¹ Ko Yeso anne kobhogha ghɨndɛ: “Ghɨnyi amɨsɛ eeza ko kolomi ridiŋ gho ŋanɨ ka kiza, ko nɔ ula a iya ko eeshi nɔgɔ aʉna gho. ² Ko kɨdhɨ ashallɛ ŋieta nɨndɛ ko kokolde bɔgɛ tɔ ko golua kajewe ɛlɛma nɨndɛ kijara iya kiteli odheshi kɨdhɨ ami ghɨna ɛnɛ ridiŋ. ³ Ko ebhegi elezia ghoo.“Aji ghozonua nunde ameni ghɨna ɛnɛ ridiŋ gho, tɔg nɔnɔ, ko aji nɔnɔ okolia gho, dhoze nɔnɔ. ⁴ Ko aji nɔnɔ ameni unda ghɨna ɛnɛ ridiŋ ŋii turgɛrɛ goa odhe gho, ko ŋii turgɛrɛ abhɔdhanɛ hurtin ŋieta nunde ko anni, ‘Anda kɔdhɔza gho,’ dhoze nɔnɔ. ⁵ Ko eko anne Alan, “Tɔrɛ yewisa naa!“ ⁶ Ko nɔnɔ abhodhe, aji ugga olomu yewisa kiteli adhito ko duguja kiteli gho, ugga ɛndɛ annu dordhogondi nyini , ‘kɛnɛ kubushɛŋɛ ko kindiŋɛ bhɔkɛa,’ ko kɨdhɨ kiyetiŋɛ aggau. ⁷ “ Kazi ko aji odhe ŋieta noo ɔlɔ garta abhɛk goya nɨndɛ dha azza ghɨndɛ . Kɨdhɨ nɔnɔ anne gari wassi nɔnɔ ŋanɨ akʉna guya gho, ‘Jaa au lʉza ko kadhatɔyɔ? ⁸ Ko kɨdhɨ nɔnɔ ŋa annegho nɔnɔ, ‘ Imisagaŋu Anda tɨla jajune, unda aʉ kɔk aji Anda ŋanɨ kadhake ko Kagudhɛ gho; ko aji iyeʉrda unda ɛndɛ adhake ko agudhɛ’? ⁹ Ko kɨdhɨ nɔnɔ anye gari shallizen gaaji nɔnɔ imi gaa wa kanne ko kimi? ¹⁰ Ko ugga rɨgɨnɛ, wassi ugga imisu ghɨna bhaɛ iyaa wa kanʉŋ ko imɛɛ gho, kɨdhɨ iyɛzɔ, ‘Agga ŋa kegina garshi shallɛ; agga wa kimisa goa naa.” ¹¹ Yeso gaŋgua nɨndɛ Yerusalemi gho, ʉzunu kɛga Samaria ko Galelia. ¹² Ko aji nɔnɔ ako olyoge gho, eeshi ɛnɛ ɔmɔzɔ iyaa ɔlɔmɛ mutana ɛnɛ kɔlɛ utundo ko nɔnɔ. Nɔgɔ alɛ hurr rɛna. ¹³ Ko awɛ ɔrrɔ, “Yeso, eeza abbo, lɔ ɛlɛaine ŋieta naa!” ¹⁴ Ko wassi nɔnɔ ajɔa nɔgɔ gho, nɔnɔ anne, “Ɔzɔ eldhe elezɨa ghoo gɔldaɛ.” Ko aji ayɛ gho, nɔgɔ ato hurr. ¹⁵ Ko odhe ŋieta nee, wassi nɔnɔ ajɔa nɔnɔ kʉrghʉɛza gho, abhɔdha hurtin, ko ɔdhɔŋ Tamu, ko arr ɔrrɔ dhogoni. ¹⁶ Nɔnɔ udhugumano sɔnɛ Yeso, ko anye shallisɛ nɔnɔ ko nɔnɔ a eeza Samarɨtan. ¹⁷ Ko Yeso aghɨn, “Ko nɔ eeza ɛnɛ ɔmɔzɔ kami ko shallɛ ŋaŋa? Ko eeza ɛnɛ tɔrgɔgɔ ŋaŋa? ¹⁸ Eeshi kajɔa ko kobhodha ko kanye shallizen Tamu anjoni ko a bhora ire kɔdhɔ?” ¹⁹ Ko nɔnɔ anne nɔnɔ , “Ɨŋa ko bhizɔ, yewɨsa nunde wa imi unda jʉʉrʉ.” ²⁰ Ko aji Bharisayo aghɨnye Yeso wassi inno kɨdhɨ Tugainesa Tamuo akʉna gho , ko Yeso abhodhe, “Tugainesa Tamuo akʉna ko ugga kɨdhɨ ŋa ijheso, ²¹ Eezaa kɨdhɨ kazi annɛ, ‘Nyini,’ dha ‘Nyana,’ gaaji tugainesa Tamuo aɛ ŋieta noo.” ²² Ŋa nɔnɔ iye kobhoga ghɨndɛ, “Saati akʉna wassi ugga kɨdhɨ adhimu ko ihɛzɔ wassa odheshi ko Dhola Eezo gho, ko kɨdhɨ ugga ŋa ijhesuo. ²³ Kɨdhɨ eezaa osinʉŋ ugga, ‘Nɔnɔ nyana!’ dha ‘Nɔnɔ nyini!’ Ko Ŋa ayʉ ko arejonu nɔgɔ. ²⁴ Ko nɔ Dhola Eezo wassa nɨndɛ gho kɨdhɨ adhito ko taŋagi, iyaa abhadhɛ ko ezeriny tamu ŋieta shʉlagɛ hurr utureja ko tana ummati. ²⁵ Ko nɔnɔ ma woyi abirna ghɨnɛji mele ko abirnɛ birshi jegi. ²⁶ “Ko goŋyasɛ aye Noo gho, kɨdhɨ adhito ko goŋyasa akʉnanɛ dhola eezo rɨgɨnɛ. ²⁷ Ko eeza adhake, aghudhɛ, ko ayɔ shɔ gonyasɛ Noo atunke goŋgul tɔ gho. Ŋa tan igiya ko itig nɔgɔ bhaɛ. ²⁸ “Shɔ gonyasɛ Lɔdhi gho, adhito ko jegi lɛ eezaa adhagine, agudhɛnɛ, azalanɛ ko azanine, uduganɛ ko eghenshine. ²⁹ Ko wassi Lɔdh adhɔs Sadom gho, go ko tamua abbɔ kuguraɔ abhija ko ɔyɔm nɔgɔ bhaɛ. ³⁰ “Ko kɨdhɨ aɛ hulley gonyasɛ ko Dholyi eezo kɨdhɨ elyayɔ. ³¹ Ko gonyasɛ jaga eeshi ka kuk kuraja ko kessi nɨndɛ gho, ghɨnɛji shallɛ tɔ, ma nɔnɔ ako lʉza ko adhumma nɔgɔ. Hulla ko eezaa aghʉrghʉrnɛ, ʉtʉmma ŋa keni kɔbhɔdhɔ guya nɨndɛ gho rɨgɨnɛ ghɨnɛ ɨŋgɛti, ³² Aghai nʉŋgo tɛruja Lɔdhi! ³³ Ghɔnɛi adhi ko kiyaŋ kʉrghʉrɨsa nɨndɛ gho kɨdhɨ akolio, ko ghɔnɛa nɔnɔ akoli rʉghɨsa nɨndɛ gho kɨdhɨ ajɔa. ³⁴ Anda kosinʉŋ ugga, kɨdhɨ bhaliŋa nyana eeshi ɛnɛ ramma arabhanye algaji odhe; ko odhe kɨdhɨ kayɛ ko iya ʉmma adhote. ³⁵ Ko kɨdhɨ tɛraɛ ɛnɛ ramma arɛkɛ gɔra goluaji odhe kaarɨ; ko odhe kɨdhɨ kayɛ ko iyaa ʉmma adhote.” ^{36 37} Ko nɔgɔ aghɨnye, “Aŋino Alan?” Ko nɔnɔ abhodhe, “Ŋieta kabhɔgɛ eezaa arinɛ gho, ugga kɨdhɨ ajɔanu ŋadɔlkɛn amugɛ ŋanyana.