ሃፑክ 6 እድዬንካ ዲያቆናን ሶጳን ¹ ከዋዻ እን ኮሜንካ ውር ጊታይካ ዻይኔን ጁዋኒቲሼ ኩዮጝ፤ ከውርካ ኣይሁድ ጊታይ ፓዬንኬ ግሪኩጝ ጉንዱምሼና ውርካ ኣይሁድ ጊታይ ቆቤን ይሁዳጝ፤ ናንዳካ ኦ ሹ ጮል ካሻም ጊታይ ጋሽክዮጝ ከሄክንሲዬን እን ሙኖጝ ከሃኣጚ ጊታይ ኣይ ውር ጊዬዩጝ ድርግትሼያ። ² ዬ ሐዋርያታን ታጵላማን ፑኡሺ ውርካ ዻይኔን ዶክ ክየምጵኔ ሺጝ እያጝ፤ ኡዋው ሃሺጛ ውር ጊታይ ቆቢ ቾችንሺዬንያጝ ዋድማካ ክያጅካ ባሪዮ ኦይዴን ሁሉኩሼኬን ኡዋው። ³ ዬ ጪኒጌን ናኒዮ፤ ከኦካ ጫቃን ጉዩ ጊታይ ቋቂ ከመንፈስ ቅዱሴ ከኦኬ እባጄኔ ከኣዬን ጊዬይዻ ጊታይ ማኝሺዮጝ እድባ ውር ሶጳ፤ ጌጳሞጝ ሃኣያባ እንግን። ⁴ ዬ ኡዋው ሃቁዋቅትሻባ ከይሁኔኔ ከዋድማካ ክያጃዬ። ⁵ ሺጜን ኔኒ ዋዝንሲያ ኡዋው ፓይላ፤ እድባ እስጢፋኖስ እን ቋቁሼ ከእምነቴ ከመንፈስ ቅዱሱጝ፣ ፕርዻ ፊልጶስ፣ ጵሮኮሮስ፣ ኒቃሮና፣ ጢሞና፣ ጳርሜናዬ እን ሁሉኪ ሃምካ ውርካ ይሁዳ ማቲዬን ኒቆላዎስ እንካ ኣንጾኪያጝ። ⁶ ቦፓይኔ ጊታይዻዬ ቦሼያ ሃምካ ማርካ ሐዋርያታን እንግንዻ ይሁኖጝ ጩዋ ጋይሼያ እንግን ቡዋ ጊዬይ። ⁷ ክያጃካ ባሪዮዻ ጌጳዽዬ ኩያ፤ ጁዋንቲሼንካ ውር ጊታይካ ዻይኔንዻ ከኦካ ኢየሩሳሌም ካሎን ጁዋኒቲሼ ኩያ፤ ከኦካ ታታቻንካ ውርካ ቃሽዻ ጁዋናን ማቲያ ጊታኬና ካዋይሺንቴኬ እምኒኔን። ⁸ ከሹ እን እስጢፋኖስ ቋቁሼኬ ኣይኔኔ ቁዋቅትዬ ከኦካ ጫቃንካ ዛርሲ ኣኔን ኦኬ ባሺባሺ ጊታይኔ ዹዋልሺኔን ሹቃ ጊታይኔ ኣሽክዬን። ⁹ ከኦካ ጊታይ ጌይ ጫንቃል ሹኑክ ጊታይ ሺጜ [ምኩራቤ ሺዎጝ ጊታይ ኣይ ውርካ ምኩራብ ካቃሬናዬ ካእስክንድርያዬ፤ ፕርዻ ጊታይ ፓዬንኬ ሃምካ ጎብሼንካ ኪልቅያዬ ከእስያጝ ቲት ሪብንዾዬ ካርሲያ ከእስጢፋኖስ ዜርሚኔን፤ ¹⁰ ካኣይባዬ ኦኬ እባጄን እን ኣኒኔ ሃሳውኔኔ መንፈሴ ካኒ ቻሊኬን ሪቤን። ¹¹ ዬ ውር ጊታኬና ሺጚ እስጢፋኖስ ከኦካ ሙሴዬ ባሪዮዬ ሃሳው ክያጃካ ይሪኔኔ ሃዋያያ ውር ጊታኬና ሺጚ እያይ ሻማ ከራሼን። ¹² ከዴንታ እጝ ከዛርሲዬ ከውር ጌጵሹጋንካ ፔኔ ውርካ እርርሲኔንካ ሕግዬ ከቲትሼን፤ ጎምሽ እስጢፋኖሴ ቦሼያ ሃምካ ሌሜንካ ካራምካ ውርካ ኣይሁዱጝ፤ ¹³ ሪባ ውርካ ማኛሞካ ሾሮዻ ኬና ሺጝ እያጜ ማኝሺዬን፤ ውሩጝ ከኦካ ራቁጝ [ይሁሺኔዬ] ከኦካ ሕጌ ክያጃካ ይሪኔን ክየምጵንዻ ካኒ ኦይድኬን፤ ¹⁴ ናንዳኦ ኢየሱስ እንካ ናዝሬት ካካይሲዬ ዋድማጜ ካላውጢቴ ጊሎ እን ሃቦቴኬ ኦካ ሙሶጝ ሃሳወ ሃዋያያ። ¹⁵ ጊታይ ቆቢ ኦካ ካራሜ ኣኖጝ ፓይላ ሁቤኔ ቶይ እስጢፋኖስያጝ ማሪ ኔኒ ሙኔን ማሪካ ውርካ ኤርጎካ ባሪዮዬ ጌና።