¹ Ko wassa ʉmmati, Yeso uzunu katama ko olyo ko ali kamanɛna shallɛ ko tugainesa Tamuo. Ko kobhogha ghɨndɛ ɛnɛ ɔmɔzɔ ko ramma ate ko nɔnɔ kaarɨ, ² Ko tɛra ɨŋgɛ rɨgɨnɛ iyaa wa kʉrghʉ kʉlɔshanɛ miniŋu ko mutanyoge: Mariam (iya kane Madhalin) ghɔnɛa wa kara miniŋa turgɛrɛ; ³ Jɔanna tɛruja Sʉza, ko eeza abhɛg ghɨna ko kessa Hɨrodhi gho; Susanna; ko iya ɨŋgɛ mele. Tɛraɛ jegi adhime ko kɛlda nɔgɔ birishanɛ ghee gho. ⁴ Ko wassi kimsena mele amugɛ ko eeza aʉna ŋieta Yeso hʉrr katamɛnɛ gho, nɔnɔ osee nɔgɔ kalishi jegi: ⁵ “Ko eeza aghoye ayɛ ko kasaji dugua ghɨndɛ. Ko wassi nɔnɔ asaj dugu gho, ɨŋgɛ inonone gaŋgu: Ko eeza ozoi dugunɛ ko kalɛ adhagi nɔgɔ bhaɛ. ⁶ Ɨŋgɛ inonone tabhar, ko wassi alinanɛ gho, irɛzɔ gaaji nɔgɔ ŋa ɔlɔmɛ maa. ⁷ Ɨŋgɛ inonone bhɨla tɔ, ko wassi alinanɛ gho, uru shiroje ko ŋanɨ ŋa alɛ. ⁸ Ko ɨŋgɛ inonone bhɨlɨnda shallɛ. Ko alinanɛ jʉʉrʉ, ŋii eeza tʉr kijara dugua wa kasaji.” Ko wassi ɔsɔa ghɨnyi jegi gho, nɔnɔ awɛ, “Ghɔnɛa ɔlɔ ɨzani ko asɨnɛ gho, kɛnɛ nɔnɔ kɨsɨgɔyɔ.” ⁹ Ko kobhogha ghɨndɛ aghɨnye nɔnɔ kalyi nyini ɔsɔa gino. ¹⁰ Ko nɔnɔ anni, “Ghʉrghʉrisa ɛnɛ dhere ko tugainesa Tamuo wa kanjʉŋ ugga, ko nɔ ɨŋgɛ kosee kalizɛ, ko, “Ko nɔgɔ kijhɛzɔ, ko nɔ nɔgɔ kɨdhɨ ŋa ijhese, ko kɨdhɨ nɔgɔ isirarje, ko nɔ nɔgɔ kɨdhɨ ŋa asɨnɛ.’ ¹¹ Jegi a nɔŋi ɔsɔa kalyi nyini gho: Dugu a nɔŋa Tamuo. ¹² Ko ɨtɨŋgɛ adhito dugua inonone gaŋgu dhe. Nɔgɔ asɨnɛ dhɛmɛnɛsa Tamuo, ko nɔ miniŋa aʉna ko kimise nɔgɔ nɔŋa gerre ko ŋa ɛzɛjhɛ nɔŋa, ko nɔgɔ ŋa ayɛbhɛ nɔŋa Tamuo ko kʉrghʉi. ¹³ Ghɔnɔghɛi jaga ate bhɛyɔ gho, a ghɔnɔghɛji alakamanɛ nɔŋa lemunenda wassi nɔgɔ asɨnɛ gho, ko nɔ nɔgɔ ŋa ɔlɔmɛ sɨnda. Ko nɔgɔ ayɛbhɛ bhus hʉŋ, ko saatija kilawesɛzɛ gho nɔgɔ itazɔ. ¹⁴ Ko dugua inonone ŋieta ɛnɛ bhɨla a iya ko eeza asɨnɛ, ko aji nɔgɔ ayɛ gho, gaŋgua nee ko rʉgisa kalɛnɛ, ko enine bhozoro, ko kelemunene, kobhojhaɛ lo ko nɔgɔ ŋa adhuŋa kɛɛrɛ. ¹⁵ Ko nɔ dugua inonone bhɨlɨnda shallɛ alinone ghɔnɔghɛa ɔlɔmɛ ŋɔla ko sɨnesɨa shallɛ, iyaa asɨnɛ nɔŋa, ayɛbhɛ, ko adhuŋanɛ kɛɛrɛ. ¹⁶ Eeshi ka kezeriny lombo ko kuluguny dha kerre alga tɔ anjoni. Ŋietaji, ɛndɛ nɔnɔ ka kerrine ŋieta aŋanɛ, ko ɔlɔ eeshi aʉna gho kojoya lombo. ¹⁷ Ko ghɨna ulugunye bhaɛ kɨdhɨ elyayɔ. Ko ghɨna ulugunye bhaɛ kɨdhɨ kaghaɔ ko eeza ijhese. ¹⁸ Ɛzɛr jʉʉrʉ gii isirari gho. Ko eeza asɨnɛ jʉʉrʉ gho kidhɨ ajɔa ɔrrɔ. Ko ghɔnɔghɛa ŋa asɨnɛ jʉʉrʉ kidhɨ akoliye gaa ɔlɔmɛ. ¹⁹ Ko yaya Yeso ko ghɔzɔnɔghɛ aʉna ko kijhɛzɔ nɔnɔ ko nɔgɔ ŋieta aʉnanɛ anjoni gaaji kimsen a mele. ²⁰ Ko ʉtʉmma osee nɔnɔ yaya nunde ko ghozonoghu jaga alɛ bhaya gho, adhimiŋɛ unda. ²¹ Ko nɔnɔ abhodhe, “Yaya nande ko ghɔzɔnɔgha a eeshi asɨnɛ nɔŋa Tamuo ko adhɔlyɛ didi gho. ²² Ko wassa ʉmmati Yeso anne kobhogha ghɨndɛ, “Kɛnɛ kabhatɛ yirseni tanda. Ŋa nɔgɔ ʉtʉnʉge goŋgul ko abhatɛ tanda.” ²³ Ko wassi nɔgɔ uguluye gho, nɔnɔ oŋo. Ko ŋɔza abbɔrrɔ akʉna ko ushuku goŋgul, ko nɔgɔ ato rɛza. ²⁴ Ko kobhogha ghɨndɛ iza ko ɨtɨŋgaɛ nɔnɔ, ko annɛ, “Eeza abbo, Eeza abbo, agga kugudhandɛa !” Ŋa nɔnɔ ɨŋa jɨna ko alam ŋɔss ko maa ugulanyɛ; ko ŋɔss azaganɛ yirseni aʉ hʉŋ.” ²⁵ Ko nɔnɔ aghɨn kobhogha ghɨndɛ, “Yewisa noo ŋaŋa? ” Ko nɔgɔ ighɨndo nɨgɛ kɛŋa toŋolinda ko washienda, “Aŋɛnɛ nyini alam ŋɔss ko maa gho, ko nɔgɔ ɔzɔŋɔldɛ nɔnɔ.” ²⁶ Ko nɔgɔ uguluyo ɔzɔ katama Gerasenes gho, ghɔnɛa kabhake yirsenda Galila gho. ²⁷ Ko wassi Yeso abɔrta bhay gho, nɔnɔ utumo ko eeza ɔlɔ miniŋa katama tɔ. Ŋieta bhalɨ rɛnɛ eeshi nyini ŋa ɔlɔmɔ kotinyenyi abhure dha abhaghɔ kessa, ko nɔ abhak bolkua tɔ. ²⁸ Ko wassi nɔnɔ ajɔa Yeso gho, nɔnɔ alu ɔrrɔ ko ajʉk lo sɔnɛ ghɨndɛ gho, ko arr ɔrrɔ, “Unda adhimi gino ŋieta nande, Yeso, Dhola ko Tamua abbo ? Anda kalai unda, Ŋa iminaŋa anda !” ²⁹ Ko Yeso osee kʉlɔja minindo ko kubhunda bhay ŋieta eezo. Ŋieta bhalɨ rɛnɛ aluganaŋɛ anda, ko nɔnɔ ote miniŋa ŋieta eeza anjoni gho. ³¹ Ko Yeso aghɨn nɔnɔ, “Saara ghunde kanne ŋɛnɛ ?” Ko nɔnɔ abhodhe, “Legion” Gaaji miniŋa mele ʉtʉnʉge nɔnɔ. ³⁰ Ko nɔgɔ alai nɔnɔ ko ŋa iton nɔgɔ ŋieta ɛnɛ ʉtʉre gho. ³² Ko kɔrga showenu abbɔrrɔ agheine aɛ kuruga ŋanyana. Ko miniŋa alai Yeso ko nɔgɔ kɔzɔ ŋieta showenu, ko nɔnɔ iye kɔzɔ. ³³ Ko wassi miniŋa abhunanɛ bhay ŋieta eezo gho, nɔgɔ ɔzɔ ŋieta showenu, ko showen eresha kudhumsɛza ko ɔzɔ yirsenda, ko ugudhandɛ bhaɛ. ³⁴ Ko wassi eeza abhɛkɛ shɔwɛn ajɔanɛ gii amɛ gho, nɔgɔ ereji rɛna ko koseye katamɛn nɔŋi jegi, ³⁵ Ko eeza iza ko kijhɛzɔ gii amɛ gho. Ko wassi nɔgɔ aʉna ŋieta Yeso gho, nɔgɔ ijhese eeza bhalɨ ɔlɔ miniŋa, aɛ sɔnɛ Yeso gho ko miniŋa arjaɛ, ko amalkɛ azaja nɨndɛ gho; ko nɔgɔ ɔzɔŋɔldɛ. ³⁶ Ko eeza wa ayɛ ijhese gii amɛ gho, ɔzɔ ko oseye ghɔnɔghɛ nɔŋa abhunanɛ miniŋa ŋieta eezo ko kʉrghʉɛ. ³⁷ Ko eeza bhaɛ loja Gerasene gho ighɨne Yeso ko kɔdhɔs nɔgɔ, gaaji nɔgɔ ɔzɔŋɔldɛ ɔrrɔ. Ko nɔnɔ ʉtʉnʉg goŋgul tɔ ko ʉga. ³⁸ Ko eeza wa abhunanɛ miniŋa ala nɔnɔ ko kozoi ko nɔnɔ kaarɨ, Ko nɔ Yeso iton nɔnɔ, ko anne, ³⁹ “Bhɔr ɔlɔ ko osee eeza gii amɨni Tamu unda gho.” ⁴⁰ Ko wassi Yeso abhɔdha gho, kimsen awanɛ nɔnɔ, nɔgɔ bhaɛ adhime nɔnɔ. ⁴¹ Eeza kanne Jaɨros, gulsaja KO kessa Yehudhanu alaɛ Tamu, akʉna ko agaz kunden sɔnɛ Yeso gho, ko ala nɔnɔ ko kigiya kessa nɨndɛ ⁴² Gaaji sedheja nɨndɛ ɔlɔ harato ɔmɔzɔ ko ramma arzɛ, ko wassi Yeso ako kessa Jaɨros gho, eeza uluta nɔnɔ. ⁴³ Ko tɛruja udhusu harato ɔmɔzɔ ko ramma aɛ ŋanyana, ko nɔ eeshi ka kʉrghʉ nɔnɔ anjoni. ⁴⁴ Ko nɔnɔ agɔwa nɔnɔ hurto ko alakam rumma nɨndɛ, ko dhogoni dhusuenesa nɨndɛ ɛtɛdha. ⁴⁵ Ko Yeso ighɨno, “Aŋɛnɛ alakama anda gho?” KO wassi nɔgɔ bhaɛ agɛŋanɛ gho, Betros anne, “Eeza abbo, eeza bhaɛ aluganiŋɛ ko ugunyiŋɛ unda.” ⁴⁶ Ko nɔ Yeso anne, “Ʉtʉmma aji alakama anda gho: Anda kagha nʉŋgo dhɔrɔgi ilyoŋ ŋieta nande.” ⁴⁷ Ko wassi tɛru ijhe nɔnɔ ɛndɛ ŋa ako lugunyenda gho, akʉna bharizenda ko agazɛ kunden sɔnɛ ghɨndɛ gho. Woyina eezu gho bhaɛ, aɛnɛ nɔnɔ alakam nɔnɔ gho. Ko nɔnɔ anne, nɔnɔ wa kʉrghʉ dhogoni wassi nɔnɔ alakam nɔnɔ gho. ⁴⁸ Ko nɔnɔ anne nɔnɔ, “Sedhe, yewisa nunde wa ʉrghʉi unda. Bhi ghanɔna.” ⁴⁹ Ko wassi Yeso ŋanɨ ali gho, ʉtʉmma akʉna kessa Jaɨros gho, gulsaja ko kessa Yehudhanu alaɛ Tamu, “Ko nɔnɔ anne sedheja nunde arzɛ, “Ŋa akɔra dhemiogi dii.” ⁵⁰ Ko wassi ŋanɨ asɨnɛ nɔŋi jegi gho, Yeso anne Jaɨros, “Ŋa aŋolye; yɛbbh hʉŋ, nɔnɔ kɨdhɨ arghɛ.” ⁵¹ Ko wassi nɔnɔ ajʉga kessa Jaɨros gho, nɔnɔ ŋa adhimo eeshi ka kozoi kaarɨ a Betros, Yohannes ko Jɨmes ko baba errujo ŋanɛ. ⁵² Ko eeza bhaɛ alune ko alɛnɛ nɔnɔ. Ko Yeso anne, odhozi ulla, “Nɔnɔ ŋa arzɛ, oŋo.” ⁵³ Ko nɔgɔ atarartɛ nɔnɔ, aghayɛ nɔnɔ arzɛ. ⁵⁴ Ko nɔnɔ adhumma nɔnɔ aii ko anni, “Erruja nande, iŋa jɨna !” ⁵⁵ Hɔŋisa nɨndɛ wa kobhojhaɛ. Ko dhogoni nɔnɔ iŋa jɨna. Ŋa Yeso iye nɔgɔ ko kanjete nɔnɔ gii adhagi. ⁵⁶ Ko bhɛnɛna ghɨndɛ awashie, ko nɔnɔ iye nɔgɔ ko ŋa osɨnu ʉtʉmma gii amɛ gho.