¹ Ko eezaa amukɛ gharata ko iyaa ɔlɔmɔ ridhiŋ bhaɛ amugɛ ŋieta nɨndɛ ojonu ko kɨsɨgɛ nɔnɔ. ² Ko nɔ Barisayo ko dhemioga ko nɔŋa akʉle alee dari, “ Ko iyɛzɔ, eeshi nyini aʉa eeza ɔlɔ ridhiŋ ko kadhatɔ ko nɔgɔ.” ³ Ŋa Yeso osee nɔgɔ kaly nyini: ⁴ “Kazi ko odhe ŋieta noo ɔlɔ azza eezaa tʉr ko ŋieta nee odhe alyoŋ. Nɔnɔ kɨdhɨ ŋa adhɔdhɔ jaga ɛnɛ eezaa whue ko ɔmɔzɔ ko tɔrgɔgɔ gho ɔla ʉmmati ko ako ɛshɛlɔ iyaa alyoŋ ko ŋieti ajɔanɛ? ⁵ Ko nɔnɔ wassi ajɔa gho, ko nɔnɔ elemune ɔrrɔ ko udhumma ko erre gaʉla ghɨndɛ. ⁶ Ko ako ɔlɔ. Ko nɔnɔ aʉ dehunyena ghɨndɛ ko eezaa abhakɛ kaarɨ ko anne, “ Kelemunde ko Anda ; Anda kɔjɔa azzeja alyoŋ nande.” ⁷ Ko Anda kosɨnʉŋ ugga dambija nyini lɛ, kɨdhɨ ɔlɔ mele elemune tamua da nɔŋɛji ko eeza odheshi ɔlɔ ridhiŋ iyaa dhɔs ghɨna gerre kijara iyaa ɛnɛ eezaa whue ko ɔmɔzɔ ko tɔrgɔgɔ iya shallɛ ko iyaa ghɔnɔghɛa ŋa adhimme ko kodhozigho. ⁸ “ Ko dha aji tɛru ɔlɔ tamunisha ɔmɔzɔ ko akoli odhe gho nɔnɔ kɨdhɨ ŋa ezerinyo lamba, ko adhira kess ko ɛshɛlɔ ɔrrɔ dhogoni ko ŋieti nɔnɔ ajɔanɛ? ⁹ Ko aji nɔnɔ ajɔa gho, nɔnɔ aʉ dehunyena ghɨndɛ ko eezaa abhakɛ kaarɨ ko anne, ‘Kelemundo ko Anda; Anda wa kɔjɔa biruja nande wa alyoŋ.’ ¹⁰ Anda kosɨnʉŋ ugga, dambija nyini lɛ, ŋanyana ɔlɔ lemunenesi ŋoshogune iya ko ekoga Tamuo ŋieta ko eeza odhe ɛdɛa ridhiŋ ko adhozi.” ¹¹ Ŋa Yeso nɔ agazaɛ: “Ŋanyna bhalɨ olome eeshi ɔlɔ erro ramma. ¹² Ko nɔ iyaa kite odhe iye manyɛ, ‘Baba, anya anda ghɨniŋgɛ ɛzɛ ghunde gho.’ Ko nɔ eŋere nɔgɔ kaarɨ kɛrghɛna. ¹³ “Ko gonyasɛ kiteli hʉŋ gho, dhola kite amuga ghɨna wa olomi bhaɛ ko iyaa adhote. Ko nɔnɔ ʉg rɛna ɔla ʉmmati, ko ŋanyana nɔnɔ iminaŋɛ ghɨna ghɨndɛ hulla kɛlɛghɛa duyo. ¹⁴ Ko wassi nɔnɔ imɨo ghɨna wa olomi bhaɛ gho, ŋanyana ɔlɔ magisi abbɔrrɔ olyoge jaga bhaɛ, ko nɔnɔ ɛsɛghɛa ko ɔshɔlaɛ ɔrrɔ. ¹⁵ Ko nɔnɔ ʉg ko azalɔ ɛlɛa nɨndɛ ɛzɛ jaga ate loja nyana gho, ghɔnɛa iton nɔnɔ guya ko kanye shɔwɛn dhagine. ¹⁶ Ko nɔnɔ adhi ko kibhizi kɛŋa nɨndɛ dhaginda wa adhakɛ shɔwɛna gho, ko nɔ eeshi anye nɔnɔ anjoni. ¹⁷ “ Ko wassi nɔnɔ igiya ezedhesa nɨndɛ jʉʉr gho, nɔnɔ anni , “ Aghɔnɔghɛi ɛnɛ izɔŋ ekesi Baba nandeji gara ɔlɔmɛ dhaginda abbɔrrɔ nyini, ko Anda nyini karzi magi gho. ¹⁸ Anda kɨdhɨ kadhozi ŋiti ko kabhodhi ŋieta Baba ko nandeji ko kanne nɔnɔ: Baba, Anda kɛdɛa ridiŋ tamua da ko ŋieta nunde. ¹⁹ Anda ŋa ka kuzuyaŋɛ erruja nunde rɨgɨnɛ, mɛa Anda hulla ko garta nunde odhe ŋieta nee. ²⁰ Ko nɔnɔ ɨŋa jina ko ʉg ŋieta ko Baba nɨndɛ. “Ko aji nɔnɔ aɔ gaŋgu gho, Baba nɨndɛ ijhe nɔnɔ ko olome lemunene nɔnɔ, ko nɔnɔ arejo erruja, nɔnɔ alaka gaʉla ko erruja nɨndɛ ko ɔshɔbɔ nɔnɔ. ²¹ “Ko erruja nɨndɛ anne nɔnɔ, ‘Baba, Anda kɛdɛa ridhiŋ tamuo da ko ŋieta nunde. Anda kɨdhɨ ŋa kenie shallɛ rɨgɨnɛ ko kiye erruja nunde.’ ²² “Ko manyɛ anne gara ghɨndɛ, ‘Jaɛ massashi shallɛ kiye tire. Ko kerte nɔnɔ! ghunuje sigi tertereja nɨndɛ ko ghunuje sha sɔa ghɨndɛ. ²³ Jaɛ mola adhigɛ ko ozodhoŋigho. Kɛnɛ kadhato ko kurgumɛghɔ. ²⁴ Ko nyini a erruja nande bhalɨ arzɛ ko arghɛ rɨgɨnɛ; nɔnɔ bhalɨ alyoŋ ko kajɔa.’ Ŋa nɔgɔ agataɛ ko urgʉmɛza. ²⁵ Ko shaɔ hʉŋ, dhola ɛnɛ wau aɛ guya. Ko wassi nɔnɔ akʉna kess ojonu gho, nɔnɔ asɨgɛ renya ko borozine. ²⁶ Ko nɔnɔ uzua gari odhe ko iyee nɔnɔ aghino amɛɛ gho. ²⁷ ‘Ko nɔnɔ abhodhe, ‘ghozonu wa ighiya, “Ko baba nunde wa aghaz mola adhighɛ gaaji nɔnɔ ɔbhɔdha hurr ko ali jʉʉrʉ. ²⁸ Ko ghɔzɔnɛa abbo ɛdhbh ko uzur ŋietaji ka kugɛ tɔ. ko baba nɨndɛ abhuna bhay ko ala nɔnɔ ko kigia tɔ. ²⁹ Ko nɔnɔ anne Baba nɨndɛ , “Ijhe! Haratoge jegi bhaɛ Anda keni garta nunde , ko Anda ŋa Kɛdɛɔ gaŋgena ghunde, ko unda shɔ ŋa anya Anda ɛssi kiteli ko kelemunda ko dehunya ghande. ³⁰ Ko wassi errushi nyini nunde iyaa iminaŋɛ ghɨna ghunde nɔŋɛji lolusizo ko akʉna ɔl gho, unda adhumma ko atonde nɔnɔ mola adhigɛ. ³¹ .“ Ko Baba nɨndɛ anne, Erruja nande , ‘Unda dhi-dhi tuga kate ko anda kaarɨ, ko ghɨnyi kolomi gho A iya ghunde. ³² Ko nɔ agga ma kargum ko kelemune gaaji ghozonui nunde nyini bhalɨ ɨra ko ʉrʉgh rɨgɨnɛ: ko nɔnɔ alyoŋ ko kojɔa.