ሃፑክ 4 ጴጥሮሴ ዮሐንሴ ከኦካ ሌሜንካ ካራምካ ውርካ ኣይሁድ ¹ ጴጥሮሴ ዮሐንሴ ጋኔንባ ዛርሲ ሜይሼኔ፤ ውር ታታቺ ጊታይ ቶዬን ታታቺካ ውርካ ቃሼ ውርካ ቶኦካ ይሁኔኔ ፕር ውርካ ሰዱቃውያኔ ሉጉድ ፓዬና ሃሚን ጊዬዩጝ። ² እንግንዻ ከእን ሐዋርያታን ጊርርሲዬ ዛርሲዬ ክሊኔ ከእንካ ናሹጜንካ ኢየሱሴ ካሎን ማኒሻ። ³ ጎማ ጴጥሮሴ ዮሐንሴ፤ ሹሽዻ ናንዳካጝ ቃይትሾጝ ሌይ ሃምካ ሃሪሾጝ ዎኦሲያ እንግን ኦካ ቶኦካ ቁሜን። ⁴ ካኣይባዬ ከኦካ ጫቃንካ ጊታይ ዋይ ክያጃጝ ጁዋናን ጎማ ከሻን፤ ጁማን ሄክሻ ሺ ቾን። ⁵ ከዻምዻ ታታቻን ጊዬይዬ ውር ጌጵሹጋን ጊዬይዬ ፕር ውር ጊታይ ቶኩኔ ጆል ወርቀቴ ፑኡሺሜና ኢየሩሳሌም። ⁶ ታታቻንካ ውርካ ሐና፣ ቀያፋ፣ ዮሐንስ፣ እስክንድሮሴ ኤዳንካ ታታቻንካ ውርካ ቃሼ ፓይላ ጌዬና ኦይን። ⁷ እንግንዻ ሪባ ጫቃን ጊዬይ ጴጥሮሴ ዮሐንሴ፤ ሺጝ፤ ይን የኣሽክቶጝ ሃኬ ቁዋቅቲካ ኦዬ ከሮጝካ ኒኔ ጋንሼና? ⁸ ከሹ እን ጴጥሮስ ቋቁሼ መንፈስ ቅዱሴ ዋይሼ እንግን እያጝ፤ እየው ታታቻንካ ዛርሲዬ ጌጵሹጋን ዮ፤ ⁹ ሹጝ ናንዳካ ዋድማ ሹቃ እን ጋሽክሼ ውር ኤላጝ፤ ባይሼ እያን ሃኬና የኣንሺንቴያጝ፤ ¹⁰ እየው ከእን የሮይቶጝ፤ ዬ ባሪዮ እን ቲትኬ ኣርሼን ክያኑጝ ከእንካ ናዝሬቱጝ ከሮጝካ ኢየሱስ ክርስቶስ ባይሼዬ ዾሬ ማሪ ጉዩ ክያኑጝ ኣይን እየዌ ውርካ እስራኤሌ ፓይላ ካጊባጅባ እዕጝ። ¹¹ እንግንዻ ሺጝ፤ [እየው ጊታጝ ውር ጊታይ ፓልሲኔ ጆል ባይ ቦውዮጝ የኣያ ባይ እን ውይ ሹቦ ዽንቂ ዽንቁጝ]፤ ¹² ኦይ ቃንጳሞ ማሬ ኣኔኑጝ ውር ክየምጵንዻ ጌይኬን፤ ካባይሽባዬ ከኦካ ሮጝ እንቃዬ ዛርሲ እንቃ ሮጝ እንቃ ኣኔኬን ከፎላ ዱቡ። ¹³ ውርዻ ሹ እን ጴጥሮሴ ዮሐንሴ ሃሳውኔኬ ሾያሞዬ ጌዮጝ፤ ጊባጃ እን ማሬ እርርኔኔ ጋዬ ውርካ ማሙጝ ጎሺያ፤ ጶቅሲያ እን ጋዬኬ ኢየሱስዻጝ። ¹⁴ ውር እን ባይሺሾጝ ዾርኬ እንግን ኦይኔ ናንዳካጝ ጌዮጝ ካርሲያ ክያጃ እንካ ሃሳዎጝ። ¹⁵ ዬ ካቡሌ እንግን ከኦካ ሌሜንካ ካራሙጝ ሜይሼያ ውር፤ ጩዋ ቆብኬ ጋጝ ክየምጵኔ ሃሳወና፤ ¹⁶ ሃሳወና እያጝዻ፤ ኣኪ፤ ካሻም እያን ውራን ጊታጝ? ውር ጊታይ ቆቤን ኢየሩሳሌም ፓዩጝ ጊባጃ ኦኬ ሹቃ እን ጋሽክዬ ከቡዋ ጊዬዩጝ፤ ዬ ሃቻሊያኬን ይጝ ሱዲዬን፤ ¹⁷ ካኣይባዬ፤ ክያጃጝ፤ ካርሲኬ ጋኔ ሳጊ ካማሬ ኦካ ጫቃንካ ዛርሲ ጌጳዽዬኑጝ፤ ውራን ጊታጝ እንቃ ካማር ክየምጵንዻ ሜይሼኔ ኣጅሺሽ እንግንባ። ¹⁸ የሺዋያ እንግንዻያጝ ጩዋ፤ ክየምጵንዻ ካማርኬ ሮጝካ ኢየሱስ ሃሳውኔኔ እርርሲኒኔኔ ሜይቴ እንግንባ። ¹⁹ ዬ ጴጥሮሴ ዮሐንሴ ዋይሼ እንግን እያጝ፤ ከኦካ ባሪዮ ሳጊ ካዋይቴ ክያጃ ጉዩጝ ከኦካ ሌሜንካ ባሪዮ ካሁሉኩሾጝ ይንዳ እየው ኮምቴዬ፤ ²⁰ እን ኡዋው ሃጌይቴዬ ሃዋይቴዬ ናንዳካ ሃሳወን ሃዋክቴኬን ሁር። ²¹ ፕር እንቃ [ቦውዬ እንግኑጝ] ጩዋ ጌቼያ እንግን፤ ናንዳካ ኦ ዛርሲ ፓይላ ናንዳካጝ ኣኒኔ ባሪዮ ጎሺዬኑጝ ካኒ ቻሊኬን ጋሊንሺዬን። ²² ውር እን ባይሺሼ ከኦካ ሹቃ እኑጝ ቦን ኔኒ ሃኬ ኦይታም ዼግ። ²³ ቡሌ ጴጥሮሴ ዮሐንሱጝ ጩዋ ዋካ ሃምካ ውር ጊዬዩጝ፤ ሜይሼያ እንግን እን ታታቻንካ ውርካ ቃሼ ጌጵሹጋኔ ዋይሼ እንግኑጝ ፓይላ ክያጃ። ²⁴ እንግንዻ ከሹ እን ዋዬ እኑጝ ሻምሼ ናቅዲ ጊዬይ ክየምጵን ሃምካ ባሪዮ ዼጌ ሺጝ እያጝ፤ ሌሞ ታቹጝ ዮ፤ እን የሙኒያ ፎላዬ ዳሊዬ፤ ኛፓሴ ከጊታይ ቆቤን ቱዎጜ ፓይላ፤ ²⁵ ከታካ መንፈስ ቅዱስ ከቶካ ውርካ ዋድማ ሹቡጌን ጉዋዩ ዳዊት የሺጚ እያጜ የሃሳውያ፤ «ዛርሲ ሃናንዳካ ኦ ናሹጜኬ ማኒቱጝ? ዛርሲካ ሃናንዳካ ኦ ቻልክምኔ ማም እያይኑጝ? ²⁶ ታታቺካ ዳሉጝ ጉሪያ፤ ታታቺካ ፔኑጝዻ ፑኡሺሜና ክየምጵን፤ ከኦካ ታቺ እጝ፤ ፑጪሼያ ጊታይ ጵሾጝ። ²⁷ ከኣኩሉክዻ ሄሮድሴ ጲላጦስ እንካ ጲንጥዮሴ ከኦካ ዛርሲዬ ከዛርሲካ እስራኤሌ ኦካ ከተማጝ ፑጪሼያ ውዋ እጝ እን የጵሾጝ ቻልክምኔን። ²⁸ ይንዻ ኣዮጝ ሃኬ ክንዲ ኑኑዬ ከክያጃ እን የቱሙዮጝ ካሙኒኖጝ። ²⁹ ጋንዻ ታቹጝ ዮ፤ ቶይባ ቦውንታ ጉዋዩ፤ ውርካ ዋድማ ኑኑዻ ካቻሊዬ ክያጃ ኑኑ ከሾያሞ ካሎን ክሊዬኑጝ ሻም እንግንባ። ³⁰ [ጃክፓ] ቡዋ ኑኑ ናንዳካ ባይሺኔን፤ ከሮጝካ ውዋ እን ኢየሱስ ሻምባ ኦኬ ሹቃ ሹቃ። ³¹ ይሁኖጝ ጩዋ ራቅና ጋኖጝ ሁቡቤና፤ እንግን ፓይላ ቆቃ ከመንፈስ ቅዱስ፤ ሃሳዋ ክያጃካ ባሪዮዻ ከሾያሞ። ³² ጊታይ ኣምኒኬ ሻንዻ ፓይላ ኣምኒያ ከሻን ክየሜ ቃቦዬ፤ ጊታይ ጊዬይ ኣኖጝ ፓይላ ማቲያ ከጋጝ ዬ ውር ኬና ሻሚ ሆድማሞ ኔኒዻ ካኔኒጵኔ ኮሙጝ ካኒ ኣኔኬን። ³³ ሐዋርያታንዻ ናንዳካ ናሹጜንካ ኢየሱስ ታቺ እኑጝ ከቁዋቅቲ ታቺ ክሊኔን ካርሲያዬ፤ ከኦካ እንግን ፓይላ ኣና ኣይኔን ታቺ። ³⁴ ከኦካ ጫቃን ጊዬይዻ ውርካ ጋሎ ክየምጵንዻ ኣኔኬን፤ ናንዳካኦ ኣይን ዳሉጝ ካጝ ኣኔ ቶኦዻ ኡዋሩጙሽ ፓይላዬ ቦፓይኔ ኣንቲቲዬ፤ ³⁵ ኣጁጝ ኦካ ጃፍካ ሐዋርያታኔ ውር ክየም ክየም እጝ ዎሺሽ እንግኑጝ ጋኔን ካሺሼን። ³⁶ እን ኡፔን ቆጵሮስ ኣና ውርካ ሌዊ ኬና ሺጜ ዮሴፍ፤ ሐዋርያታንዻ ዋይሼ እሺ በርናባሴ ሺዋ፤ ሆኮል ኔኒዻ ሃኬና ሺጜ ውዋካ ቁዋቅትሺሼን፤ ³⁷ እሺዻ ኡዋሩጙሽ ዳሊ ኔኒዬ ቢሬ ኔኒ ኩኔ ኣጁጛ ኦካ ጃፍካ ሐዋርያታን።