን ሁር።