¹ Ko wassi Yeso aua kobhogha ghɨndɛ ɛnɛ ɔmɔzɔ ko ramma kaarɨ gho, anye nɔgɔ dhɔrɔgi ko gulsasɛ ko miniŋa ko mutanyo. ² Ko nɔnɔ iton nɔgɔ bhaya ko kɛgɛrmɛsɛ tugainesa Tamuo ko kʉrghʉɛ moriso. ³ Ko nɔnɔ osee nɔgɔ: “Ɔzɔ hɔrɔ bhire, mugaɛ, sololya, birisha ko rummi ŋa ayu. ⁴ Ko kessi atʉnʉkʉ uggau gho, atizo ŋanyana ko ŋieti adhotu katamaɛ nyana. ⁵ Ko aji eeza ŋa alakamanʉŋɔ ugga gho, utudhunda teri sɔnɛ ghoo gho wassi ugga adhotu katama nee gho, ko kiye kala adhozinyu nɔgɔ.” ⁶ Ko nɔgɔ ale ko ɔzɔ bhaya olyoge, olyoge ko ɛgɛmɛsɛ kamanna shallɛ ko kʉrghʉɛ eeza ŋietinɛ jaga bhaɛ. ⁷ Ko Hɨrodh gulsaja abag nɔŋa asɨgɛ ghɨnyi jegi bhaɛ amɛ gho. Nɔnɔ azaganɛ gaaji ɨtɨŋgɛ annɛ, “Yohannes Ajʉrɛ ɨŋa rɛza.” ⁸ Ɨŋgɛ annɛ, “Elija wa ujugoge aggi.” Ko ɨŋgɛ annɛ, “Eeza ɔtɔtɔgi nɔŋa Tamuo bhalɨ rɛnɛ wa ɨŋa rɛza. ⁹ Ko Hɨrodh anni, “Anda katɛdha ɔwa Yohannes. Aŋɛnɛ, nyini kasɨnɛ nɔŋi jegi gho?” Ko nɔnɔ adhi ko kijhe nɔnɔ. ¹⁰ Ko wassi eko abhɔdhanɛ gho, nɔgɔ oseye Yeso ghɨnyi wa amisɛ nɨgɛ. Ŋa nɔnɔ ugɛ nɔgɔ ko ulugunye elezɨa ghee ko ɔzɔ katama kanne Bezaɛdha gho. ¹¹ Ko kimsen esheli ŋieti akɔɛ Yeso gho ko ogowi nɔnɔ. Ko nɔnɔ aua nɔgɔ ko osee nɔgɔ tugainesa Tamuo, ko ghɔnɔghɛa adhime kʉrghʉɛ. ¹² Ko kɔr eseshe gho, kobhogha ɛnɛ ɔmɔzɔ ko ramma aʉna ŋieta nɨndɛ ko annɛ, “Iton kimsen olyoge ko ɛndɛ nɔgɔ kesheli ghɨnyi adhakɛ ko ŋietina oŋine, gaaji agga kate ŋieta ɛnɛ dhe.” ¹³ Ko nɔnɔ abhodhe, “Anjete nɔgɔ gii adhakɛ.” Ko nɔgɔ abhodhine, “Agga koloma sololya tʉrshi ko uluge ramma-ŋa ma agga kaya ko kazalana tɨlɛna ɛlɛnɔ ko kimsenyi jegi bhaɛ.” ¹⁴ (ko eeza majɛ ate ŋanyana a shisha tʉr.) Ko nɔ nɔnɔ anne kobhogha ghɨndɛ, “Oseye nɔgɔ ko katizo lʉza kumutɛ kimsene, kimsene eeza ramma ko ɔmɔzɔ ŋieta nee gho.” ¹⁵ Ko kobho bhaɛ immɛ hulley lɛ, ko eeza bhaɛ atizo lʉza. ¹⁶ Ko udhumma sololya ɛnɛ tʉr ko uluge ramma ko ijin tamu daa ko anye Tamu shallisɛ ko heaven up and gave God thanks and udhul nɔgɔ. Ŋa nɔnɔ anye kobho ko keŋerte eeza bhaɛ. ¹⁷ Ko nɔgɔ bhaɛ adhatɔ ko ashaiza, ko kobho udhunda baldhiŋɛa ɛnɛ ɔmɔzɔ ko ramma wa sololyanu adhote. ¹⁸ Ko wassi Yeso ala Tamu odhedhe gho, kobhogha ghɨndɛ ate ko nɔnɔ kaarɨ ko nɔnɔ aghɨn nɔgɔ, “ A kimsen igho annɛ anda kenni gho ?” ¹⁹ Ko nɔgɔ abhodhine, “ Ɨtɨŋgɛ annɛ unda enni Yohannes ajʉrɛ; ɨŋgɛ annɛ a Elija ; ko ŋanɨ shi ɨŋgɛ annɛ, eeza ɔtɔtɔgi nɔŋa Tamuo bhalɨ rɛnɛ ɨŋa rɛza rɨgɨnɛ.” ²⁰ Ko aghɨn, “Ŋa ugga annu anda kenni ŋɛnɛ ?” Ko Betros abhodhe, “Unda enni Kiristoja Tamuo.” ²¹ Ko Yeso aghowe nɔgɔ ko ŋa osine ʉtʉmma nɔŋi jegi. ²² Ko nɔnɔ anni, “Dhola Eezo ma abirna ghɨnɛji mele agɛjhɛ eeza matɛ, ko gɔldaiza ɛnɛ gulsen ko dhemɨoga ko dhɛmɛnɛsa Musee, ko nɔnɔ ma kagazɛ ko gonyasɛ ɛnɛ iyo gho ɨŋa rɛza.” ²³ Ko nɔnɔ anne nɔgɔ bhaɛ, “Aji ʉtʉmma adhi kɔgɔwa anda gho, nɔnɔ ma agɛŋa ɛlɛa nɨndɛ ko ɔlɔ teleja nɨndɛ didi ko agobha anda. ²⁴ Ghɔnɛa adhi ko kamazuz rʉghɨsa nɨndɛ gho kɨdhɨ akolio, ko nɔ ghɔnɛa adhi kokoli rʉghɨsa nɨndɛ ŋietaji nande gho kɨdhɨ arghɛ. ²⁵ Agino shallɛ ŋieta eezo ko kɔlɔmɛ lo biŋgili, aji unda ɛlɛa nunde ɔyɔmɛ dha ilyoŋ gho? ²⁶ Aji ʉtʉmma adhak liya ŋieta nande ko nɔŋɛ ghande gho, Dhola Eezo kɨdhɨ ko nɔnɔ adhak liya ŋieta nɨndɛ wassi nɔnɔ akʉna dhɔrɔgɨsa nɨndɛ gho ko dhɔrɔgɨsa Majunɛ gho ko ɛzɛ ko ekoshi ghɨndɛ gho. ²⁷ Anda kosɨnʉŋ ugga dhereshi, ɨŋgɛ iyaa alɛ ŋietei kɨdhɨ ŋa azarese rɛ woyi nɔgɔ ŋa kijhɛzɔ tugainea Tamuo gho. ²⁸ Ko wassi Yeso ɔsɔa ghɨnyi jegi bhaɛ gonyasɛ ɛnɛ tʉrge gho, nɔnɔ udhumma Betros, Yohannes ko Jɨmes ko ɔzɔ kutula da ko kalai Tamu. ²⁹ Ko wassi nɔnɔ ala Tamu gho, ijheinesa ko ŋuma nɨndɛ ko rummiza ghɨndɛ uzuguye ko abhadhi hulla dhuajɔ. ³¹ Eeshi ɛnɛ ramma, Musee ko Elija, ³⁰ Nɔgɔ ajuganɛ hɔrsɛza ko shallizenda ko aliye ko Yeso, nɔgɔ aliye nɔŋa kɨdhɨ arinɛ nɨnɛ ko ibhisɛ Yerusalem. ³² Ko Betros ko eeza ate kaarɨ ogio, ko wassi nɔgɔ ɨŋanɛ gho, nɔgɔ ijhese dhɔrɔgɨsa nɨndɛ ko eeshi ɛnɛ ramma alɛ ko nɔnɔ kaarɨ. ³³ Ko wassi eeza adhɔtɛ Yeso gho, Betros anne nɔnɔ, “Eeza abbo, a shallɛ ko agga katiya ŋaii. Kɛnɛ aggi kimisa keii ɛnɛ iyo ko odhe kiye iya nunde, odhe kiye iya Musee ko odhe kiye iya Elija.” (ko nɔnɔ ŋa aghaɔ gii nɔnɔ ɔsɔa gho.) ³⁴ Ko wassi nɔnɔ ŋanɨ ali gho, idho ujuga ko ughumma nɔgɔ, ko nɔgɔ ɔzɔŋɔldɛ ɔrrɔ wassi nɔgɔ atʉnʉke idho tɔ gho. ³⁵ Ko uzu akʉna idhoa tɔ, ko anni, “Nyini a Erruja nande ghɔnɛa kabhɛrani nana; ɨsɨgɛ nɔnɔ.” ³⁶ Ko wassi uzu adhizɛ gho, nɔgɔ ijhese Yeso aɛ odhedhe. Ko kobho olomi nɔŋi jegi nɨgɛ kɔdhɔ, ko eeshi adhime ko koseye wassa nyana anjoni, wassi nɔgɔ ijhese gii nyana gho. ³⁷ Ko wassa ʉmmati, wassi nɔgɔ aʉna kʉtʉla da gho, kimsuja abbɔrrɔ utummo ko nɔnɔ. ³⁸ Ko eeza aɛ kimsuja tɔ awɛ, “Dhemiogi, anda kalai unda ko shin erruja nande, nɔnɔ a erruja nande odheshi. ³⁹ Ko kʉlɔja minindo akʉna ŋieta nɨndɛ ko arr; ko nɔnɔ adhoyaɛ ko dhohu akʉna uzuga. Ko kʉlɔja minindo ŋa adhimmio ko kɔdhɔdhɔ nɔnɔ, adhi ko kɔyɔm nɔnɔ. ⁴⁰ Anda kala kobhogha ghunde ko karte bhay, ko nɔgɔ ŋa ɔjan ⁴¹ Ko Yeso abhodhe, “O eeza ŋa ayewino ko eeza yewi anjoni ko birshi nyini,” Aŋino anda kɨdhɨ katiye ko ugga ko kerinyɛzɛ da ko ugga gho ? Ɨzaɛ erruja noo ŋii.” ⁴² Ko shɔ wassi erru akʉna gho, miniŋi ujuge nɔnɔ lo dhɔainda. Ko nɔ Yeso ara kʉlɔja minindo ko ʉrghʉ erru ko obhodhe baba nɨndɛ. ⁴³ Ko nɔgɔ bhaɛ awashie magasɛza Tamuo. Ko eeza bhaɛ lemunde ghɨnji amɨ Yeso, ŋa nɔnɔ iye kobhogha ghɨndɛ, ⁴⁴ “Ɨsɨrari jʉʉrʉ nɔŋi kɨdhɨ kosekʉŋ nana ugga gho: Dhola Eezo kɨdhɨ ka ko kazaline aɨɨnɛ eezu gho.” ⁴⁵ Ko nɔgɔ ŋa asɨnɛ gii ali gho kazi a ŋieta kaninɛ gho. ko kulugunye nɔgɔ ,ko nɔgɔ ŋa asɨnɛ, ko nɔgɔ ɔzɔŋɔldɛ ŋietaji ka kighɨnde nɔnɔ nɔŋi jegi. ⁴⁶ Ko kɛnyani esegeyaɛ ŋieta kobhoghu ko iyɛzɔ ŋieta nee gho aŋɛnɛ kɨdhɨ abbo gho. ⁴⁷ Ko Yeso, agha nʉŋgo ezedhinesha ghee, ko udhumma erruja kiteli ko mii nɔnɔ kizili kanja nɨndɛ gho. ⁴⁸ Ŋa nɔnɔ iye nɔgɔ, “Ghɔnɛa lemuna errushi kiteli nyini saarɛ ghande gho, aɛ nʉŋgo elemunana anda; Ko ghɔnɛa elemunana anda gho aɛ nʉŋgo elemuna iyaa odheshi bhalɨ itonana anda. Ko ghɔnɛi aɛ hurto ŋieta noo gho bhaɛ nɔnɔ aji abbo ŋieta noo gho” ⁴⁹ Ko Yohannes anne, “Eeza abbo, aggi kijhesa utumma ara miniŋa saarɛ ghunde gho ko agga kadhima ko kalanda nɔnɔ, gaaji nɔnɔ ŋa ɛnɛ eeshi katiya ko agga” ⁵⁰ Ko Yeso anne, “Ŋa alamu nɔnɔ, ghɔnɛi ŋa aghejuŋɔ ugga gho ŋaɛnɛ iya noo.” ⁵¹ wassi saatija nɨndɛ kakote tammua da iye ɔjhɔnɛ gho, Yeso adhi ko kug Yerusalema. ⁵² Ko nɔnɔ iton itonda woyi, iyaa ayɛ ɔla Samaria gho ko kimɛ ghɨna ko kerei nɔnɔ. ⁵³ ko nɔ eeza ŋa elemunanɛ nɔnɔ, gaaji nɔnɔ wa ako Yerusalema. ⁵⁴ Ko wassi kobho Jɨmes ko Yohannes ijhese nɔŋi jegi gho, nɔgɔ ighindo, “Alan, unda adhime ko agga kuzuya go tamua daa ko kigiya ko kɔyɔm nɔgɔ?” ⁵⁵ Ko nɔ Yeso ukɛ ko ururuman nɔgɔ, ⁵⁶ ko nɔgɔ ɔzɔ ɔla ʉmmati. ⁵⁷ Ko wassi nɔgɔ awɔyɛ goŋgua gho, ʉtʉmma anne nɔnɔ, “Anda kɨdhɨ kaghobhi unda ŋietinɛ akʉɛ nunde gho. ⁵⁸ Ko Yeso abhodhe, “Bɛtɛn ɔlɔmɛ bolken ko kalɛa aɔyɛ dhanya ɔlɔmɛ keyi, ko nɔ Dhola eezo nyini ka kɛghɛdhi ɔwa nɨndɛ.” ⁵⁹ Ko nɔnɔ anne ʉtʉmma, “Kɔwa anda.” Ko nɔ eeshi nyana abhodhe, “Alan, kɛnɛ anda woyi kug ko kɔbhɔg baba nande.” ⁶⁰ Ko Yeso anne nɔnɔ, “Kɛnɛ rɛ kɔbhɔg rɛ mandinya, ko nɔ ugga ɔzɔ ko ali tugainesa Tamuo.” ⁶¹ Ko ŋanɨ ʉmma anni, “Anda kɨdhɨ kaghobhi unda, Alan, ko nɔ woyi nɔ anda kug ko kobhodhe eeza ghande.” ⁶² Ko Yeso anne, “Ko ghɔnɛi uluguny aɨɨna ghɨndɛ ko ajin hurtin gho, nɔnɔ ŋa kɨdhɨmo tugainesa Tamuo.”