¹ Yeso atunuk Yeriko ko annu tɔ ŋii ŋanyana ² Eeza kane zakareus aɛ ŋanyana; Nɔnɔ a gulsaja ko eeza amukɛ gharata ko abozoro. ³ ko nɔnɔ adhi ko kijhe aŋɛnɛ ɛnɛ Yeso gho , ko ŋietaji enni eeza kuture gho nɔnɔ ŋa ajɔa,gaaji kimsene . ⁴ Ko nɔnɔ arɛj woyi ko irɔg kɛza ɛnɛ bogoni ko kijhe nɔnɔ, gaaji Yeso annu gaŋgui nyana lɛ. ⁵ Ko wassi Yeso ajuga ŋanyana gho, nɔnɔ ajin kɛza daa ko anne nɔnɔ, “Zakayos abhuna lo dhogoni. Anda ma wassai kaɛ kessa nunde gho. ” ⁶ Ŋa nɔnɔ akʉna lo dhogoni ko alakama nɔnɔ shalizena. ⁷ Ko eezaa bhaɛ aji ijhese nɔŋi jegi gho nɔgɔ esegiya ko ɔyɔtɔ, “Nɔnɔ ʉg ko kiye bhanyiza ko eezaa ɔlɔme ridiŋ.” ⁸ Ko nɔ Zakayos ɨŋa jina ko anne Alan, shinɔ, Alan! Anda kɛŋɛra ghɨna ghande ko kanyega eezaa ɔshɔlaye, ko aji anda kuluza ʉtʉmma ghɨne ɨŋgɛti gho, Anda kɨdhɨ kekesi ŋii whue ŋieta nee gho. ⁹ Ko Yeso anne nɔnɔ, “Wassai anyine ɨghia kessi nyini, gaaji eeshi nyini, ko nɔ, a dhola Abrami. ¹⁰ Ko nɔ Dhola Eezo akʉna ko kɛshɛl ko kʉghʉgaa gii alyoŋ gho.” ¹¹ Ko aji nɔgɔ ŋanɨ ɨsɨrarjɛ nɔŋi jegi gho, nɔnɔ ʉg ŋieta nee ko kosee nɔgɔ kal, gaaji nɔnɔ aɛ Yerusalema ojhonu ko eezaa nɔgɔ ɛzɛjhɛ gii annɛ tugainesa Tamu ajuga ŋii odheshi. ¹² Ko nɔnɔ anni: “Eezo abbo ʉg loja ʉmmati rɛna ko kɛjɛta kiye alan ko ŋa kɔbhɔdha . ¹³ Ko nɔnɔ uzu ghara ghɨndɛ ɛnɛ ɔmɔzɔ ko anye nɔgɔ birsha.ko nɔnɔ anne , erte birshaɛ jegi ko kimmise ‘ko ŋieti kakʉnanɛ. ’ ¹⁴ “Ko nɔ eeza ghɨndɛ egedhi nɔnɔ ko itoni eeza urtina nɨndɛ gho ko kiyɛzɔ, ‘Agga ŋa kadhimma eeshi nyini ko kiye alan naa? ¹⁵ Ko nɔnɔ kimɛ kiye Alan, ko shi nɔnɔ ɔbhɔdha ɔl. Ŋa nɔnɔ iton gar ŋieta ko eeshi anye nɔnɔ birsha gho,ko kojoya dha imisaɛ gino. ¹⁶ ko iya woyine akʉna ko anne, ‘Eeza abbo, birsha ghunde ighaɛ ɔmɔzɔ ŋii mele .’ ¹⁷ ‘ Ko eeza nɨndɛ abbo abhodhe, imu jʉʉrʉ, gharata nande shallɛ!‘ Gaaji unda wa kayebhi ɔrrɔ ghɨnɛji kite kite ,laka kataman mele ɛnɛ ɔmɔzɔ.‘ ¹⁸ “ Ko iya aghɔwa akʉna ko anne, ‘Eeza abbo , birsha ghunde ighayɛ tur ŋii mele.‘ ¹⁹ “Ko eeza nɨndɛ abbo abhodhe , unda laka katamɛn tur.‘ ²⁰ “ Ŋa gharata ʉmma akʉna ko anne, ‘Eeza abbo, birsha ghunde shegi ,Anda kinyaŋi rumize ghande gho. ²¹ Anda wa kaŋolini unda, gaaji unda eeni eeza akomi. Unda akɔɛ gaa unda ŋa errego tɔ ko ajijigi gaa unda ŋa sajhɔ.’ ²² Ko eeza nɨndɛ abbo abhodhe, ‘Anda kɨdhɨ kabhagini unda nɔŋa ko ɔwa nunde, unda garti miniŋu nyini! Unda aghaɛ , aji dha, Anda keni eeza kakomi gho, akɔɛ bhaya gaa anda ŋa keregho tɔ, ko ajijigi gaa Anda ŋa kasajhɔ? ²³ Aɛnɛ unda ŋanɨ ŋa erregho birisha ghande ŋieta atiye gho, ko wassi Anda kabhɔdha gho, kɨdhɨ kumga shalizenda gho?’ ²⁴ “Ŋa nɔnɔ iye eeshi jaga alɛ ojhonu gho, ote birshaɛ jegi rɛna ŋieta nɨndɛ, ko anjete iyaa ɔlɔ birsha ɔmɔzɔ.’ ²⁵ ‘ Ko nɔgɔ annɛ, Eeza abbo , ‘ Nɔnɔ wa ɔlɔ ɔmɔzɔ kiyeurda?‘ ²⁶ “ Ko nɔnɔ abhodhe , ‘Anda kosɨnʉŋ ugga eeza bhaɛ iyaa ɔlɔmɛ ,kɨdhɨ kanye mele, ko nɔ iyaa ŋa ɔlɔmɛ, shɔ iya ŋa ɔlɔ gii odheshi kɨdhɨ alyoŋo. ²⁷ Ko nɔ mirɔshi jaga ghande ŋa adhimaŋɛ Anda ko kiye alana nee gho izaɛ nɔgɔ ŋaɨ ko aghazi nɔgɔ woyina nande gho.”’ ²⁸ Ko aji Yeso ɔsɔa nɔŋi jegi ko iyeʉrda gho, nɔnɔ ako woyi, ako shɔ Yerusalem. ²⁹ Ko aji nɔnɔ ako Bethage ko Bethanya kutula olibhi gho, nɔnɔ iton kobhogha ghɨndɛ ramma ko anne saidto nɔgɔ, ³⁰ Ɔzɔ ɔlɔ woyina noo gho, ko aji ugga atunku gho, ugga kɨdhɨ ijhesu sigri dhogole ajhebhe ŋanyana, iyaa shɔ ʉtʉmma ŋa kɔzɛ. Ɔta ko izaɛ ŋitiyeni. ³¹ Ko aji ʉtʉmma aghinyʉŋ ugga gho, ’ Aɛnɛ ugga ɔsanu gho? oseye nɔnɔ,‘ Adhi Alanɛ.”’ ³² Ko nɔ eeza wa kiton woyi ɔzɔ ko ojoya dambija wa amadhine nɨnɛ nɔgɔ gho. ³³ Ko aji nɔgɔ ɔsanɛ sigir dhogole gho, majighe ighɨnye nɔgɔ, “Aɛnɛ ugga ɔsanu sigir dhogole gho?” ³⁴ Ko nɔgɔ abhodhine, “Adhi Alanɛ.” ³⁵ Ko nɔgɔ anyanɛ Yeso, ko ɔsanɛ rummiza ghee ko erine sigir dhogole ko erine Yeso. ³⁶ Ko aji ako gho, eeza ezete rummiza ghee gaŋgu. ³⁷ Ko wassi nɔnɔ akʉna ojhonu ŋieta annu gaŋgua ko kutula olibh gho, kimsena ɛnɛ kobho esegheya ko elemunde ko odhoŋi Tamu ko arri ɔrrɔ ghinɛji akakanɛ bhaɛ ijhese nɨgɛ. ³⁸ “Muyugene a iya ko alanyi akʉna saarɛ Alanɔ gho!” “Ghanu tamua da ko lemunesa abbo!” ³⁹ Ko Barisayɔ ɨŋgɛ kimsene tɔ anine Yeso, “Dhemiogi, tɔg kobhogha ghunde!” ⁴⁰ “Ko nɔnɔ abhodhe, “Anda kosɨnʉŋ ugga , ”Aji nɔgɔ ate lai gho, bhɛyɔ kɨdhɨ alune.” ⁴¹ Ko aji nɔnɔ annu Yerusalem ko ajɔa katama gho, nɔnɔ uzula. ⁴² Ko anni, “Aji unda, shɔ unda agha goi nyana gho, agigho kɨdhɨ anyaniŋɛ unda ghanɔn gho-ko ŋoshondo ulugunyje kɛɛrɛnɛ ghunde gho. ⁴³ Ko saati kɨdhɨ akʉna wassi mirɔga ghunde kɨdhɨ abɔganɛ bolkua nunde ko aliganiŋɛ unda tanayo bhaɛ gho. ⁴⁴ Nɔgɔ kɨdhɨ ayomʉŋ ugga lo ko erroa ghoo keine. Nɔgɔ kɨdhɨ ŋa adhɔtɛ bei odhe ŋieta ghonogine, gaaji ugga ŋa aghaigho saatija akʉnanɛ Tamu ko kʉrghʉŋ ugga . ⁴⁵ nɔnɔ ʉg kessa Yehudanu alaɛTamuo gho ko ɔtɔg eezaa azaline ghɨna. ⁴⁶ Ko nɔnɔ anne nɔgɔ, “Akane ɔrgataja, ” “‘Kessa nande kɨdhɨ akessa laindo,’ Ko ugga amisu kiye ŋieta ugurnyagu.’” ⁴⁷ Diidii nɔnɔ ɛdhɛmɛ kessa Yehudhanu alaɛ Tamu gho. Ko nɔ gɔldaiza ɛnɛ gulseza matɛ, ko dhemioga ko nɔŋa akʉle ko gulseza eezu ilawese ko kagazi nɔnɔ. ⁴⁸ Ko ŋanɨ nɔgɔ ŋa aghayɛ gaŋgui ka kagate , gaaji eezaa bhaɛ elemunye nɔŋa ghɨndɛ.