ሃፑክ 3 ጴጥሮስ ባይሺሻ ውር ኤላ እን ይሁኔ ጆሉጝ ¹ ሹ ክየም ጴጥሮሴ ዮሐንሴ ከሹካ ይሁኔን ከዋዳ ሰዓት ሰል፤ ጋኔን እያጝካ ቶኦካ ይሁኔን ፓዬን። ² ከኦካ ውር ጊታይ ሻወ ጆል ሃምካ ቶኦካ ይሁኔን ካይሁንቴ ኦኬዬ ሹ ጮል ውር ዼቴ ኣጁጜ ኦሹቃ እን ሺጜ ኦካ ሃፑካ ሁሉኩሼንካ ቶኦካ ይሁኔን ውር ኬና ካርሲኬ ኦባ ጅሼዬ ኣይ ኤላ፤ ³ እሺዻ ጴጥሮሴ ዮሐንሴ ሻው ሃምካ ቶኦካ ይሁኔኔ ጌዬ ይወና ኦኬ። ⁴ ጴጥሮስዻ ጋይ እሲዬ ዮሐንሴ ሁቤኔ ቶይ ሃሚን ኔኒዬ ሺጝ፤ «ይንዳ ሁቡንቴ ቶዬ ዮጝ ጉዋዩጝ። ⁵ ውር እንዻ ቃቢኬ ኦኮኑጝ ካጌዬኬ ኦግዬይ ኦኬ ክየሜ ሁቤኔ ቶያ እንግን። ⁶ ዬ ጴጥሮስ ሺጝ፤ ኣን ሃኣኔኬን ቢሬዬ ወርቄዬ፤ ኣይባዬ እን ኣኔን ኦናኑጝ ሃኣይ እንባ፤ ከእንካ ናዝሬት ከሮጝካ ኢየሱስ ክርስቶስ ናሹጜ ጃሌ ጆልባ ከጃፍ ኑኑ፤ ⁷ ጎም ቡዋ ኔኒ ቡዎንዻዬ ቲታ፤ ይሪካ ጃፍ ኔኒዬ ቶንጉሌ ቁዋቅትሻ፤ ⁸ ኣሼንዻዬ ዾራ ቲፍ፤ ካርሲያ ጃሌንዻ፤ ኩይሼ እያጜ ዮጜ ኣሼኔ ጆልዻዬ ጎሺ ባሪዮዬ ሁሉካ ከእንግን ሃምካ ጳልካ ቶኦካ ይሁኔኑጝ። ⁹ ዛርሲዻ ፓይላ ከሹ እን ጃሌዬ ጎሺዬ ባሪዮዬ ጃሌጆሎዬ ጌዮጝ፤ ¹⁰ ሺጝ ውሩጝ እባ ከሌሜን ኣዬ ውር እን ኡፔኔ ጆል ኦይካ ሃፑክ እንካ ቶኦካ ይሁኔን እን ሺጜ ሹቃዬ ይሁኔጆል ኦኮጝ ጊባጃ፤ ከእን ናሹጝኬ ዳቢ እን ሙኒሼ እሹጝ ቋቁሻ ጎሺዬኔ ዻዹግኔኔ። ¹¹ ውር እንካ ይሁኔንዻ ባይሺሾጝ ኣኔንባ ከጴጥሮሴ ዮሐንሴ ከጋጝ ኡፔ ካሊዬኔ፤ ዛርሲ ፓይላ ከዻዹጝኔን [ከሃምካ ዋኬ ጆሌንካ ሰሎሞን] ጉኬ ፓያ ሃምካ ራቅ እን እንግን ጋኖጝ። ¹² ጴጥሮስዻ ከሹ እን ጌዬ እኑጝ ዋይሼ እንግን እያጝ፤ ዛርሲካ እስራኤል ዮ፤ ሃናንዳካኦ የጎሺቴ ይኑጝ? ፕር ከቁዋቅቲ ጉዋዩ ወይ ከጫንቃል ኣዬን ጉዋዩ ውሩጝ ባይሼ ካጃላጆሎጝ ከእያይ ሃሻምቶጝ ከኳሜን፤ ሃናንዳካኦ የዋሺቴ ዮጝ ጉዋዩዬ የቶይቶጝ? ¹³ ኣምላካ ባባን፣ ካኣብርሃም፣ ካይስሐቄ ያዕቆቤ ጌጳሲያ ኢየሱስ ውዋ እን፤ ዬ እየው የሳስክዬ ኣይናያ ሃምካ ኣርሼኑጝ፤ ጲላጦስ ዎሺኒን ቡሌኑጝ ዬ እየው የቡዲያያ ኦካ ማሪ ኔኒ፤ ¹⁴ እየው ጊታይ ኣይካ ይሁኔኔ ጫንቃላኔ የቡዲያዬ ውር እንካ ኒሽ ናፍሱጝ ካቡልሼ እየው የይሁናያ፤ ¹⁵ የኒሻያ እን ኣይ ኦካ ዻቆ ጌዬኑጝ፤ ዬ ባሪዮ ቲታ ከኦካ ኣርሼን ኡዋዻ ሃኣያ ማኝካ እዕጝ። ¹⁶ ውሩጝ የቶይቶዬ የእባጅቶጝ ቁዋቅሾጝ፤ ሃኬ ሮጝካ ኢየሱስ ኤርሚኔን እን ጌዬኬ ኦኔኒዬ። ¹⁷ ኣይን ጋኑጝ ጪኒጌን ናኒዮ፤ እየው የሻምቴ ይኑጝ ከውር ታታቻን ፓይላ የማርቴ እባጅቴኑጝ ሃእባጃያ። ¹⁸ ዬ ባሪዮ ክርስቶስ እን ኣይ ኔኑጝ ካጌዬ ጋሎጝ ሌምሼ ክያጃ ከውርካ ቶካ ባሪዮዋን ፓይላጝ ሙኔና። ¹⁹ ኣኪ፤ ካሺዕሺሼ እየው ሴሶ ጉዩጝ ሁሉክ ይሁኔን፤ ከኦካ ጉዋር ጉዩዻ ዋክባ፤ ከኦካ ታካ ታቺ እኑጝ ቦን እንካ ሃሊ ማቲዬን ኩንሼ እየውባ፤ ²⁰ ፕር ክርስቶስ እን ከሌሜን ኣይሼ እየው እሺዻ ይዕሲሼ እየውባ ኢየሱስ። ²¹ ባሪዮ ሌምሼ ከእያባ ሃሳወ ከውርካ ቶካ ባሪዮጝ፤ ኦኬ ፓይላ ሌይ ሃምካ ቦን እንካ ሄክሺሾጝ፤ እሺ ካኡፉኔ ፎላ ዾዮኩጝ ኣኔባ። ²² ሙሴዻ ሺጛ እያጝ፤ ኣምላክ ታቺ እጝ ከኦካ ጫቃን ጉዩ ከኣን ውርካ ቶካ ባሪዮ ኣኔኬኔ ቲቲሽባ እየው፤ እን እሺ ሜይሼ እየው ፓይላ ዋይባ፤ ²³ ይጝ ናፍሲ እን ማርሼ ውርካ ቶካ ባሪዮ ዋዬኑጝ ካጌዬኬ ኦካ ጫቃንካ ዛርሲ ዋናዬ ካካይባ። ²⁴ ከኣኩሉክ ካርሲኬ ሳሙኤሌ ሌይ ኣይ ውርካ ቶካ ባሪዮ ጊታይ ናሹጙጝ ፓይላ ናንዳካ ሹዋን ጊታጝ ሃሳዋ። ²⁵ እየውዻ የኣያ ሃንታካ ውርካ ቶካ ባሪዮ፤ ፕር ባሪዮ ዋይሼ ኣብርሃም፤ ከቢዛ ኑኑ ሃኡዋኒባ ውርካ ዳሉጝ ፓይላ ሺጜ እያይኔ ቃቦ እን ሁሉኮጝ የኣያ ጊታኬና ካዎርምንቴ። ²⁶ ባሪዮ ከሹ እን ቲቴ ውዋ እኑጝ፤ ካዋሻ ኡዋኔ እየው ክየም ክየም ከኦካ ጋራ ኣዬን ጉዩጝ ሌምሼ ይዕሲሼያ ዮጝ ጉዩጝ።