16 ¹ قلت لكم هذه الحاجات عشان ما تتراجعوا. ² شيطردونكم من المجامع، بل شيجي وقت، يتوقع فيبه أُنُه اللي شيقتلكم هو يعمل خدمه لله. ³ وهم شيعملوا هذا، لأنهم ما يعرفوش لا أبي ولا يعرفونا. ⁴ بس أن كلمتكم بيهذا عشان لما يجي الوقت و تحصل هذه الحاجات، تتذكروا إنو انا كلمتكم عليها. انا ما تكلمتش عليها من قبل لإنو أنا كنتو معكم. ⁵ اما ذلحين، انا ماشي لعند اللي أرسلني، ومع هذا ولا واحد منكم يسألنا: "وين بتشمي؟ ⁶ لكن لما كلمتكم بهذه الحاجات، الحزن ملأ قلوبكم. ⁷ لكن أنا أقلكم الصدق، انه خير لكم أننا أمشي، لانُه اذا ما مشيتش ما شيجيش لكم المُعين، لكن اذا مشيت أنا شارسله لكم. ⁸ ولما يجيء شيبين للناس اللي بالدنيا أنهم على خطأ من جهة الخطيئة والصلاح والعقاب. ⁹ الخطيئة حقهم انهم ما يؤمنوش بيا. ¹⁰ وصلاحي يظهر إنو انا راجع لعند الأب وما شتشوفوناش. ¹¹ والعقاب هو الحكم اللي خرج على سيد هذي الدنيا.

¹² عندي الكثير عشان اقول لكم فيبه، بس ما تقدروش تتحملوها ذلحين. ¹³ بس لما يجيء روح الحق شيوريكم بكل الحق، لأنه ما يقولوش حاجه من عنده، وهو شيتكلم باللي يسمعه وشيكلمكم باللي شيحصل. ¹⁴ وهو شيمجدنا، لإنو اللي شيكلمكم بُه هو من عندي. ¹⁵ كل اللي هو للأب هو لي. وعشان هذا كلمتكم إنو اللي شيتكلم بُه هو من عندي. ¹⁶ بعد شوية ما شتشوفوناش، وبعدين بشوية شتشوفونا." ¹⁷ فأتكلموا بعض تلاميذه مع بعضهم: "ايش يقصد بكلامه لنا: بعد شوية ما شتشوفونيش، وبعد شوية شتشوفونا، وبعدين يقولنا كمان انا راجع لعند الأب؟" ¹⁸ وقالوا: "ايش يقصد بعد شوية؟ إحنا ما نفهمش كلامه." ¹⁹ وعرف يسوع أنهم يشتوا يسألوه، فقلهم: "تتسألوا بينكم البين على كلامي: بعد شوية ما شتشوفوناش، وبعدين بشوية شتشوفونا. ²⁰ أقول لكم الصدق، شتبكوا وشتنوحوا، اما الناس اللي بالدنيا شيفرحوا. شتزعلوا بس زعلكم شيرجع لفرح. ²¹ المرة تتوجع وهي تولد لإنو وقتها اجئ. بس لما تولد بالجاهل حقها، تنسي أوجاعها لأنها تفرح بولادة إنسان بالدنيا. ²² وانتم كمان شتزعلوا ذلحين، بس انا شاشوفكم مرة ثانية، وشتفرح قلوبكم، ولا في واحد شيسرق فرحتكم منكم. ²³ وبيهذاك اليوم، ما شتطلبوش مني حاجة. أقول لكم الصدق، كل اللي شتطلبونه من الأب باسمي شيجيبه لكم. ²⁴ لحد ذلحين ما طلبتمُش ولا حاجة بأسمي. أطلبوا شتحصلوا وشتكون فرحتكم مُكتملة.

²⁵ جبت لكم أمثال بكلامي معكم بهذه الأمور، ولكن شيجي وقت أكلمكم فيبه عن الآب بكلام واضح وبدون أمثال. ²⁶ بيهذاك اليوم شتطلبوا من الآب باسمي. وانا ما كلمتكمش انُه انا شاطلب الاب بدل منكم. ²⁷ فالأب نفسه يحبكم، لأنكم تحبونا وآمنتم أنو أنا أجيتو من الله. ²⁸ نعم، أجيتو من عند الأب، وجيتو لهذي الدنيا، وبعدين أترك الدنيا وأمشي لعند الأب."

²⁹ فقالوا تلاميذه: "أنت تكلمنا كلام واضح بدون أمثال. ³⁰ وإحنا نعرف الآن أنك تعرف كل حاجة، وما تحتجش لواحد يسألك، لهذا إحنا نؤمن انك اجيت من الله." ³¹ جاوب عليهم يسوع: "هل تؤمنوا الآن؟ ³² شيجي وقت، بل حان الوقت اللي فيبه تتفرقوا كل واحد في حاله وتسيبوني وحدي. بس أنا مش وحدي لإنو الاب معي. ³³ كلمتكم بيهذا عشان يكون عندكم سلام بواسطتي. شتتعبوا من الضيق بيهذي الدنيا، لكن ثقوا أنا قاغلبت الدنيا. "