¹ Ko goa ʉmmati aji nɔnɔ ɛdhɛmi eeza kessa Yehudhanu ko osee eezaa nɔŋa Tamuo gho, gɔldaiza ɛnɛ gulsen ko dhemioga ko nɔŋa akʉle, ko eezaa matɛ, aʉna ŋieta nɨndɛ. ² “Oseke aggi agulsasɛ inno amɛɛ nuna ghɨnyi jegi gho.” Ko nɔgɔ annɛ, “A ŋɛnɛ anyi unda gulsasɛshi nyini gho?” ³ Ko nɔnɔ abhodhe, “Ko anda kɨdhɨ kaghɨnyʉŋ ugga ghɨne rɨgɨnɛ oseeyegaŋʉ anda. ⁴ Yohannes ajʉrɛ iyagho gulsasɛshi amɛnɛ gho akʉna ŋieta Tamuo, dha akʉna ŋieta eezu?” ⁵ Ko nɔgɔ alye kɛŋa ko annɛ, “Aji agga kani, ‘Hurr tamua gho,’ nɔnɔ kɨdhɨ aghɨne, ‘Aɛ nɛ ugga ŋaayebhuo nɔnɔ gho?‘ ⁶ Ko nɔ aji agga kani, ‘Ŋieta eezu gho‘, eezaa bhaɛ kɨdhɨ ajukɛzɛ aggi bhɛyɔ, gaaji nɔgɔ aghayɛ nʉŋgo Yohannes a eeza ɔtɔtɔgi nɔŋa Tamuo.“ ⁷ Ko nɔgɔ abhodhe, “Agga ŋaaghaya nɔnɔ aɛ ŋaino.” ⁸ Ko Yeso anne nɔgɔ, “Anda kɨdhɨ ŋakosɨnʉŋ ugga gaŋgui kajɔanɛ nana gulsasɛshi kamɛ ghɨnyi jegi gho.” ⁹ Nɔnɔ ʉg ko osee eezaa kalyi nyini, “Ee udug guya wayinu, ko adhoze kegusha ko nɔnɔ ʉg rɛna. ¹⁰ Ko wassi iye saatija kashishɛnɛ gho nɔnɔ iton gari ŋieta ko eeza aghoye ko kanjete nɔnɔ kɛn kɛɛrɛa wayinu. Ko nɔ eezaa aghoye uke nɔnɔ ko otogi nɔnɔ rɛna loja ɛnɛ kɔr gho. ¹¹ Ko nɔnɔ ɛg gari ʉmma rɨgɨnɛ, ko nɔgɔ uke rɨgɨnɛ ko anjete liya ko otogi nɔnɔ hɔrɔ. ¹² Ko nɔnɔ iton iya ɛnɛ iyo rɨgɨnɛ, ko nɔgɔ uke nɔgɔ ko okolde nɔnɔ bhayi . ¹³ Ŋa mandinya ko guya waynu anni, ‘Ko kɨdhɨ anda kami nya? Anda kɨdhɨ kitoni dhola nande, ghɔnɛa kelemuni nana; kazi ko eeza aghoye kɨdhɨ aŋoline nɔnɔ.’ ¹⁴ Ko wassi eeza aghoye ijhese nɔnɔ gho, nɔgɔ alie kɛŋa, ‘Nyini a mandinyɛ,’ ko nɔgɔ iyɛzɔ, ‘Kaghazi nɔnɔ, ko ghɨna ghɨndɛ kɨdhɨ kiye iya ghaɛ.’ ¹⁵ Ko nɔgɔ okolde nɔnɔ bhay guya waynu ko aghazi nɔnɔ. Ŋa a gino kɨdhɨ mandinya ko guya waynu amee nɔgɔ gho? ¹⁶ Nɔnɔ kɨdhɨ akʉna ko aghazɛ eeshi jaga aghoye gho ko anye guya waynu ɨtɨŋgɛ.“ Ko wassi eeza asɨnɛ nɔŋi jegi gho, nɔgɔ annɛ, “Nɔŋi jegi kɨdhɨ ŋaamɛ!” ¹⁷ Ko Yeso ajin nɔgɔ ko aghɨn, “A gino ɛlsa nɔŋi akane gho, ‘Ko bheyi keŋghɛnsha ko kabirɛ ko kɨdhɨ iye bhɛyɔ. ¹⁸ Ko eezaa bhaɛ iyaa inonone bheyishi nyana kɨdhɨ adhule kidhidhi-kidhidhi, ko nɔ nɔnɔ ghɔnɛa ino gho kɨdhɨ ayome.‘“ ¹⁹ Ko demioga ko nɔŋa akʉle ko gɔldaiza ɛnɛ gulsen ɛshɛlyɛ gaŋgui ka kɛjɛtɛ nɔnɔ dhogoni, gaaji nɔgɔ aghaya nɔnɔ ɔsɔa kala adhom nɔgɔ. Ko nɔgɔ ɔzɔŋɔldɛ eezaa. ²⁰ Ko ato ko nɔnɔ ojhonu, ko nɔgɔ itonye eezaa azabhe nɔnɔ, ghɔnɛa adha anni a shallɛ. Nɔgɔ adhime kalakami Yeso ghɨnɛ ɔsɔa nɨnɛ gho ko nɔgɔ kanjete nɔnɔ eezaa ɔlɔmɛ dhɔrɔgi ko gulsasɛza gabhana. ²¹ Ko nɔgɔ aghɨnye nɔnɔ, “Dhemiogi, agga kaghaya nʉŋgo unda ali nɔŋa ko dhɛmɛnɛsa ko gaa ɛnɛ dhereshi, ko nɔ unda ŋaali nɔŋa ko aleja ghononu, ko nɔ dhɛmi nɔŋa Tamuo shi ɛnɛ dhereshi. ²² Ɛndɛ aɛ huŋ ŋieta naɛ ko kekesie gharata Kaesar dha anjoni?” ²³ Ko nɔnɔ agha ezedhinesi nee gho, ko iye nɔgɔ, ²⁴ “Eldegaŋu anda tamuni, ŋa a rizona ŋanɨ kamadhane tamuni gho?” ²⁵ Ko nɔgɔ abhodhine, “Kaesar”. Ko nɔnɔ anne nɔgɔ, “Anjete Kaesar gii Kaesar gho, ko anjete Tamu gii Tamuo gho.” ²⁶ Ko nɔgɔ ɛlshɛlyɛ gaŋgui ka kalakandɛ nɔnɔ nɔŋɛ jegi ɔsɔa woyina eezu gho ko nɔgɔ awashie nɔŋi abhodhe nɨnɛ gho ko nɔgɔ ato lai. ²⁷ Ko Sadhusees, ghɔnɔghɛ annɛ ɨŋaine rɛza anjoni, aʉna ŋieta Yeso ghɨne. ²⁸ Ko nɔgɔ annɛ, “Demiogi, Musee bhalɨ akanine agga aji ee ghɔzɔnɛ arzɛ ko adhɔs tɛru ko nɔ erro anjoni gho, ee ma akʉɛ tɛruja ɛnɛ bhoyogi ko ɔlɔmɛ erroa ko ghɔzɔnɛa nɨndɛ. ²⁹ Ko ŋanyana ɔlɔme ghozonyenyi ɛnɛ tʉrgɛrɛ. Ko ghɔzɔnɛa nee ɛnɛ awu adhumma tɛru ko arzɛ erro kindoŋ. ³⁰ Ko iyaa ɛnɛ bhaguja nɨndɛ, ³¹ Ko bhaguja ʉmma ato ko tɛruja ghɔzɔnɔnɛ, gaŋgua nyana ŋieta enine tʉrgɛrɛ gho arinɛ ko adhɔtɛ tɛrushi nyana erro kindoŋ. ³² Ko utureja, tɛrushi nyana ko nɔnɔ ɨrr rɨgɨnɛ. ³³ Ŋa aji, iye wassa kɨŋanɛ rɛza gho, kɨdhɨ nɔnɔ a tɛrushi ŋanɨ? Ŋieta bhalɨ rɛnɛ eeshi jegi ɛnɛ tʉrgɛrɛ gho ayɛ nɔnɔ.” ³⁴ Ko Yeso abhodhe, “Eezaa ko haratoi jegi adhummanɛ tɛra ko kanye kudhundɔyɔ. ³⁵ Ko ghɔnɔghɛa nɔgɔ kadhi kiye hɔrɛ ayɛ gonyasi ko haratoi jegi kɨŋanɛ rɛza gho ko kɨdhɨ kazi adhumanɛ tɛra dha kanye kudhundɔyɔ, ³⁶ Nɔgɔ kɨdhɨ ŋaarinɛ rɨgɨnɛ; ko nɔgɔ adhito ko eko. Nɔgɔ a erroa Tamuo, la nɔgɔ a erroa rʉghɨɔ. ³⁷ Ko dambija ko nɔŋi dhuyo gho, Musees ɛlsa rɛza kiŋanɛ, ko nɔnɔ aʉ Alan ‘Tamua Abraham, ko Tamua Hisaag, ko Tamua Yakobh.’ ³⁸ Nɔnɔ ŋaɛnɛ Tamua eezu, ko nɔ a iya rʉgiɔ, ŋieta nɨndɛ bhaɛ ate rʉgia. ³⁹ Ko dhemioga ko nɔŋa akʉle ɨŋgɛ abhodhine, “Anni juru, dhemiogi!” ⁴⁰ Ko eeshi ka kighin nɔnɔ ghʉrghʉrja ghɨne ŋii mele anjoni. ⁴¹ Ko nɔ Yeso anne nɔgɔ, “Aɛ nɛ nʉŋgo nɔgɔ annɛ Yeso kiristo a dhola Daudhi gho? ⁴² Ko Daudh ɛlɛa nɨndɛ ɔsɔa orgataja Saami gho, ‘Ko Alana anne Alana nande, ‘Au lʉza aɨɨza nande azajɔ gho. ⁴³ Ko ŋieti anda kamɛ mirɔga ghunde, ko kɨdhɨ kere kato dhɔrɔgisa ko sɔi ghunde gho. ⁴⁴ Ko Daudhi aʉ nɔnɔ, ‘Alan‘. Aɛ nɛ nɔnɔ ka kiye Dhola nɨndɛ gho?“ ⁴⁵ Ko wassi ŋani eezaa bhaɛ ɨsɨrarjɛ gho, Yeso iye kobhoga ghɨndɛ, ⁴⁶ Ughʉrghʉrɛghɔ ŋieta ko dhemioga ko nɔŋa akʉle. Nɔgɔ awɔyɛ ko amalukɛ rummiza rʉkʉlɛ ko elemunye izaine ŋietinɛ ɛnɛ katamɛn gho ko ɔlɔmɛ alesha matɛ keyine Yehudhanu kɛdhɛmɛ nɔŋa Tamuo gho ko ŋietinɛ kaŋolye rʉgumia gho. ⁴⁷ Ko nɔgɔ uluze zigen ko kote zɔziza ghee. Ko nɔgɔ elezine ghee gho alayɛ Tamu ɔrrɔ kiyɛzɔ a eeshi shallɛ ɔrrɔ. Ko kɨdhɨ Tamu iminaŋɛ nɔgɔ ɔrrɔ dhogoni.”