¹ Ko goa ɛnɛ Sabhat gho Yeso ako kessa ko gulsashi Barisayo gho, ko nɔgɔ amaragi nɔnɔ ɔrrɔ. ² Ko ŋayana woyina nɨndɛ gho ɔlɔ eeshi ɛlɛ ighɨra. ³ Ko Yeso ighɨn Barisayo ko eeza agha nɔŋa akʉle, “Aghanɔ hʉŋ ko kʉrghʉɛ eeza wassa ɛnɛ Sabhat gho dha anjoni?” ⁴ Ko nɔgɔ ato lai. Ko Yeso alaka ee, ko nɔnɔ ʉrghʉ nɔnɔ ko iton nɔnɔ rɛna. ⁵ Ko nɔnɔ aghɨn nɔgɔ, “Aji ʉtʉmma ŋieta noo ɔlɔ erru, dha oleyi inno bhɔlku gonyasɛ ɛnɛ Sabhata gho, kɨdhɨ unda ŋa ughʉregho nɔnɔ bhay dhogoni? ⁶ Ko nɔgɔ ŋa ɔlɔmɛ gii ka kosoya. ⁷ Ko wassi nɔnɔ agha bhanya wa kaʉa atiye alesha ko eezaa matɛ gho, nɔnɔ ɔsine nɔgɔ kalyi nyini. ⁸ “ Wassi ʉtʉmma aʉani unda rʉgʉmisa hololo gho, ŋa akoɛ alesha ko eezaa matɛ, kazi ko eeshi kaʉa gho ɔlɔ eeza matɛ ijaraniŋɛ unda. ⁹ Aji aɛ hulla nyana gho, eeza wa aʉne agga kaarɨ kɨdhɨ akʉna ko anni unda, ‘Anye eeshi nyini aleja nunde.’ Ko ŋa liyasɛza nunde gho bhizɛ aleja hurtine. ¹⁰ Ŋa wassi unda kʉzʉyiŋɛ gho, bhizɛ ŋieta uturjaɛ, ko ŋa wassi eeza aʉanʉŋa akʉna gho, kɨdhɨ anni unda, ‘Dehuny, bhi ŋietaji shallɛ.’ Ko ŋa unda kɨdhɨ kozoŋoldeiŋɛ woyina ko eeshi ghunde matɛ gho bhaɛ. ¹¹ Ko ghɔnɔghɛa esheline ŋietina matɛ elezɨa ghee gho kɨdhɨ a ghununɛ, ko nɔnɔ ghɔnɛa ghununɛ ɛlyɛa nɨndɛ gho kɨdhɨ kadhɔŋ da.” ¹² Ŋa Yeso iye eeza wa aʉa, “Wassi unda anye dhaginda wassune dha, iya ajune gho, ŋa aʉa dehunena ghunde, ghozonoghua ghunde dha bhɛnɛna ghunde, dha eezaa abhaku kaarɨ ɛnɛ bhɔzɔrɛn ; aji unda ami gho, kɨdhɨ ko nɔgɔ aʉyiŋɛ unda rɨgɨnɛ ko kɨdhɨ ekesiŋɛ unda. ¹³ Ko nɔ wassi unda olomi dhaginda jajune gho, tʉe eeza ɔshɔlaye, eeza anyakuanye, eeza ŋɔlɛ, ko eeza kɛɛrɛ adhizɛ. ¹⁴ Ko unda kɨdhɨ kamayukiŋɛ. Kazi ko nɔgɔ ŋa ekesiyiŋɛ unda gho, unda kɨdhɨ kekesiyiŋɛ goa kiŋanɛ rɛza ko eeshi shallɛ gho. ¹⁵ Ko wassi eeza wa ate ko nɔnɔ goŋgula asɨgɛ nɔŋi jegi gho, nɔnɔ anne Yeso, “Muyugene a iyaa ko eeshi adhakɛ dhaginda hololo tugainesa Tamuo gho.” ¹⁶ Ko Yeso abhodhe, “Ʉtʉmma wa amii dhaginda abbɔrrɔ jajune ko aʉa bhanyi mele. ¹⁷ Ko saatija nyana eeza amii dhaginda hololo, nɔnɔ iton gaarta nɨndɛ ko kosee eeza wa kaʉa, “iza, ghɨna bhaɛ ato kɔk. ¹⁸ “Ko nɔgɔ bhaɛ aghata ɛgɛndɔ, ko woyi nɔgɔ annɛ , “Anda wa ŋanɨ kazala gui ko ma anda kako ko kajine. Eeshi jegi nɔ odhotaŋu anda. ¹⁹ “ Ko ʉtʉmma anni, ‘Anda wa kazala ɔlenya aghoye tʉr ko Anda kaɛ gaŋgua nande gho ko kilab nɔgɔ, eeshi jegi odhotegaŋu anda. ²⁰ “ ko rɨgɨnɛ ʉmma anni, ‘ Anda ŋanɨ kadhumma tɛru , ko nɔ anda ŋa kako.“ ²¹ Ko gari akʉna ko osee eeza nɨndɛ abbo ghɨnyi jegi. Ŋa madinyɛa kessu ɛdɛbh ko osee garta nɨndɛ, bhi bhaya kiye tire gaŋgene ko ɛshɛl eeza ɔshɔlaye katama tɔ ko jaɛ ŋieti nyini, iyaa anyakuanye, iyaa kɛɛrɛ adhizɛ ko iyaa ŋɔlɛ.’ ²² Ko gari anne, “Eeza abbo, ‘Gaa wa ɔsɔa nuna imɛɛ, ko nɔ ŋanɨ kess aɛ.’ ²³ “Ŋa eeza abbo anne garta nɨndɛ, ‘Bhi bhaya gaŋgene ko lɔjɛnɛ ko ɛshɛl nɔgɔ ko kiza, ko kessa nande kɨbhɨtɛ. ²⁴ Anda kosini unda, ŋaɛnɛ odhe ŋieta ko eeshi jegi iya wa kaʉa ko kazarigho dhaginda nande ajune.” ²⁵ Ko kimsua abbɔrrɔ aɔyɛ ko Yeso, ko uko nɔgɔ ko anne nɔgɔ, ²⁶ “Aji ʉtʉmma akʉna ŋieta nande ko ŋa aghɛdhɔ baba nɨndɛ ko yaya nɨndɛ, tɛruja nɨndɛ ko erro, ko ghɔzɔnɔghɛa ghɨndɛ ko ŋɔnɔghɛ gho-Eee, shɔ rughisa nɨndɛ gho-nɔnɔ ŋaɛnɛ kobhota nande. ²⁷ Ko eeshi ŋa anyaghɔ teleja nɨndɛ ko aghobha anda gho nɔnɔ ŋa ɛnɛ kobhota nande. ²⁸ “Ko aji odhe ŋieta noo adhi ko kɛghɛnyɛza kessa une gho kɨdhɨ nɔnɔ woyi ŋa aɛsɔ lʉza ko ajinɔ aji nɔnɔ ɔlɔ brishaɛ mele ɛndɛ ɛlɛnɔ ko kiss nyini gho? ²⁹ Ko aji nɔnɔ ɛghɛnsha lʉza ko ɛndɛ ŋa adhija gho, eeza bhaɛ iyaa ijhese iminadɛ nɔnɔ. ³⁰ Ko nɔnɔ anni, “Eeshi nyini aghaza ko ɛghɛnyɛzɔ ko ŋa kidhija. ³¹ “ Ko nɔ aji Alan ako ko kagato ko Alana ʉmma gho, kɨdhɨ nɔnɔ woyi ɛndɛ ŋa aɛsɔ lʉza ko ajin nɔnɔ aji dha kɨdhɨ nɔnɔ ɔlɔ ghɔnɔghɛi ɛnɛ shisha ɔmɔzɔ eezaa majɛ ko kaghato ko iyaa ɛnɛ shisha eeshi odhe? ³² Ko aji nɔnɔ ŋa ɔja gho, nɔnɔ kɨghɨ iton ɨtɨŋgɛ, ko aji iyaa ɨŋgɛ ŋanɨ ate rɛna gho kɨdhɨ aghɨn nɔŋa ghanɔnɔ. ³³ Dambija wa yani gho lɛ, ŋieta noo ghɔnɛi ŋa adhimo ko kanyego ghɨna bhaɛ gho kɨdhɨ ŋaɛnɛ kobhota nande. ³⁴ “Shɔɛ a shallɛ, ko aji luluzisa nɨndɛ alyoŋ gho, kɨdhɨ kami ko aluluzɛ nɛ rɨgɨnɛ? ³⁵ Bhiliŋa ŋa ɔlɔmɔ gii ka kimise dha umujɔɔ gui. Kakoli duya. Ko ghɔnɛa nɔnɔ ɔlɔ ɨnna gho, kɛnɛ kisighɔ.”