¹ Ko aji nɔnɔ ajin da gho, Yeso ijhe eezaa ɛnɛ bɔzɔrɛn erine anyinesha ghee kessa Yehudhanu alaɛ Tamu. ² Ko nɔnɔ ijhe shɔlayoga ɛnɛ bhoyo erine tamunisha kitekite ramma rɨgɨnɛ. ³ “Ko nɔnɔ anne, “Anda kosɨnʉŋ ugga dhereshi, “Bhoyoshi jegi wa erte iyaa mele kijarata iya ɨŋgɛ bhaɛ. ⁴ Ko eeshi jegi bhaɛ anyine anyinesha ghee bhɔzɔrsɛzɔ; Ko nɔ nɔnɔ bhɔyɔsɛza nɨndɛ gho, nɔnɔ anye ghɨnyi ɔlɔ nɨnɛ gho bhaɛ.” ⁵ Ko kobhogha Yeso ɨŋɛ aliye nɔŋa ko kessa Yedhunanu kɛdemɛ nɔŋa Tamuo kakol bheyɔnɛ shallɛ gho ko kanye Tamu woyi, ko Yeso anne. ⁶ “Ko aji unda ijhe ŋieti gho, saati kɨdhɨ akʉna iyaa kɨdhɨ bhei odhe ŋa adhozogho ghɔnɔghɛ; eezaa bhaɛ kɨdhɨ kakole nɔgɔ lo. ⁷ Ko nɔgɔ aghɨnye , “Dhemiogi,” “A wassi ino kɨdhɨ amɛnɛ ghɨnye jegi gho? Ko kɨdhɨ a hɛlaine ino kɨdhɨ nɔgɔ aʉnanɛ ko kimɨse gho? ⁸ Ko nɔnɔ abhodhe, “Ʉghʉrɛghɔ ko ŋa kalutuŋa kɨdhɨ eeshi mele aʉna saarɛ ghande gho, Anda keni nɔnɔ, ko saati iye ɔjhɔnɛ. Ko ŋa aghobhu nɔgɔ. ⁹ Ko wassi ugga asɨnu nɔŋi katio ko aŋolinu gho, ŋa aŋolinu. Maya gii nyini amɛ woyi, ko ʉtʉre kɨdhɨ ŋa akʉna dhogoni.” ¹⁰ Ŋa nɔnɔ iye nɔgɔ: “Katamɛn kɨdhɨ agɛdhɔ ko katamɛn, ko tugainesha agɛdhɔ ko tugainesha. ¹¹ Ŋanyana kɨdhɨ ɔlɔ lo shukuenesa abbo, ko magɨsa abbo ko lo gerrizen ŋietinɛ ɛnɛ olyo gho, shɔ lo toŋoline kɨdhɨ abbo ko hɛlainesa tamuo daune. ¹² “Ko wassi ghɨnyi jegi bhaɛ ŋa kimɨse woyi gho, nɔgɔ kɨdhɨ azajiŋɛ unda aɨɨna ko ajebhiŋɛ unda. Nɔgɔ kɨdhɨ aɨŋɛ unda keyine Yehudhanu gho ko kessa shebio gho, ko kɨdhɨ unda kaunanyiŋɛ woyina alaizu ko gabhanashanu gho, ko kɨdhɨ bhaɛ kozoyi saarɛ ghande. ¹³ Ko nyini agaŋguguji unda kɨdhɨ enine manye ŋieta nee gho. ¹⁴ Ko nɔ mii ɔwa nunde ko ŋa ɛzɛr ghɨnghɛ kɨdhɨ unda ɛla ɛlɛa nunde nɛ. ¹⁵ Anda kɨdhɨ kanyi unda nɔŋa ko ghʉrghʉri ghɔnɛa shɔ mirɔga ghunde kɨdhɨ ŋa abhodhiniŋɛ unda ghɨnghɛ. ¹⁶ Unda kɨdhɨ azalinyi shɔ manyu ko yayaundeji ghozonoghu, bhɛnɛnɛa ghunde ko dhehunyena, ko nɔgɔ kɨdhɨ eriniŋɛ unda rɛ. ¹⁷ Ko kɨdhɨ eeza bhaɛ aghejiŋɛ unda gaaji nande. ¹⁸ Ko nɔ ŋaɛnɛ ɨmma ko ɔwa nunde aji ka kɔyɔndɛ gho. ¹⁹ Ko nɔ aji unda alɛ jʉʉrʉ gho kɨdhɨ rughuɛsa nunde abbo. ²⁰ “ Ko wassi ugga ijhesu Yerusalem alighanɛ mɛtɛlɛkɛana gho, ugga kɨdhɨ aghayu nʉŋgo yomi iye ɔjhɔnɛ. ²¹ Kɛnɛ ghɔnɔghɛa ate Yudhia kɔzɔ kutulnya da, iyaa ate katama tɔ kɛnɛ kubhʉnɛ bhaya, ko ghɔnɔghɛa ate lɔjɛnɛ jaga kɛnɛ ŋa atunʉke katamɛn tɔ. ²² Ko nyini a saatija gerrizeno iya kɨdhɨ ibhitɛ bhalɨ kagazɛ ɔrgataja. ²³ Ko kɨdhɨ akɔmɛ ɔrrɔ ŋieta ko tɛra olome ko iya ɔlɔmɛ erroa kite-kite! Ko kɨdhɨ lɔjɛnɛ jaga agerre ɔrrɔ kedhisa eezu. ²⁴ Ko kɨdhɨ nɔgɔ inonone mashasha ko kɨdhɨ nɔgɔ kayɛ kiye eezaa shebhio lɔjɛnɛ bhaɛ. Yerusalem kɨdhɨ akanɛ eezaa Yehudhan ŋaɛnɛ ko ŋieti saatija ko eezaa Yehudhan ŋaɛnɛ ibhitɛ. ²⁵ “Ko ŋanyana kɨdhɨ ɔlɔ ridiŋ kɔra, yologa, ko munyuyushanɛ , loza ŋai, lojɛn kɨdhɨ kayɔm ko azaghaniye gaaji ko tanyi abbɔrrɔ ayɔm nɔgɔ. ²⁶ Eezaa kɨdhɨ aŋoline lo , ko ezedhi gii kɨdhɨ akʉna lo bhaɛ gho, ko elezɨa ate tamua da kɨdhɨ ushuke. ²⁷ Ko saatija nyana nɔgɔ kɨdhɨ ijhese Dhola Eezo akʉna idhoa tɔ dhɔrɔkɛa ko lemunenesa abbo gho. ²⁸ Ko wassi ghɨnyi jegi esegheyaɛ ko kimise gho, ɨŋa jina ko dhɔŋ aɨɨna ghunde, gaaji shallizenda nunde ighiya ojhonu. ²⁹ Ko nɔnɔ ɔsee nɔgɔ kalyi nyini: “Ijinɛ kɛshi ɛnɛ bhorto nyini ko kɛna bhaɛ. ³⁰ Ko wassi nɔgɔ adhujanɛ bhalɔga gho, ugga ijinɛ elezɨa ghoo ko aghai nʉŋgo sɛgaine iye ɔjhɔnɛ. ³¹ Ko wassi unda ijhe nɔŋi jegi amɛ gho, kɨdhɨ unda agha nʉŋgo tugainesa Tamuo iye ɔjhɔnɛ. ³² Ko Anda kosɨnʉŋ ugga dhereshi, birshi nyini kɨdhɨ ŋa arinɛ ko ŋieti ghɨnyi jegi bhaɛ amɛɛ. And I ³³ tamu da ko lo kɨdhɨ adhishayɔ, ko nɔ nɔŋa ghande kɨdhɨ ŋa adhishayɔ dhul. ³⁴ “Ughʉrghʉrɛghɔ, ko ebhegi elezɨa ghoo, kɨdhɨ alɛnɛ rʉghɨ ko abhake ko argumɛ, ko wassa nyana kɨdhɨ saati adhishaɛ aji ugga ŋanɨ ŋa ereyoyo kɔg hulla ko eeza agɔŋ massɛn gho. ³⁵ Kiye ŋieta akʉna ŋieta ko eeshi jegi abhakɛ loshi nyini gho bhaɛ. ³⁶ Kɛnɛ diidii shin, ko laa Tamu ko kɨdhɨ unda ulugunye ghɨnɛ kɨdhɨ amɛ gho bhaɛ, ko ŋa unda kɨdhɨ tili woyina ko Dholyi Eezo gho.” ³⁷ Ko gonyasi jegi bhaɛ Yeso ɛdhɛmɛ kessa Yehudhanu kɛdhɛmɛ nɔŋa Tamuo gho, ko jajin nɔnɔ ako bhaya ko awɛ bhali kutula kane Olibhi gho, ³⁸ Ko eezaa bhaɛ iza bhɔrɔja shaɔ ko kɨsɨgɛ nɔnɔ kessa Yehudhanu kalaɛ Tamu gho.