¹ Ko Yeso ɨbhɨzi kʉlɔja Tamuo hɔrɛ ,ko ɔbhɔdha Yordhana ko idhiga kʉlɔja Tamu korua tɔ. ² Ko gonyasɛ ɛnɛ eezaramma gho, nɔnɔ ilabh shɨtanɛ gonyasɛ jaga nɔnɔ gii adhagi anjoni ko utureja nɔnɔ ibhiji magi. ³ Ŋa shɨtan anne nɔnɔ , “Aji unda enni Dhola Tamuo gho, osee bheishi nyini ko kiye sololo.” ⁴ Ŋa Yeso abhodhe, “Akane orgataja: ‘Ee ŋa keni kabhagho soloyani kɔdhɔ.” ⁵ Ko Shɨtan idhigan nɔnɔ ŋieta ɛnɛ kutulnya gho , ko keele nɔnɔ tugainesa ɔlɔ nɨndɛ lojhɛnɛ bhaɛ. ⁶ Ko nɔnɔ anne nɔnɔ , “Anda kɨdhɨ kanyi unda gulsasɛza nee bhaɛ ko dhɔrɔgi ghɔnɛa kanyaŋɛ anda , ko kɨdhɨ anda kanye eeshi kadhimmi nana gho. ⁷ Ko aji unda ayɛbha anda gho, kɨdhɨ bhaɛ iye iya ghunde.” ⁸ Ko Yeso abhodhe, “ Shɔ akane orgataja: ‘ Yɛbh Alana unde Tamu ko la nɔnɔ Kɔdhɔ.” ⁹ Ko shɨtan idhigan nɔnɔ Yeruselema ko nɔnɔ izili kessa Yehudhanu Tamuo hɔrɛ ŋieta aɛ daa gho. “Ko nɔnɔ anne , “Aji unda enni Dhola Tamuo gho kɔla ɛlɛa nunde ŋietei. ¹⁰ Shɔ akane ɔrgataja : “‘ Kɨdhɨ nɔnɔ osee ekoga ghɨndɛ nɔŋɛji ghunde ko kebhetiŋɛ unda jʉʉrʉ; ¹¹ Kɨdhɨ nɔgɔ alakamiŋɛ unda aiinɛ ghee ko ŋa inna lo ko sɔa ghunde ŋa auke bhɛyɔna. ¹² ko Yeso abhodhe , “ko anne : Ŋa ilawi Alana Tamua nunde. ¹³ Ko wassi shɨtan idhija ilawinesa nɨndɛ bhaɛ gho , nɔnɔ ɔdhɔs nɔnɔ ko ŋieti akʉnanɛ saatishi shallɛ. ¹⁴ Ko Yeso ɔbhɔdha Galili dhɔrɔgisa ko kʉlɔshi Tamua gho ko kamanna nɨndɛ atahano katamɛn bhaɛ. ¹⁵ Ko nɔnɔ ɛdhɛmmiɔ kessa Yehudhanu alaɛ Tamu gho, ko eeza bhaɛ odhoŋi nɔnɔ. ¹⁶ Ŋa nɔnɔ ʉg Nazareta, ŋieta bhaɛ alinanɛ nɨnɛ gho, ko gonyasɛ ɛnɛ Sabhat gho nɔnɔ ʉg kessa Yehudhanu alaɛ Tamu gho, dambija nee gho.Ŋa nɔnɔ ɨŋa jina ko ozoyo. ¹⁷ Ko ɔrgataja ko eeza ɔtɔtɔgi nɔŋa Tamu Isaya kanjete nɔnɔ ko kɔwa, ko ajɔa ŋieta akane. ¹⁸ “ Kʉlɔja Alanɔ ayɛ ŋieta nande, gaaji nɔnɔ uda anda mala Tamuo gho ko kegermese eeza ɔshɔlaye kamanna shallɛ. Nɔnɔ itonana anda ko kɔga eeza ajhebhe ko kato hurr.Ko kimmi eeza kɛɛrɛ adhɨzɛ ko kojoya lo. ¹⁹ Ko kɔsɔa haratoga Alanɔ lemuneda. ²⁰ Ŋa nɔnɔ ugum orgata ko anye eeza wa ate kaarɨ ko ayɛ lʉza . Ko kɛɛrɛ ko eeshi jaga bhaɛ ate kessa Yehudhanu alaɛ Tamu gho ashiŋɛ nɔnɔ ɔrrɔ. ²¹ Ŋa nɔnɔ ɛsɛgɛa ko iye nɔgɔ, “ Wassai nɔŋa ate ɔrgataja nyini wa isɨtu ko kiye dhereshi. ²² Ko eeza bhaɛ alie nɔŋa ghɨndee jʉʉrʉ ko awashie nɔŋa shallɛ ubhunuyɛ uzuga nɨndɛ ghoAho ko nɔgɔ aghɨnye , “Nyini ŋanɛ Dhola Yosebhi? ²³ Ko Yeso anne nɔgɔ , “kagha nʉŋgo ugga Kɨdhɨ emeyaŋu anda nɔŋa gaarɨ : Akimɛ urghuɛ ezezi gho! Ɨmɛ ŋietei ɔla noo ɛnɛ katama gho gaa wa agga kasɨna dha amisu Kabharnama.” ²⁴ Ko nɔnɔ ŋanɨ ako, “Anda kosɨnʉŋ ugga dhereshi eeza ɔtɔtɔgiyɛ nɔŋa Tamuo ŋa kadhimo katamanɛ ko olyoshi ghee gho. ²⁵ Anda kosɨnʉŋ ugga dhereshi, saatija dhalɨ Elija gho tamu daa anyugɛ harato iyo ko nyɔlɔgɛ tɔrkɔnɔ ko lo bhaɛ iye magi ko saatija nyana ɔlɔ zigenyi mele Isiraela. ²⁶ Ko Elija ŋa kitondegho eeshi jaga, ko nɔ kitone zigena ate Zarabhat ɔla kane Sɨdon gho kɔdhɔ. ²⁷ Ko saatija Elisha enine eeza ɔtɔtɔgi nɔŋa Tamuo gho, eeshi mele Isiraela ɔlɔmɛ mutana ɛnɛ kɔlɛ ko odheshi ŋieta nee ŋanɨ ŋa kurghuɛgho a Naamɛn iyaa Syrian kɔdhɔ. ²⁸ Ko eeza bhaɛ iya ate kessa Yehudhanu alaɛ Tamu gho ediza wassi nɔgɔ asɨnɛ nɔŋi gho. ²⁹ Ko nɔgɔ ɨŋazɔ jɨna ko idhigani nɔnɔ katamɛnɛ bhaya ko ote nɔnɔ ŋieta ɛnɛ ŋolo sho ko kɔkɔlda nɔnɔ ŋolola. ³⁰ Nɔnɔ uzunu kɛrgɛna kimsujo ko ʉg gaŋgua nɨndɛ gho shi. ³¹ Ŋa nɔnɔ ʉg Kabharnama, katama aɛ Galilia gho ko gonyasɛ ɛnɛ Sabhata gho aghazɛ dhɛmɛnɛsa eezu. ³² Ko nɔgɔ awashie dhɛmɛnɛsa nɨndɛ gho, gaaji nɔŋa ghɨndɛ ɔlɔ gulsasɛ. ³³ Ko kessa nyana yehudhanu alaɛ Tamu gho, olome eeshi ɔlɔ miniŋa ko kʉlɔja miniŋu ko nɔnɔ arr ɔrrɔ, ³⁴ Yee,Yeso Nazaret! Unda adhimmi nya ŋieta naa? Unda akʉna ko yome agga? kaghai nʉŋgo Tamuo hɔrɛ odheshi!” ³⁵ Ko Yeso anne dhɔrɔkɛa , “Au laii,! Bhuna bhay ŋieta nɨndɛ ! “Ŋa miniŋi ujuge ee lo woyina nee gho bhuna bhay ko ŋa ɛdɛ nɔnɔ. ³⁶ Ko eeza bhaɛ awashie ko ighindo nɨgɛ, “Nyini adhɛmɛnɛsi ɛnɛ nya? ɔlɔ shɔ gulsasɛ ko dhɔrɔgi ko osee kʉlɔja minido ko kubhuna bhay gho!” ³⁷ Ko kamanɛna ghɨndɛ atahando lojhɛna aye nɨnɛ bhaɛ. ³⁸ Ko Yeso ɔdhɔs kessa Yehudhanu alaɛ Tamu ko ʉg ɔla Saimon gho.Ko inyiga Saimon ɔlɔ bharizene ɔrrɔ ko nɔgɔ aghɨnye Yeso ko kɛla nɔnɔ. ³⁹ Ko nɔnɔ udhughumano nɔnɔ ko ara bharizene, ko ɔdhɔs nɔnɔ kodhoghoni nɔnɔ ɨŋa ko ɛrɛ nɔgɔ. ⁴⁰ Ko wassi kɔr inno gho, eeza anjagɛ Yeso eeza ɔlɔmɛ mutanyo bhibhi bhaɛ , ko azadhɛ aiina ghɨndɛ nɔgɔ ko nɔnɔ ʉrghu nɔgɔ. ⁴¹ Ko miniŋa ubhunda bhay ŋieta ko eeshi mele arjhɛ , “Unda enini Dhola Tamuo!” Ko nɔnɔ ɔtɔg nɔgɔ ko ŋa adhimmino nɔgɔ kaliegho, gaaji nɔgɔ aghayɛ nʉŋgo nɔnɔ a kiristo. ⁴² Ko bhɔrɔja shaɔ Yeso ʉg bhaya ŋietaji eeza anjoni , ko eeza ɛsheli nɔnɔ ko wassi nɔgɔ aʉna ŋieta aye nɨnɛ gho, nɔgɔ ebhegi nɔnɔ ko ŋa adhɔs nɔgɔ. ⁴³ Ko nɔnɔ anni, “Anda ma kɛgɛrmɛsi kamanna shallɛ iya ko tugainesa Tamuo katamɛnɛ ɨŋgɛti gaaji jegi , a nɔŋi bhalɨ kitonayɛŋɛ anda gho. ⁴⁴ Ko nɔnɔ ɛgɛrmɛsi didi kessa yehudanu alaɛ Tamuo yudha gho.