¹ Ko Yeso anne kobhogha ghɨndɛ: “Ŋanyana ɔlɔ eeshi ɛnɛ bhozoro iyaa garta nɨndɛ abbo kaŋany nɔŋɛji iminaŋɛ ghɨna ghɨndɛ. ² Ko nɔnɔ aʉa nɔnɔ tɔ ko aghɨn nɔnɔ, “A nɔŋi ɛnɛ nya jegi kasɨgi ŋieta eezu ghunde gho? Anya dambishi amɛnɛ nuna gho, gaaji unda ŋa ka iye eeshi alakami ghɨna rɨgɨnɛ. ³ “Ko garta abbo anne ɛlɛa nɨndɛ, ‘Ko anda ŋoshondo kɨdhɨ kami nya? Aji eeza nande abbo ʉgɛ mina nande. Anda ŋa kadhodhoge ɔrrɔ ko kɔghɔyɔ, ko anda adhaka liya ŋietaji ka kalaɔ. ⁴ Anda kagha nʉŋgo gii kɨdhɨ kami nana gho, ko wassi minɛa nande alyoŋ gho, eezaa kɨdhɨ aʉnaŋɛ anda ko kigia keya ghee. ⁵ “Ko nɔnɔ eeza alakam nɔgɔ aʉ odho odho. Nɔnɔ aghɨn iya woyine, ‘Olome eeza nande abbo izɔŋ?’ ⁶ Ko nɔnɔ abhodhe, “Ɔlɔ mala anjizo mato tʉrge, ko eeza alaka nɔgɔ anne nɔnɔ, ‘Bhizɛ ghɨnyi ghunde jegi, ko au lʉza dhogoni, ko mi kiye mato whue.” ⁷ Ko nɔnɔ aghɨn garta agowi, ‘Ko unda olomi izɔŋ? ” “Ko nɔnɔ abhodhe, “Mugaiza lainu shiiji, ko nɔnɔ osee nɔnɔ, ‘Bhizɛ ghɨna ghunde ko mɨa kiye mato tʉrge. ⁸ “Ko nɔnɔ eeza abbo osee iyaa wa adhaliji nɔŋa gaaji nɔnɔ amɛɛ ghʉrghʉrjɛa, eeshi ko loshi nyini gho nɔgɔ amisɛ ghɨna ghee kijara iya ghʉrghʉjɛɔ ko eezaa taŋakiɔ. ⁹ Anda kosɨnʉŋ ugga, imɛɛ ghɨna lʉza ŋai ko olomi dehunyena elezɨa ghoo gho, ko aji indoŋ gho, kɨdhɨ unda kalakamaniŋɛ rʉghɨsa aɛ dhul gho. ¹⁰ “Ko ghɔnɛa nɔnɔ ɔlɔ yewisa kiteli gho kɨdhɨ ɔlɔ iya abbo, ko ghɔnɛi nɔnɔ adalij gii kiteli gho kɨdhɨ ko nɔnɔ adalij ŋii mele. ¹¹ Ko aji ugga bhalɨ ŋa imɛghɔ ghɨniŋgɛ lʉza ŋai ko keyetʉŋo ko alakamigho gho, ŋa aŋɛnɛ kɨdhɨ aghai bhɔzɔrsɛza nunde ɛnɛ dhereshi gho? ¹² Ko aji unda ŋa aghaiŋɛ ghɨnɛ ko ʉtʉmma gho, ŋaaŋɛnɛ kɨdhɨ anyi unda ghɨna ghunde gho? ¹³ “A, A, gari ŋa ka kimɨɔ ghɨnyi ɛnɛ ramma. Kazi nɔnɔ kɨdhɨ aghɛr odhe ko elemun ghɔnɛa ʉmma, dha nɔnɔ kɨdhɨ atɔr odhe ko atɔg ghɔnɛa ʉmma, unda ŋa ka tinyanɔ Tamu ko birisha kaarɨ. ¹⁴ Ko Barisayo, iyaa elemunye birisha, aji asɨnɛ nɔŋi jegi bhaɛ gho, iminaŋɛ Yeso. ¹⁵ Ko nɔnɔ anne nɔgɔ, “Ugga eginu eezaa ɛlsanu elezɨa ghoo kɛɛrɛnɛ eezo gho, ko nɔ Tamu agha sinezɨa ghoo nʉŋgo. Ghɨnyi ɛlsanu ŋietinɛ eezu gho Tamu agɛdhɔ. ¹⁶ “Ko eezaa aghayɛ nɔŋa akʉle ko eeza ɔtɔtɔgi nɔŋa Tamuo aliye ko ŋieti akʉnanɛ saatija Yohannes. Kamananɛ shallɛ wa kɔsɔa tugainesa Tamuo gho, ko eezaa bhaɛ kamage gaŋgena ghee gho. ¹⁷ Ko nɔ abhaye tamua da ko lʉza ko kilyoŋ kijara ʉzʉga galamɔ ŋieta inonone bhayi nɔŋɛ ɛnɛ akʉle. ¹⁸ “Ko aji ʉtʉmma atɔg tɛruja nɨndɛ ko adhumma tɛru ʉmma gho, nɔnɔ a kadhɔgash, ko eeza nɔnɔ akʉɛ tɛruja wa katogi kiye tɛruja nɨndɛ gho, nɔnɔ a kadhɔgash. ¹⁹ “Ko ŋanyana ɔlɔme eeshi ɛnɛ bhozoro amalʉk rumma shʉlagɛ ko shishilija shallɛ ko adhag dhaginda rʉkʉlɛ didi. ²⁰ Ko warrana nɨndɛ gho, ɔlɔ bhoyota oŋ lʉza kane Lazaros aghʉme taʉnya. ²¹ Ko ishirkan ko kadhag gaa inna ŋieta ko goŋgula ko eeza ɛnɛ bhozoro. Shɔ ursi aʉna ko adhuke taʉnya ghɨndɛ. ²² “Saati akʉna wassi eeza alaye arzɛ ko eko anyagine nɔnɔ ŋieta Abrami gho. Shɔ eeza ɛnɛ bhozoro arzɛ ko kabhɔghɔ. ²³ Ko ŋieta rezu gho, ŋieta nɔnɔ abirnanɛ gho, nɔnɔ ajin lo ko ajɔa Abram, hurr rɛna, ko Lazaros tana nɨndɛ gho. ²⁴ Ko nɔnɔ aʉe nɔnɔ, ‘Baba Abram, lɔ kolene ŋieta nande ko itona Lazaros dib ko kerre terterenda nɨndɛ maa tɔ ko kalalan agaza nande, gaaji Anda ɛlɛ mazɛa goya nyini.’ ²⁵ “Ko nɔ Abraham abhodhe, ‘Erru, gha nʉŋgo wassi bhalɨ abhakɛ jʉʉrʉ gho unda ajɔa ghɨna shallɛ, wassi Lazaros ajɔa ghɨna gerre gho, ko ŋoshondo nɔnɔ au jʉʉrʉ ŋietei, ko unda au ɛlɛ mazɛa. ²⁶ Ko nɔŋɛ jegi bhaɛ, gaa aŋereje aggi ko ugga, wa kitinyaniza, ko aji ɔlɔ ghɔnɔghɛa adhimme ko kɔzɔ ŋieta noo gho ŋa aʉna, shɔ eeshi abhake ŋanynana gho ŋa aʉna. ²⁷ “Ko nɔnɔ abhodhe, ‘Anda kalayi unda, baba, itona Lazaraus kessa baba nandeji, ²⁸ Anda kolomi ghɔzɔnɔgha tʉr. Kɛnɛ nɔnɔ kosee nɔgɔ, ko nɔgɔ ŋa aʉna loshi nyini rɨgɨnɛ kabirnanɛ gho.’ ²⁹ “ Ko nɔnɔ Abraham abhodhe, ‘Nɔgɔ ɔlɔmɛ Musee ko eeza ɔtɔtɔgia nɔŋa Tamuo; Kɛnɛ nɔgɔ Kisɨrari nɔgɔ. ³⁰ “Ko nɔnɔ anni, “A,a baba braham, ‘Ko aji ʉtʉmma reza ako ŋieta nee gho, nɔgɔ kɨdhɨ adhɔtɛ.’ ³¹ “Ko nɔnɔ anne nɔnɔ, ‘Ko aji nɔgɔ ŋanɨ ŋa ɨsɨri musee ko eeza ɔtɔtɔgi nɔŋa Tamuo, kɨdhɨ nɔgɔ ŋa alakamanɛ aji shɔ ʉtʉmma ɨŋa jina rɛza gho.