4 ويسوع كان عارف باللي شيقع به، فخرج لعندهم وقلهم:"منو تشتوا؟" 5 فجاوبوه: "يسوع الناصري." فقلهم: "أنا هو" ويهوذا اللي خانه كان واقف معهم. 6 ولما قلهم: "أنا هو" رجعوا لوراء وسقطوا للأرض! 7 فرجع يسوع وسألهم مرة ثانية: "منو تشتوا؟" فجاوبوه: "يسوع الناصري". 8 فقلهم يسوع: "قولتولكم: أنا هو، لأنتم تشتونا أنا، خلوا هاذوم يمشوا." 9 وبهذا تمت الكلمة اللي قالها: "ما هلكش ولا واحد من اللي جبتهم لي."
10 وكان به مع سمعان بطرس سيف فخرجه وضرب خادم رئيس الكهنة، فاقطتعت أذنه اليمين. وكان اسم العبد ملخس. 11 فقال يسوع لبطرس: "رجع السيف لغمده! الكأس اللي جابه لي الآب، ألا أشربه؟"
12 الفرقة والقائد وحرس الهيكل مسكوا يسوع وقيدوه. 13 وشلوه بالأول لعند حنَّان اللي هو حمو قيافا رئيس الكهنة بهذك السنة. 14 وقيافا هو اللي نصح اليهود أنوه أحسن لهم يموت رجال واحد فدى الشعب. 15 وتبعوا بعد يسوع سمعان بطرس وتلميذ ثاني كان يعرفه رئيس الكهنة، فدخل مع يسوع لبيت رئيس الكهنة. 16 وأما بطرس وقف خارج الباب. وخرج التلميذ الثاني اللي يعرفه رئيس الكهنة، وكلم البنت البوابة و أدخل بطرس. 17 وسألت الخادمة البوابة بطرس: "مش أنت واحد من تلاميذ هذا الرجال؟" فقله: "لا، ما نش واحد منهم!" 18 وكان الجو بارد وقد الأخدام والحرس أوقدوا نار، ووقفوا يدفئو جنبها، ووقف بطرس يدفئ معاهم. 19 ورئيس الكهنة سأل يسوع عن تلاميذه وتعليمه. 20 فجاوبه يسوع: "تكلمت للعالم با العلن، ودائماً درست بالمجمع والهيكل مكان تجمع اليهود كُلهم، وما قلتش حاجة بالخفاء. 21 وليش تسألنا أنا؟ اسأل اللي سمعوا اللي كنت اتكلم فيبه لهم، هم يعرفوا اللي قلته" 22 ولما قال يسوع هذا الكلام لطمه واحد من الحرس وقله: "هكذا تجاوب رئيس الكهنة؟" 23 فقله يسوع: "لو أنا غلطت بالكلام فاشهد على غلطتي، ولو أنا تكلمت صح، فليش تضربنا؟" 24 وبعدين رسله حنَّان مقيد لعند قيافا رئيس الكهنة. 25 وبطرس كان واقف يدفئ، فسألوه: "مش أنت كمان واحد من تلاميذه؟" فأنكر وقلهم: "مش أنا واحد منهم". 26 وفي واحد من اخدام رئيس الكهنة وهو صهر الرجال اللي قطع بطرس أذنه: "أو شفتك مع يسوع في البستان؟" 27 وبطرس أنكر يسوع مرة ثالثة. وبنفس الوقت الديك صاح. 28 وشلوا يسوع من بيت قيافا لعند قصر الحاكم الروماني، وكان الصبح قد طلع، وما دخلوش اليهود القصر، عشان ما يتنجسوا فما يأكلوش من خروف الفصح . 29 فخرج لعندهم بيلاطس وسألهم: "بإيش تتهموا الرجال هذا؟" 30 فجاوبوه: "لو مش مذنب، لما اديناه لعندك" 31 فقلهم بيلاطس: "شلوه أنتم وحاكموه حسب شريعتكم." فجاوبوه: "ما يحقش لنا نقتل واحد" 32 وحصل هذا ليقع اللي قاله يسوع للطريقة اللي شيموت فيبه.
33 فدخل بيلاطس قصره ودعا يسوع وسأله: "أنت ملك اليهود؟" 34 فقله يسوع: "الكلام هذا من عندك، أو في ناس قالوا لك عني؟" 35 فقله بيلاطس: "أو أنا يهودي؟ شعبك ورؤساء الكهنة جابوك لعندي. إيش عملت؟" 36 فجوب له يسوع: "مملكتي مش من العالم هذا، ولو مملكتي من العالم هذا، الفا الحراس حقي يقاتلوا عشان ما سلمش لعند اليهود. وأما ذلحين مملكتي مش من هنا." 37 فسأله بيلاطس: "أو أنت ملك؟" فجاوبه: "أنت تقول، أني ملك. وعشان هذه ولدت وجئت للعالم: أشهد للحق. وكُل اللي ينتمي للحق يسمع صوتي." 38 وقله بيلاطس: "إيش الحق؟" وبعدا خرج بيلاطس لليهود وقلهم: "ما لقتش فيبه و لا ذنب. 39 وكل مرة تعودتم بعيد الفصح أخرج لكم واحد محبوس. فهل تشتوا أخرج لكم ملك اليهود؟" 40 فصرخوا كُلهم: "لا تخرجش هذا، خرج لنا باراباس." وباراباس كان سارق.