¹ Ko Yeso osee kobhogha ghɨndɛ kalyi nyini ko kele nɔgɔ ko nɔgɔ dii dii kalai Tamu ko ŋa adhizo ɔ. ² Ko nɔnɔ anne: “Katamma ʉmmati ŋanyana kɨdhɨ ɔlɔ bagi ghɔnɛa kaŋoline Tamu dha kabhɛgɛ eezaa. ³ Ko katamma nyana ɔlɔ tɛruja ee anjoni ghɔnɛa akʉna ŋieta nɨndɛ lainda, ‘Dhɔŋa Anda shallizena ko kedhisi ko mirɔshi ghande gho. ⁴ Ko wassa ʉmmati nɔnɔ abirɛ. Ko nɔ utureja nɔnɔ iyee ɛlɛa nɨndɛ, ‘Shɔ kazi ko anda ŋa kaŋolye Tamu gho dha kamio eezaa jʉʉrʉ gho, ⁵ Ko nɔ gaaji tɛruja ŋa ɔlɔmɔ ee ajɔgana Anda, kɨdhɨ kajini nɔnɔ ko kɔjɔa bhagisa shallɛ, ko nɔnɔ ŋa akɔrana ŋietaji nɔnɔ akʉnanɛ!” ⁶ Ko Alan anni, “Ɨsɨgɛ gii ɔsɔa eeshi ŋa abaghɔ nɔŋa gho. ⁷ Kɨdhɨ Tamu ŋa akʉna ko abaghɔ eezaa abhera nɨnɛ, ko iyaa alune nɔnɔ bhalɨ ko wass? Kɨdhɨ nɔnɔ erre nɔgɔ bhayi? ⁸ Anda kosɨnʉŋ ugga, kɨdhɨ ijheso nɔgɔ ajɔanɛ bagi, dhogoni. Wassi Dhola Eezo akʉna gho, kɨdhɨ nɔnɔ ajɔa yewi lʉza. ⁹ Ŋanyana ɔlɔ eeshi nɔgɔ annɛ a shallɛ ɔrrɔ ko aji ashinyɛ ghɔnɔghɛ kiye lo hɔrɔ gho, Yeso osee nɔgɔ kalyi nyini: ¹⁰ “Eeshi ɛnɛ ramma ayɛ kessa Yehudhanu gho ko kalai Tamu, odhe a Barisayo odhe a eeza amuk gharata. ¹¹ Ko Barisayo ɨŋa jina ko alao nɔŋa ko ɛlɛa nɨndɛ: ‘Tamu, Anda kanyi unda shallisɛ kiye ŋieta Anda ŋa kadhitona ko eeshi ɛnɛ ugurnya, eezaa amisɛ ghɨna gerre, iyaa atunkone tɛra dha iyaa shɔ elemunye gharata. ¹² Anda arkʉa kaɛ magi ŋii ramma ko kanye ghɨna ghande kajɔa bhaɛ.’ ¹³ “Ko nɔ eeza amug gharata aɛ rɛna. Nɔnɔ ŋa ajinɔ tamu da, ko abishi sɨnɨsa nɨndɛ ko anni, ‘Tamu, lɔ ɛlaine ŋieta nande, keni eeza kolomi ridiŋ.’ ¹⁴ “Anda kosɨnʉŋ ugga, eeshi nyini ijara ghɔnɔghɛ gho, ʉg ɔl jʉʉrʉ woyina Tamuo gho. Ko eeshi adhɔŋɛ elezɨa ghee gho kɨdhɨ ko aghununɛ, ko ghɔnɛa ghununɛ ɛlɛa nɨndɛ gho kɨdhɨ kadhɔŋɔ. ¹⁵ Ko eezaa aʉnanɛ erro ŋieta Yeso ko kalaka nɔgɔ. Ko wassi kobho ijhese gho, nɔgɔ otogi nɔgɔ. ¹⁶ Ko nɔ Yeso aʉa erro ŋieta nɨndɛ ko anni, “Kɛnɛ erroa kite-kite kiza ŋieta nande, ko ŋa ulugunyesu nɔgɔ, tugainesa Tamuo a iya ko eeshi adho ko jegi. ¹⁷ Anda kosɨnʉŋ ugga dhereshi, “ Ko nɔ eeshi kɨdhɨ ŋa ajɔa tugainesa Tamuo hulla ko erruja kiteli kɨdhɨ ŋa a tʉnʉggho.” ¹⁸ Ko dhogoni gulsa aghɨn nɔnɔ, “Dhemiota shallɛ, ko Anda kimi nya ko kojɔa rʉghɨsa aɛ dhul gho?” ¹⁹ Ko nɔ Yeso abhodhe nɔnɔ, “Unda aʉya Anda kiye shallɛ kenya?” “Eeshi shallɛ ŋai anjoni, a Tamu kɔdhɔ.” ²⁰ Ko ugga aghayu madhinyo: “Ŋa a tʉnko tɛra eezu, ŋa agazi eezaa, ŋa ɔgɔrsɛ, ŋa ali hɔlɔŋ, tɔŋɔlɛ manyu ko ŋanu.” ²¹ Ko nɔnɔ anni, “Anda bhalɨ kagowi ghɨnyi jegi bhaɛ hulla ŋanɨ kenine logoi gho.” ²² Ko wassi Yeso asɨgɛ nɔŋi jegi gho, nɔnɔ anne nɔnɔ, “Unda gii odhe ŋanɨ anjoni. Tallɔ ghɨna olomi bhaɛ ko anye eezaa ɔshɔlaye, ko ŋa unda lɔ shogiene tamua da. Ko ŋa jaa, ko kɔwa anda.” ²³ Ko wassi nɔnɔ asɨgɛ nɔŋi jegi gho, nɔnɔ ɛzɛlɛ ɔrrɔ, gaaji nɔnɔ a eeza bhalɨ ɔlɔ bhɔzɔrsɛ. ²⁴ Ŋa Yeso ajin nɔnɔ ko anne, “Kɨdhɨ eeza ɔlɔ bhɔzɔrsɛ atʉnʉg tugainesa tamuo nɛ! ²⁵ Dhereshi, abhaye ŋietaji galiso ko kutunuge kersha marsunyɔ kijara eeza ɛnɛ bozoro atunk tugainesa Tamuo.” ²⁶ Ko eeshi asɨnɛ nɔŋi jegi gho ighɨndo, “Ŋa a igoni keni kʉrhʉɛ gho?” ²⁷ Ko Yeso abhodhe, “Gii rʉkʉlɛ ŋieta eezu gho ŋieta Tamuo abhaye.” ²⁸ Ko Betros anne nɔnɔ, “Agga wa kodhota ghɨna bhaɛ ko kogotiŋɛ unda!” ²⁹ “Ko Yeso anne nɔgɔ, Anda kosɨnʉŋ ugga dhereshi,” Eeeshi ka kɔdhɔs ɔla nɨndɛ dha tɛru dha ghɔzɔnɔghɛ dha bhɛnɛn dha erro gaaji ko tugainesa Tamuo ³⁰ Kɨdhɨ ŋa ajɔanɛ gii ka kudhunda ŋii mele haratoge jegi, ko haratoge kɨdhɨ aʉna gho, rʉghɨsa aɛ dhul.” ³¹ Yeso akɔɛ kobhogha ghɨndɛ ɛnɛ ɔmɔzɔ ko ramma ko anne nɔgɔ,“Agga kaa shɔ Yerusalem, ko ghɨna akanɛ eezaa ɔtɔtɔgiɛ nɔŋa Tamuo ko Dhola Eezo kɨdhɨ amɛɛ. ³² Nɔnɔ kɨdhɨ kuke eezaa Yehudhan ŋaɛnɛ. Nɔgɔ kɨdhɨ abhishe nɔnɔ, adhɔmɛ nɔnɔ, aturɛ nɔnɔ mʉza ko anyine nɔnɔ liya ko akanɛ nɔnɔ. ³³ Ko gonyasɛ ɛnɛ iyo gho nɔnɔ kɨdhɨ ɨŋa jina rɨgɨnɛ.” ³⁴ Ko kobho ŋa asɨnɛ gii nyini: nɔŋi jegi ulugunyayɔ ŋieta nee, ko nɔgɔ ŋa aghayɛ gii ali nɨnɛ gho. ³⁵ Ko wassi Yeso annʉ Yeriko gho, eeza kɛɛrɛ adhizɛ aɛ alaye gaŋgua dheza. ³⁶ Ko wassi nɔnɔ asɨgɛ kimsu ayɛ gho, nɔnɔ aghɨn gii amɛɛ gho. ³⁷ Ko nɔgɔ osee nɔnɔ, “Yeso iya Nazaret annʉ ŋieti.” ³⁸ Ko nɔnɔ ʉzɔ ɔrrɔ, “Yeso, Dhola Daudhi, lɔ ɛlɛine ŋieta nande!” ³⁹ Ko eezaa wa awɔyɛ gaŋgua oyote nɔnɔ ko iyete nɔnɔ aʉ lai, ko nɔnɔ arr dhɛdhɛs, “Dhola Daudhi, lɔ ɛlaine ŋieta nande!” ⁴⁰ Ko Yeso alɛ ko anne eezaa ko kanjagɛ ee nɔnɔ. ko wassi nɔnɔ akʉna ojhonu gho, Yeso aghɨn nɔnɔ, ⁴¹ “Agino unda adhimmi ko kimmeki nana unda gho?” “Ko nɔnɔ abhodhe, “Alan, Anda kadhimi kijhe lo. ⁴² Ko Yeso anne nɔnɔ, “Lakama hɛlainesa nunde; Yewɨsa nunde wa ʉrghʉi unda.” ⁴³ Ko dhogoni nɔnɔ alakama hɛlainesa nɨndɛ ko ɔgɔbh Yeso, ko ɔdhɔŋ Tamu. Ko wassi eezaa bhaɛ ijhese gho, nɔgɔ odhoŋi Tamu rɨgɨnɛ.