14 ¹ "لا ترتجف قلوبكم، أنتم تُؤمنوا بالله ، إإمنوا فيبي برضو. ² ببيت أبي غرف كثير،لو مُوش هذا صحيح،ما كُنتو كلمتكم ،أنا رايح أجهز لكم مكان. ³ وبعد ما أروح وأجهز لكم المكان،شرجع وآخذكم معي ،عشان تكون معي بالمكان اللي أنا فيه. ⁴ أنتم تعرفوا الطريق،وتعرفوا وين أنا رايح." ⁵ قال لُه تُوما :" ياسـيد نِحنا ما نعرفش وين أنت رايح ، كيف شنعرف الطريق؟."

⁶ قال لُه يسوع المسيح:" أنا هو الطريق والحق والحياة ،مايقدرش أحد إنو يجي للآب إلا بواسطتي." ⁷ لو كُنتم عرفتُونا شتعرِفوا أبي برضو،لكن من الآن تعرِفونُه وقد شِفتنوه." ⁸ فقال لُه فيلُبُّس:" يا سيد ،خلينا نشوف الآب،و هذا يكفينحنا ." ⁹ جاوبُه يسوع المسيح:" جلستو معكم كل هذه المُدة الطويل ، ومكانك ما عرفتناش يا فِيلِبُّس؟ اللي شافنا شاف الآب، كيف تقول: خلينا نشوف الأب ؟ ¹⁰ تؤمن إنو أنا في الأب،والآب فيبي؟ الكلام اللي أتكلم به معكم ما أجيبُش من عندي،لكن الآب اللي ساكن فيبي هو اللي يعمل أعماله. ¹¹ صدقونا لما أقولكم إنو أنا في الأب وانو الأب فيبي،أو على الأقل صدقونا بسبب المعجزات نفسها. ¹² أقولكم الصدق:" اللي يؤمن فيبيَ ، شِعمل الأعمال اللي أنا أعملِه، ويعمل أعظم مِنه، لإنو أنا رايح عند أبي. ¹³ أي شيء تطلبُونُه بِاسمي أنفِذُه لكم،عشان يتمجد الأب بواسطة الإبن. ¹⁴ إذا طلبتم مني شيء باسمي،أنفِذُه." ¹⁵ "إذا أنتم تحبونا ،إعملوا بوصاياي، ¹⁶ وانا شاطلُب من الأب ،إنو يرسِل لكم مُعين آخر يبقي معكم للأبد، ¹⁷ وهـو روح الحق،اللي مايقدروش أهل العالم يتقبلونُه، لإنهم ما يشوفنوش ولا يعرفونُه، بس أنتم تعرفونُه لإنو يعيش معكم ،وشكون بداخلكم. ¹⁸ ما شَخليكُمش مثل الأيتام ،لكن شرجع لكم . ¹⁹ بعد شويه مايشوفناش العالم،لكن أنتم تشوفُنَّا،لإنو أنا حيَّ فأنتم أحياء. ²⁰ بآذاك اليوم شتعرِفوا إنو أنا في أبي،وأنتم فيبي ،وأنا فيبكم. ²¹ اللي يقبل وصاياي ويعمل فيبه فهو اللي يحبنا، واللي يحبنا، يحِبُه أبي وانا أحِبُّه وأظهِر لُه نفسي."

²² فسأله يهوذا، واحد ثاني غير يهوذا الإسخريوطي:" ياسيد، ليش ناوي تظهِر نفسك لنا نِحنا، وماتظهُرش للعالم؟." ²³ جاوبُه يسوع المسيح :" اللي يحبنا يعمل بكلامي، و أبي يحبُه ،ونروح له ونسكُن معُه . ²⁴ والذي ما يحبناش مايعملش بكلامي ،هذا الكلام اللي تسمعنُوه موش من عندي، هـو كلام الآب اللي رسلنا. ²⁵ كلمتكم بهذه الأمور وانا عادنا عندكم . ²⁶ لكن المُعين، الروح القُدس اللي شِيرسِلُه الآب لكم بإسمي،هـو شُعلِّمكُم كل شيء، وشيذكِّركُم بكل ما قُلته لكم .

²⁷ بخلي لكم سلام، أعطيكم سلامي أنا، ما أجيب لكم سلام مثل الذي يجيبه العالم،لا تقلق قلوبكم ولا تخافوا. ²⁸ سمعتم اللي قلتُه لكم : أنا رايح،وبرجع لكم .لو كنتم تحبونا ،كنتم شتفرحوا لإننا شاروح للآب ،لإنو الآب أعظم مني . ²⁹ كلمتكم بهذا الشيء الآن قبل ما يحصُل، ولما يحصُل تُؤمنوا . ³¹ لكن هذه الأمور شتحصُل عشان يعرف العالم إننا أحب الآب، و إننا أعمل مثلما أوصاناالأب،قوموا الآن نمشي من هِنا ."