¹ Tarii yoon afaan namootaatii fi kan ergamootaatiin dubbadhe, garuu yoon jaalala hin qabaanne, ani dibbee sagaleen isaa guddaa yookaan bilbila kililchu ta’uu koo ti. ² Tarii yoon kennaa raajii dubbachuu qabaadhee dhgaawwanii fi beekumsa dhokataa yoon hubachuu danda’e, amantii gaara bakka isaatii buqqisu maras yoon qabaadhe, garuu jaalala yoon hin qabaatin, ani homaa miti. ³ Tarii yoon qabeenya koo mara warra hiyyeeyyii nyaachisuudhaf oolche, qaamni koo illee akka gubatuuf yoon dabarsee keenne, garuu yoon jaalala hin qabaatin, ani homaa hin argadhu. ⁴ Jaalalli obsaadhaa fi gara-laafessa. Jaalalli hinaafaa miti, of hin tuulus. Inni of hin bokoksu ⁵ yookaan hamaa miti. Inni waan kan ofii isaatii hin barbaaddatu. Inni waan kan biroodhaan hin kakaafamu, balleessaas nama irratti hin lakkaa’u. ⁶ Hamminattis inni hin gammadu. Ijaa kanaa, inni dhugaatti ni gammada. ⁷ Jaalalli waan hundumaa danda’a, waan hundumaa amana, waan hundumaa abdata, waan hundumaas ni danda’a. ⁸ Jaalalli dhumaa hin qabu. Raajiiwwan yoo jiraatan, isaan ni darbu. Afaan yoo jiraatan, gaaf-tokko ni dhaabbatu. Beekumsi yoo jiraate, inni ni darba. ⁹ Nuyi hanga tokko beekna, hanguma beeknu sanas raajii dubbannaatii. ¹⁰ Garuu yommuu inni dhugaa sun dhufutti, inni hir’uu ta’e sun ni darba. ¹¹ Yommuun daa’ima turetti, ani akka daa’imaattan dubbadhe, akka daa’imaattan yaade, akka daa’imaattan sababa kenne. Yommuun nama ga’eessa ta’etti, wanneen daa’imummaa darbadheen gate. ¹² Amma daawitii keessatti al-kallattiidhaan ilaalla, gaafa sanatti garuu fuulaa fuulatti. Ani amma hanga tokkon beeka, gaafa sana garuu guutummaattan beekuudhaaf jira akkuman guutummaatti beekame. ¹³ Amma garuu wanneen kana sadantu hafee jiraata: amantii, abdiidhaa fi jaalala. Garuu kanneen keessaa jaalalli isa ol aanaa dha.