7 كنتم تجروا جري تمام، منه اللي منعكم عشان ما تطيعوا الحق؟ 8 هذا التضليل ماهوش من الله اللي دعيكم. 9 إتذكروا إنه خميرة صغيرة تُخمر العجين كله. 10 أنا ثقتي بالرب انكم بتقتنعوا باللي قُلته لكم،وما بتقبلوا رأي ثاني،ومهما كان الشخص اللي يزعجكم بيدفع الثمن كائن من كان. 11 أما انا يا اخوتي، إذا هو صحيح إنه مكاننا أقول على الختان إنه ضروري، فليش اليهود يسيئوا ليّا لحد الآن؟ وماعاد بيكون الصليب عائق قدام احد. 12 قولوا للي يزعجونكم بهذا الشيء، يخصُوا أنفسهم !
13 يا اخوتي، أنتم دُعيتم عشان تكونوا أحرار.لكن لا تستغلوش حريتكم هذه وتخلوها عذرعشان تنفذوا رغباتكم الدنيوية،لكن بالمحبة كل واحد يخدم الثاني. 14 فالتوراة كلها نقدر نلخصها بوصية واحدة :"تحب الآخرين مثلما تحب نفسك" 15 لكن إذا كنتم مثل الوحوش كل واحد ينهش ويأكل الثاني،فانتبهوا إنه واحد ينهي الثاني. 16 انا قصدي أقولكم :عيشوا وخلوا الروح هو اللي يقودكم، وبكذا ماعاد بتفكروا بشهوات الجسد أبداً. 17 فالطبيعة الجسدية تشتهي عكس ما تشتهي الروح،والروح تشتهي عكس ما تشتهي الطبيعة الجسدية،كل واحد يشتهي عكس الثاني،وماعاد تقدروا تعملوا اللي تشتوا. 18 لكن إذا انتم تمشوا بالروح، مابتكونوش عبيد للتوراة. 19 وأعمال الجسد ظاهرة، اللي هي: الزنا،والنجاسة،والدعارة، 20 وعبادة الأصنام،والسحر،والعداوة، والخصام، والغيرة، والغضب،والأنانية، والإنقسام، والتعصب، 21 والحسد والسُكاروالعربدة، وكل الأشياء اللي تشبه هذه، أحذركم الآن مثلما حذرتكم من قبل، إنه اللي يعملوا هذه مالهمش نصيب بمملكة الله.
22 أما الثمر اللي ينتجه الروح فهو: المحبة، والفرح، والسلام ، والصبر، واللُطف ،والخير، والأمانة، 23 والوداعة ،وضبط النفس.مافيش قانون يمنع هذه الأمور. 24 فاللي يتبعوا المسيح يسوع،صلبوا الطبيعة البشرية مع الشهوات والرغبات الشريرة. 25 إذا كنا نعيش بالروح، نمشي مثلما يقول لنا الروح. 26 وما نكونش مغرورين،و ماحد يزعل الثاني، وما حد يحسد الثاني.