¹ Shaɔhʉŋ, Wassi kimsena koshisha mele amʉgɛ gho, ko nɔgɔ kɔyɔtɔ ko ghɔnɔghɛ gho, Yeso ɛsɛghɛa ko alio ko kobhogha ghunde woyi , anne: “Ebhegi elezia gho bhoguŋe Bharisayo gho ghɔnɔghɛa adhanɛ nɔŋa Tamuo. ² ko gii kɨdhɨ ka kulugunye ko kɨdhɨ ŋa kaghai anjoni. ³ Ko gii ɔsɔa ŋieta aɛ tir gho kɨdhɨ kasɨgɛ waz, ko gii ahehezi izani kessa tɔ gho kɨdhɨ osoyaɛ kurashanɛ. ⁴ “Anda kosɨnʉŋ ugga ,dhehunŋyena ghande ŋa aŋolinu eeshi akanɛ ɛlɛ, ko wassi iyeʉrda gho ŋanɨ ŋa amisɛ ŋii mele rɨginɛ. ⁵ Ko kɨdhɨ anda kelsinʉŋ ugga ghɔnɛa kɨdhɨ ka ɔzɔŋɔldɛ uggau: Ɔzɔŋɔldɛ nɔnɔ ghɔnɛa, wassi agazɛ ɛlɛ ko iyʉrda gho, nɔnɔ ɔlɔ dhɔrɔgi ko akolinʉŋ ugga goa aɛ dhul. Eee, Anda kosɨnʉŋ ugga, ɔzɔŋɔldɛ nɔnɔ. ⁶ Ŋaɛnɛ kalɛa enɛ dhɔgɔlɛ ko kazaline birishanɛ ɛnɛ ramma gho? Ko nɔ Tamu shɔ odheshi ŋieta nee ɔ ŋa adhizogho. ⁷ Ko dhereshi ɨmma ate ɔwa nunde gho agha bhaɛ aɛizɔŋ gho. Ŋa aŋolinu, ugga eginu rʉkʉlɛ ŋieta ko kalɛa mele. ⁸ “Ko anda kosɨnʉŋ ugga, ghɔnɛa aghaya anda woyina eezu gho,Dhola eezo kɨdhɨ agha nɔnɔ woyina ko ekoshi Tamuo gho rɨgɨnɛ. ⁹ Ko nɔ ghɔnɛi agejha anda woyina eezu gho kɨdhɨ nɔnɔ kagɛd woyina ko ekoshi Tamuo gho. ¹⁰ Ko ghɔnɛa aliye nɔŋa gerre woyina ko Dholyi Eezo gho kɨdhɨ kadhozegho, ko nɔ ghɔnɔghɛi adhɔmɛ kʉlɔja hɔrɛ Tamuo gho kɨdhɨ ŋa kadhozegho. ¹¹ “Ko wassi unda kaunanyiŋɛ keiya Yehudhanu alaɛ Tamu woyi ŋieta bakio, gulsasɛzɔ, ŋa ezedhi nɔŋi ka bhɛgɛ ɛlɛa nunde gho dha gii kɨdhɨ ka ɔsɔa nuna gho, ¹² Ko saatija nyana kɨdhɨ kʉlɔja Tamuo hɔrɛ edhemiyi unda nɔŋi ka ɔsɔa gho. ¹³ Ko utumma kimsuja tɔ anne nɔnɔ, “Dhemiogi , osee ghɔzɔna ko kɛŋɛrta ghɨna adhote ko Anda. ¹⁴ Ko Yeso abhodhe, “Eeshi, ŋaɛnɛ abɛrana Anda ko kiye eeza kabagi nɔŋa gho dha kiye ibhashogi ŋieta noo gho?” ¹⁵ Ŋa nɔnɔ anne nɔgɔ , “ Ʉghʉghurɛghɔ! Ko ebhegi elezia ghoo ghɨnɛ kegine dhako gho bhaɛ , rʉgɨsa eezo ŋa adhumma ghɨnɛji mele ghunde olom gho, “ ¹⁶ Ko nɔnɔ osee nɔgɔ kalyi nyini: “Loja ko ʉtʉmma adhuna kɛɛrɛa shallɛ. ¹⁷ Ko nɔnɔ ɛzɛr kɛŋa nɨndɛ gho, ko iye anda kɨdhɨ kaminya? Anda ŋieti ka kerre gora ghande anjoni. ¹⁸ ”Ko nɔnɔ anne, “Nyini a giji kɨdhɨ Anda kami gho. Anda kɨdhɨ kayomi dɔja nande ko kɛghɛsha iya abbo ɔrrɔ odheshi ko ŋanyana Anda kamugɛ gɔra bhaɛ ko ghɨna ghande shallɛ. ¹⁹ Ko Anda kɨdhɨ kose ɛlɛa nande, “ Unda olomu ghɨna shallɛ mele iyaa kɨdhɨ ate harato mele, rʉghɨsa nunde ɛnɛ iye kabhaɛ,dhaghɔ , kudhɔ ko dhuma tɛra. ²⁰ “Ko nɔ Tamu anne nɔnɔ, “Unda daleshi nyini ! kɨdhɨ bhaliŋai rʉghɨsa nunde kadhi ŋieta .Ŋa kɨdhɨ aŋɛnɛ asɛrɛ ghɨnyi jega ame ɛlɛa nunde gho? ²¹ Nyini a giji kɨdhɨ amɨo eezaa iyaŋise ghɨna dɔjɛnɛ iyaa ko elezia ghee , ko nɔ ŋaɛnɛ bhɔzɔrɛn ŋieta Tamuo. ²² Ŋa yeso anne kobhogha ghɨndɛ: “Nɛghoɛ ,Anda kosɨnʉŋ ugga , ko ŋa ezejhu nɔŋa ko rʉghɨsa noo, ko gii kɨdhɨ adhashu gho ; dha nɔŋa ko elezia gho , dha gii kɨdhɨ ka malugɛ gho. ²³ Rʉghɨ ijara dhagine ko ɛlɛ ijara rummia . ²⁴ Nɔ ijinɛ kalɛi jegi dha: Nɔgɔ ŋa udugɛ dha ashishɛ , nɔgɔ ŋa ɔlɔmɛ keyi ɔlɔ dɔjɛn dha ashishɛ; ko nɔ Tamu irogi nɔgɔ. ko a ŋii izɔŋ ijaranŋu kalɛ gho! ²⁵ A ŋɛnɛ ŋieta noo nyini ezedhindo ɛndɛ atɔrnɛ saatija rʉghɨsa nɨndɛ gho?“ ²⁶ Ŋieta bhalɨ rɛnɛ Anda ŋa kamiɔ ghɨnyi jegi kitekite gho, aɛnɛ ezedhi iyaa ko ɨtɨŋŋɛ gho? ²⁷ Adho ijinɛ shɔ nyɔrɛna alɛ .Ko nɔgɔ ŋa amɛɛ dha amɛanɛ rummiza ghee.ko Anda kosɨnʉŋ ugga shɔ alan Sɔlɔmɔn ŋa kamalugɔyɔ hulla ko nyɔrɛnyi jegi aule gho. ²⁸ Aji nyini adhambishi rummia Tamuo adhito ko hartɛ ate guya gho; iyaa ate ŋai wassai ko lɔga kakole a ghɔnɔghɛi ɛnɛ izɔŋ mele kɨdhɨ aghumiŋɛ unda gho, Oh ugga ghɔnɔghɛa yewi kitekite jegi! ²⁹ Ko unda ŋa ezedhe sɨnɨsa gii adhagi dha aŋudhi: ŋa ezedhe nɔŋi jegi. ³⁰ Ko nɔ eeza ŋa a yɛbhɛ Tamu lʉza ŋaɨ arejone ghɨna nɔŋɛ jegi bhaɛ ko nɔ Baba noo agha nʉŋgo adhimmu nɔgɔ gho. ³¹ Ko nɔ ma ɛsheli tugainesa nɨnde, ko ghɨnyi jegi kɨdhɨ kanyjiŋɛ unda jʉʉrʉ. ³² ko ŋa aŋolinu lo,ugga arzaa jegi kite gho ,ko nɔ Baba noo elemunyuŋ ko kanyʉŋ ugga tugainesa nɨnde. ³³ Talɔ ghɨna ghunde ko anye shɔlayo. Ko nyini aghanguji shallɛ kɨdhɨ inyansɛ ghɨna ghunde amugi ko alyoyo gho. Ko kɨdhɨ ghɨna ghunde Tamua da kɨdhɨ kiŋaŋi jʉʉrʉ, ko ugurnyagi ŋa ogori ko dhu ŋa adhaŋɔ. ³⁴ Ko ŋietinyi amugenu ghinyi ghoo gho, kɨdhɨ sinezia ghoo ate ŋanyana rɨgɨnɛ. ³⁵ “Dhidhi bhuruje rummia ghunde ko aɔ kɔg nɔŋɛ Tamu gho ko lambasha ghunde kezernyanse. ³⁶ Hulla ko eezaa arɛyɛ eeza nee abbo ko kɔbhɔdha hololoa, ko wassi nɔnɔ akʉna gho ko udhuku tʉtʉg gho kote nɔnɔ dhogoni. ³⁷ Kɨdhɨ a shallɛ ɔrrɔ ŋieta ko garshi jega iyaa eeza nee abbo ajɔa nɔgɔ wassi nɔnɔ akʉna gho.Anda kosɨnʉŋ ugga dhereshi, kɨdhɨ nɔnɔ amalkɛ ɛlya nɨndɛ gho ko kɛyɛbhɔ, kɨdhɨ ɔlɔ nɔnɔ goŋgula kadhagine gho ko kɨdhɨakʉna ko arɛ nɔgɔ. ³⁸ Ko kɨdhɨ ashallɛ ɔrrɔ ŋieta ko garshi jaga ajɔa eeza nee abbo areye kɔg gho, shɔ aji nɔnɔ akʉna wassa ɛnɛ ramma dha iyo ashinyɛ balibali. ³⁹ Ko nɔ ɨsɨgɛ nɔŋi jegi :Shɔ aji mandinyɛ kisu agha a saatishi nɔnɔ kɨdhɨ akʉna ugurnyatɛ gho , nɔnɔ kɨdhɨ ŋa adhudhi kessa nɨndɛ ko koyomi gho. ⁴⁰ Ko ma ko ugga areinu kɔg, gaaji kɨdhɨ dhola eezo akʉna saatija shɔ ugga ŋa idhinde gho. ⁴¹ Ko Betros aghɨn , “Alan, unda osine kalyi nyini agga kɔdhɔ dha eeza bhaɛ?“ ⁴² Ko nɔ Alan abhodhe, “Aŋɛnɛ shallɛ ko aghughurɛ ɔjainda, ko aŋɛnɛ kanye kiye eeza abbo ko kerre kiye gulseja ko gara ghɨndɛ ko kanye dhagine saatija ɛnɛ dhereshi? ⁴³ Ko nɔ kɨdhɨ shalli ŋieta ko gara wa ijigɛ eeza abbo amɛɛ jʉʉrʉ wassai abhɔdha gho. ⁴⁴ Ko Anda kosɨnʉŋ ugga dhereshi nɔnɔ kɨdhɨ kerre nɔnɔ gulsasɛ bhaɛ ghɨnɛ ghɨndɛ gho. ⁴⁵ Ko aji gari anni sinɨsa nɨndɛ gho, “Alana nande ʉgɛ saati ŋanɨ ŋa abhodha ; ko ɛsɛgɛa ko urʉg gara majɛ ko iya ŋanye , ko adhato ko ugujho, ko nɔgɔ abhakɛ, ⁴⁶ Eeza abbo ko garti nyana kɨdhɨ akʉna wassaji ŋa aghaɛ nɨnɛ shɔ saatishi ka kigiyaɛ ŋa aghaɔ. Ko kɨdhɨ atɛr nɔnɔ kɨdhɨdhɨ-kɨdhɨdhɨ ko ɔtɔg nɔnɔ ko eeza ŋa ayɛbhɛ Tamu rɛna. ⁴⁷ “Ko nɔ garta agha ghɨna ko eeza nɨndɛ abbo gho, ko ŋa areye kɔg dha ŋa adhimo gaa anni, eeza nɨndɛ abbo ko kimɛɛ gho kɨdhɨ kaʉg ɔrrɔ dhogoni ghɨnɛji mele. ⁴⁸ Ko nɔ ghɔnɛa imag ghinyi ami eeza nɨndɛ abbo gho kɨdhɨ ko nɔnɔ ŋa kabagegho kɨdhɨ ko nɔnɔ kʉg ghɨnɛji ɛnɛ kasha . Ko ghɔnɔghɛji ɔlɔmɛ mele gho kɨdhɨ ko nɔgɔ kayɛ mele ŋieta nee. Ko ghɔnɔghɛa ɔlɔmɛ kasha kɨdhɨ ko nɔgɔ kayɛ kasha ŋieta nee. ⁴⁹ “Anda kakʉna ko kigyaɛ go lo ŋii, ko kagha nʉŋgo adhag ko iyeʉrda. ⁵⁰ Ko nɔ Anda kolomi shʉrɛ ghɔnɛa kanuɛ ŋietina gerre ko ŋieti kadhijanɛ! ⁵¹ Ko ugga annu Anda kakunanɛ ghanɔn lo ŋii? ⁵² Ko ŋoshondo wassi eeza a tʉr kɔrga nee gho kɨdhɨ aŋɛri kɛŋa, iyaa ɛnɛ iyo aghɛjɛ iya ɛnɛ ramma ko iyaa ɛnɛ ramma aghɛjɛ iya ɛnɛ iyo. ⁵³ Ko nɔgɔ kɨdhɨ aŋɛrɔ ,manyɛ kɨdhɨ agɛdhɔ ko eruja nɨndɛ ko eru agɛdhɔ ko manyɛ ,yaya agɛdhɔ ko sendheja nɨndɛ ko sendhe agɛdhɔ ko yaya nɨndɛ, ko alawɔn agɛdhɔ ko inyiga nɨndɛ. ⁵⁴ Ko nɔnɔ anni kimsu : “Wassai unda ijhe ido ɨŋa hurr kolo ,ko dhogoni unda anni , kɨdhɨ tamu aʉgho ko dhereshi uruga. ⁵⁵ Ko wassai ŋɔss akʉna lo-kolo gho, unda anni , “Kɨdhɨ wassai abhure ko iye dhereshi. ⁵⁶ Eezaa adhanu nɔŋa Tamuo! Ugga aghayu ŋietaji ɔtɔtɔgɛanyu nɔŋa kijhei lozu ko tamu ŋietina shʉllagɛ . Ko unda ŋa aghaɔ ŋieta kɔtɔtɔgɛ saatishi nyini? ⁵⁷ Aɛnɛ nʉŋgo ŋa abagegho ɛlɛa nunde gaa ɛnɛ dhereshi gho?. ⁵⁸ Aji unda ayu ko eeza aŋanyina bakia gho, nɔ woyi ato lʉza ko idhisha nɔŋa ghoo , aji eeza wa aŋanyina ŋanɨ ŋa asɨne gho , bhizɛ ŋieta ko eeza abag nɔŋa ko ŋa keregi kessa shebhio. ⁵⁹ Anda kosɨnʉŋ ugga wassi ugga kotʉŋ kessa shebhio gho kɨdhɨ ŋa abhunanuo dhul ko ŋieti ekesiyu ghɨna wa ɔsɔa eeza abag nɔŋa.