¹ Ko wassi Yeso idhija nɔŋi jegi ɔsɔanɛ eeza bhaɛ gho, nɔnɔ ʉg Kabharnama. ² Ŋanyana gari ghɔnɛa elemun eeza nɨndɛ abbo, amɔr ɔrrɔ ko adhi kirɔ. ³ Ko eeza abbo asɨgɛ Yeso ko itona gulsena Jɨwɨsi matɛ ŋieta nɨndɛ ko kighɨne nɔnɔ ko kigiya ko kʉrghʉ garta nɨndɛ. ⁴ Ko wassi nɔgɔ aʉna ŋieta Yeso gho, nɔgɔ alai nɔnɔ ko kɛla nɔnɔ, “Eeshi nyini adhi ko kɛlaɛ unda mɨ ghɨnyi jegi. ⁵ gaaji nɔnɔ elemun loja naɛ ko ɛghɛnyɛzage kessa naɛ kalaɛ Tamu.” ⁶ Ko Yeso ozoi ko nɔgɔ. Ko nɔnɔ ŋa aɛsɔ rɛna ŋieta kessu wassi eeza abbo itona dehunyena ghɨndɛ ko kiyete nɔnɔ: “Alan, ŋa akɔra ɛlɛa nunde anda ŋa kadhimme ko kolome unda ko jaa kuraja nande gho. ⁷ Ko nyana a giiji anda shɔ ŋa kadhimme kimɨɔ ɛlɛa nande ko kiye shallɛ ko kigiya ŋieta nunde gho. Ko nɔ ɔsɔa nɔŋa hʉŋ, ko garta nande kʉrghɔ.. ⁸ Anda ɛlɛa nande kenni eeza kaɛ gulsasɛza, ko Mɛtɛlɛkɛa ate gulsasɛza nande gho. Ko anda kosee odhe, ‘Bhidhɔ,’ Ko nɔnɔ ako; Ko odhe jaŋa ,’ Ko anʉna. Ko anda kanne garta nande, “Mi gii, ’ Ko nɔnɔ amɨɔ.” ⁹ Ko wassi Yeso asɨgɛ nɔŋi jegi gho, nɔnɔ awashi nɔnɔ, ko nɔnɔ ukoo kimsuja agɔbhɛ nɔnɔ ko anni, “Anda kosinʉŋ ugga anda ŋa kɔjɔa yewisi abbɔrrɔ nyini shɔ Isiraela.” ¹⁰ Ŋa eeza wa kegi obhojha kess ko ojoya gaari dha ʉrgha. ¹¹ Ko bhɔrɔja ʉmmati Yeso ʉg katama kanne Nain gho, ko kobhogha ghɨndɛ ko kimsuja abbɔrrɔ okokori ko nɔnɔ kaarɨ. ¹² Ko wassi Yeso abhako warana katamaɔ gho, eeza arzɛ kanyaga bhay a eruja ko tɛruja ee arzɛ, ko nɔnɔ aziga. Ko kimsena abbo mele katamenu ate ko nɔnɔ. ¹³ Ko wassi Alan ajɔa nɔnɔ gho, sɨnɨsa nɨndɛ azamazo nɔnɔ ko anne, “Ŋa alui.” ¹⁴ Ŋa nɔnɔ ʉg ko alakam sandug, ko eeza wa anyake ŋanɨ alɛ. Ko nɔnɔ anni, “Erru, anda kanni unda, ɨŋa jina!” ¹⁵ Ko eeza wa arzɛ ɨŋa jina ko ɛsɛgɛa aliya, ko Yeso anye nɔnɔ yaya nɨndɛ. ¹⁶ Ko nɔgɔ bhaɛ ɔzɔŋɔldɛ ko odhoŋi Tamu. “Ko nɔgɔ iyɛzɔ, eeza abbo ɔtɔtɔgi nɔŋa Tamuo wa ujuga ŋieta naɛ.” “Tamu wa igiya ko kɛla eeza ghɨndɛ.” ¹⁷ Kamannɛna Yeso atahano Yudhɨa bhaɛ ko lɔjɛna aluganɛ nɔnɔ. ¹⁸ Ko kobhogha Yohannes osɨne nɔnɔ ghɨnyi jegi bhaɛ. Ko nɔnɔ ʉzʉ iyaa ɛnɛ ramma, ¹⁹ Ko nɔnɔ iton nɔgɔ ŋieta Alanɔ ko kɨghɨnegho, “Unda enni eeshi bhalɨ ka jaa gho, dha agga kereya ʉtʉmma bhisha ?” ²⁰ Ŋa wassi eeza aʉnanɛ ŋieta Yeso gho, “Nɔgɔ annɛ, “Yohannes ajʉrɛ ɛgane aggi ko ŋieta nunde ko kɨghɨndɨŋɛ, “Unda enni eeshi bhalɨ ka jaa gho, dha agga kereya ʉtʉmma bhisha ?” ²¹ Ko wassa nyana Yeso ʉrghʉ eeshi mele ɔlɔmɛ moriso, mutanyo ko kʉlɔsha miniŋu, ko ɔbh eeshi mele kɛɛrɛ adhizɛ. ²² Ko nɔnɔ abhodhe itonda, ‘Obhodhi hʉrto ko obhojhe Yohannes gaa ijhesu ko asɨnu: Eeza kɛɛrɛ adhizɛ ojoya lo, iyaa ŋɔlɛ ozoiza, ko iyaa ɔlɔmɛ kɔllɛ kʉrghʉɛza, ko iyaa dʉŋgen ɨsɨtɔ, iyaa arɨnɛ ɨŋazɔ, ko kamanna shallɛ kegermesiye eeza ɔshɔlaye. ²³ Muyugene a iyaa ko eeza ŋa abirɛ nɔŋa ghande.” ²⁴ Ko wassi Yohannes odhozi itondana ko iyeʉrda gho, Yeso agaza ko osee kimsen nɔŋa “Agino ayu uggau korua tɔ ko ijhesu gho ? Adhito ko eeza ahɔhɔlɛ hulla ko hartenda ɛbɛ ŋɔzɛ ? ²⁵ Aji ŋaɛnɛ gho, agino ayu uggau bhaya ko ijhesu gho ? A eeza amalkɛ rummize shallɛ gho ? Ah, ah, aghɔnɔghɛa amalukɛ rummiza rʉkʉlɛ a eeza ate ŋietinɛ shallɛ gho. ²⁶ Ko agino ayu uggau bhaya ko ojoya gho ? A eeza ɔtɔtɔgi nɔŋa Tamuo ? Eee, Anda kosɨnʉŋ ugga, kijara eeza ɔtɔtɔgi nɔŋa Tamuo. ²⁷ Jegi a nɔŋa akane ɔrgataja: “‘Anda kɨdhɨ kitoni itondaja nande woyina noo gho, iyaa kɨdhɨ amenʉŋ ugga gaŋgu woyina noo gho.’ ²⁸ Anda kosɨnʉŋ ugga, ŋieta noo, ghɔnɛa ka kijara Yohannes anjoni; Ko ghɔnɛa hʉrtine ko tugainesa Tamuo kɨdhɨ ijara nɔnɔ. ” ²⁹ (Eezaa bhaɛ, shɔ eeza amukɛ gharata, wassi nɔgɔ asɨnɛ nɔŋa Yeso gho, nɔgɔ aghai nʉŋgo dha gaŋgua Tamuo a dhere, gaaji nɔgɔ dhalɨ ajʉrɛ Yohannes. ³⁰ Ko nɔ Bharisayo ko eeza aghayɛ nɔŋa akʉle abirnɛ nɔŋa Tamuo elezine gho, gaaji nɔgɔ ŋa kʉjʉrɔ Yohannes.) ³¹ “Agino ɛndɛ anda kudhugue eeshi ko birshi nyini gho ? Nɔnɔ adhito ko nya ? ³² Nɔgɔ adhito ko erroa ate gawa ko aʉyɛ ghɔnɔghɛ: “‘Agga kebeginʉŋ bɛlasha ko ugga ŋa argumo; Ko agga kadholya renya kalɛnɛ ko ugga ŋa alunuo.’ ³³ Ko Yohannes ŋa kadhaghɔ sololya ko kugudhɔ wayn ko ugga annu, “Nɔnɔ ɔlɔ miniŋa.’ ³⁴ Ko Dhola Eezo akʉna ko adhake ko agudhɛ, ko ugga annu, ‘Nɔ ɛnɛ ijinɛ eeshi adhake ɔrrɔ ko agudhɛ ɔrrɔ nyini, nɔnɔ a dehunya ko eeza amuke gharata ko iyaa ɔlɔmɛ ridhiŋ.”’ ³⁵ Ko ghʉrghʉri elyaɛ dɨɨb ko aghayɛ ghɔnɔghɛji alakamanɛ gho.” ³⁶ Bharisayo odhe ʉzʉ Yeso ko kadhagi tɨla jajune ko nɔnɔ, ŋa nɔnɔ ʉg kessa Bharisayo gho ko aʉ goŋgula kadhagine gho. ³⁷ Ŋa wassi tɛruja ɔlɔ ridhiŋ aɛ katama nyana agha Yeso dha adhake kessa Bharisayo gho ko nɔnɔ igiyaɛ zaitija aŋɔlɛ hʉrhʉr kushule elezi. ³⁸ Nɔnɔ alɛ sɔnɛ Yeso gho ko aluo. Ŋa nɔnɔ agazaɛ ko uzunya sɔa ghɨndɛ tilalɔ ko uhug sɔa ghɨndɛ ɨmma ko nɔnɔ ɔshɔbɔ ko ʉrr zaitija kushule elezi gho. ³⁹ Ko wassi Bharisayo iyaa wa aʉ nɔnɔ ajɔa ghɨnyi jegi gho, nɔnɔ iye ɛlɛa nɨndɛ, “Aji eeshi nyini a eeza ɔtɔtɔgi nɔŋa Tamuo gho ko a tɛrushi ɛnɛ nya- nɔnɔ a edeyogi. ” ⁴⁰ Ko Yeso abhodhe nɔnɔ, “Saimon, Anda kolomi gii kakoseki unda.” “ Ko nɔnɔ anni, “Osekani dhemiogi. ⁴¹ Ko eeshi ɛnɛ ramma abarasɛanɛ birisha ko ʉtʉmma. Odhe abarasɛa mato tʉr, ko iyaa ʉmma abarasɛa eeza ramma ko ɔmɔzɔ. ⁴² Ko nɔgɔ ŋieta enine ramma gho ŋa ɔlɔmɛ birishaɛ ka kekesiye nɔnɔ, ŋa nɔnɔ ɛtɛdha ŋaulɛna wa ɔlɔmɛ nɨgɛ kaarɨ. Ko ŋieta eginu ramma gho aino kɨdhɨ elemun nɔnɔ ɔrrɔ gho ?” ⁴³ Ko Saimon abhodhe, “Anda kanni maya kiye eeshi katɛdha birishaɛ mele gho.” “Ko Yeso anne, “Unda ɔsɔa jʉʉrʉ lɛ. ⁴⁴ Ŋa nɔnɔ uko tɛru ko anne Saimon, “Unda ijheso tɛrushi nyini ? Anda kakʉna kessa nunde. Ko unda ŋa anya maaɛ kunyanɛ sɔ, ko nɔnɔ unya sɔa ghande tilalɔ ko uhug sɔa ghande ɨmmɛ ghɨndɛ gho. ⁴⁵ Ko unda ŋa shɔbɔa anda, ko nɔ tɛrushi nyini, ŋieta bhalɨ katunkanɛ nɔnɔ ŋa kɔdhɔdhɔ shoboine. ⁴⁶ Ko unda ŋa udhuzeka mal ɔwa nande, ko nɔnɔ ʉdha sɔa ghande zaitija aŋɔlɛ hurhur kushule elezi gho. ⁴⁷ Nɛghoɛ, Anda kosɨnʉŋ ugga, ridhiŋ ghɨndɛ mele wa kodhotega- ko nɔnɔ elemune ɔrrɔ. Ko nɔ nɔnɔ iyaa kadhoze kite gho lemunene akite.” ⁴⁸ Ŋa Yeso iye nɔnɔ, “Ridhiŋa ghunde wa kodhotegiŋɛ. ⁴⁹ Ŋa nɔ bhanya ɨŋgɛ iyeto nɨgɛ kɛŋa, nyini aŋɛnɛ shɔ adhozine ridhiŋ gho ?” ⁵⁰ Ko Yeso anne tɛru, “Yewisa nunde wa ʉrghʉi unda, ɛnɛ bhi ghanɔna.