17 ¹ وبعد هذا الكلام، شاف يسوع للسماء وقال: "ياباه، أجاء الوقت، مجد ابنك عشان يمجدك ابنك كمان. ² لأنك اعطيته السُلطة على كل بني آدم، عشان يجيب حياة الخلود لكل اللي جبتهم له. ³ وحياة الخلود هي إنو يعرفوك انت الإله الحق وحدك، ويعرفوا يسوع المسيح اللي أرسلته. ⁴ انا مجدتك على الأرض، إنو أنا كملت العمل اللي كلفتني علوه. ⁵ وذلحين مجدني لعندك يا باه بالمجد اللي كان لي عندك قبل خلق الناس كلهم. ⁶ انا اظهرت أسمك للي جبتهم لي من بين أهل العالم. كانوا هم لك وأنت جبتهم لي. وهم عملوا بكلامك، ⁷ وعرفوا ذلحين انُه كل اللي جبته لي هو من عندك. ⁸ أنا بلغتهم الرسالة اللي جبتها لي. وهم قبلوها وعرفوا من صدق إنو انا جيت من عندك، وآمنوا انك انت رسلتنا. ⁹ عشان هاذم اصلي. ما اصليش ذلحين عشان العالم، إنما للي جبتهم لي لأنهم لك. ¹⁰ وكل ماهو لي هو لك، وكل ماهو لك هو لي. وانا اتمجدت فيبهم. ¹¹ هم باقيين بيهذي العالم، بس انا مشبقيش بيهذي العالم، لانُنا راجع لك. أيها الأب القدوس، أحفظهم بقوة أسمك اللي جبته لي، عشان يكونوا واحد، مثلما انا وأنت واحد. ¹² لما كُنت معهم، حافظت عليهم وحرستهم بقوة أسمك اللي جبته لي، وما هلكش منهم ولا واحد الإ اللي اختار لنفسه الهلاك ليحصل باللي أجاء بالكتاب. ¹³ وذلحين انا راجع لعندك، وإنما اتكلم هذه الحاجات وأنا عادنا مازلت بالعالم، عشان يفرحوا مثلي فرحة كاملة. ¹⁴ أنا بلغتهم كلمتك، فكرهوهم اهل العالم لأنهم مش من أصحاب العالم، مثلما أنا مش من العالم. ¹⁵ أنا ما أطلب منك تأخذهم من العالم، إنما تحفظهم من اللي هو شرير. ¹⁶ هم مش من اصحاب العالم، مثلما انا مش من العالم. ¹⁷ إجعلهم مُخصصين عشانك عن طريق الحق. كلمتــــك هي الحق. ¹⁸ ومثلما ارسلتنا للعالم، انا كمان أرسلتهم للعالم. ¹⁹ وانا خصصت نفسي تماماً عشانهم، عشان يكرسوا هم كمان أنفسهم تماماً للحق. ²⁰ وما أصليش عشان هاذم بس، إنما كمان أصلي للناس اللي يؤمنوا بي بواسطة كلامهم. ²¹ عشان يكون الجميع واحد، أيها الأب، مثلما أنت فيبي وانا فيبك، ليكونوا هم كمان فيبنا، عشان يؤمن الناس اللي بالعالم أنك انت اللي رسلتنا. ²² أنا كرمتهم بنفس إكرامك لي، عشان يكونوا واحد، مثلما أنا وانت واحد. ²³ انا موجود فيبهم وانت فيبي لتكون وحدتهم مكتملة، فيعرف أهل العالم أنك أرسلتنا وأنك تحبهم مثلما تحبنا.

²⁴ أيها الأب، هاذم اللي جبتهم لي أشتيهم يكونوا معي في المكان اللي أكون فيبه، فيشوفوا المجد اللي جبته لي، لانك حبيتنا قبل خلق العالم. ²⁵ أيها الأب البار، أهل العالم ماعرفوكش، أما أنا فعرفتك. وهاذم عرفوا أنك أرسلتنا. ²⁶ أنا عرفتهم بشخصيتك، وشأعرفهم بها، عشان تكون بهم المحبه اللي أحببتنا بها، وأكون انا فيبهم."