15 ¹ قال يسوع المسيح: "أنا العنب الحقيقي، وأبي هو صاحب العنب. ² كل غُصن فيبي ما يعملش ثمر يَقطَعُه، وكل غُصن يعمل ثمر ينقيه عشان يعمل ثمر أكثر. ³ أنتم الأن أنقياء بسبب الكلام اللي قلته لكم. ⁴ إتمسكوا فيبي وانا شاتمسك فيبكم، ما يقدرش الغُصن إنو يجيب ثمر من نفسه، إلا إذا كان ماسك بشجرة العنب، أنتم كِذا ما تقدروش تجيبوا ثمر إلا إذا تمسكتم فيبي. ⁵ أنا شجرة العنب وأنتم الأغصان. اللي يتمسك فيبي واتمسك أنا فيبه، يجيب ثمر كثير، لإنكم بدوني ما تقدروش تعملوا شيء. ⁶ وأي واحد ما يتمسّكش فيبي يُرمىَ بعيد مثل الغُصن اليابس. والأغصان اليابسه تُجمع وتُرمى للنار وتُحرق. ⁷ لكن إذا تمسكتم فيبي وثبت كلامي فيبكم، إطلبوا اللي تشتوا بتحصلُنُوه. ⁸ بهذا يتمجد أبي: إنو تجيبوا ثمر كثير، فيظهُر إنكم تلاميذي. ⁹ مثلما حبنا الآب، أنا كمان حبيتكم، فاتمسكوا بمحبتي. ¹⁰ إذا أطعتُم وصاياي شتتمسكوا بمحبتي، مثلما أنا أطيع وصايا أبي واتمسك بمحبتُه. ¹¹ قلتو لكم كذا، عشان تفرحوا مثلي، ويكون فرحكم مكتمل.

¹² هذه هي وصيتي لكم: إنو تحبوا بعضكم البعض، مثلما أنا حبيتكم. ¹³ ما فيش محبة أعظم من إنو الواحد يُضحي بنفسه عشان أحبابه. ¹⁴ أنتم أحبابي إذا عملتم باللي أوصيتكم فيبُه. ¹⁵ بعد الآن ماعاد بسميكم عبيـد، لإنو العبد ما يعرفش إيش اللي يعملُه سيده. لكن سميتكُم أحباء. لإننا كلمتكم بكل ما سِمعتُه من أبي. ¹⁶ موش أنتم اللي إخترتونا، أنا اللي إخترتكم وعينتُكم عشان تروحوا وتجيبوا ثمر، و يدوم ثمركم، ويعطيكم الآب أي شيء تطلُبونُه بإسمي. ¹⁷ هذه هي وصيتي لكم: إنو تحبوا بعضكم بعض. ¹⁸ إذا كرهكم العالم، إتذكروا إنو كِرهنا قبل ما يكرهكم. ¹⁹ لو كنتم من أهل العالم، كان العالم شِحبكم مثلما يحب أهلُه. لكن أنا أخترتكم من العالم، فانتم موش من أهلُه، عشان كِذا يكرهونكم. ²⁰ إتذكروا كلامي اللي قلتو لكم: "ما فيش عبد أعظم من سيده. إذا كان أهل العالم قا ضطهدونا، برضو أنتم شضطهدوكم، وإذا أطاعوا كلامي، شِيطعوا كلامكم برضوا. ²¹ بس هم شِعملوا ذى كُلُه بكم بسبب إسمي، لإنهم ما يعرفوش اللي أرسلنا. ²² لو ما كُنتوش أجيتو وكلمتُوهم، ما كنش عليهم ذنب، لكن الآن ما فيش معهم عُـذر بذنبهم. ²³ اللي يكرهنا يكره أبي برضو. ²⁴ لو ما كنتوش عملتو بينهم معجزات ماحد عملها غيري، ما كنش عليهم ذنب، لكن هم شافوا معجزاتي، وكِرهونا أنا وأبي. ²⁵ لكن هذا حصل عشان يتحقق الكلام اللي جاء بالتوراة: كرهونا بلا سبب.

²⁶ ولما يجي المُـعين اللي شارسِلُه لكم من عند الآب، روح الحق اللي يجي من عند الأب، هــو شِشهد ليَ. ²⁷ وتشهدوا لي أنتم برضو، لإنكم معي من البداية.