4 ¹ معنى كلامي إنه مادام الوارث عاده قاصر،مافيش فرق بينه وبين العبد،رغم إنه صاحب التركة كله، ² يبقي عليه أوصاياء ووكلاء لما تنتهي الفترة اللي حددها أبوه. ³ ونفس الشيء بالنسبة لنا: نحنا لما كنا قاصرين روحياً،كنا عبيد لقوانين هذا العالم. ⁴ لكن لما جاء الوقت المناسب،أرسل الله إبنه الذي ولد من مرأة وعاش تحت سلطة التوراة. ⁵ من شان يحرر اللي هم تحت سلطة التوراة،ونكون أبناء الله. ⁶ والدليل على انكم أبناء الله،هو إنه أرسل روح ابنه لقلوبنا،يصيح :"يا بابا، يا ابا" ⁷ إذن،بعد الآن انت موش عبد،أنت ابن.ولإنك ابن فالله أنعم عليك وجاب لك نصيب من بركاته. ⁸ بالماضي،لما كنتم ما تعرفوش الله ، كنتم عبيد لآلهة مزيفة. ⁹ لكن الآن أنتم تعرفوا الله،أو الصدق الله هو يعرفكم،فكيف تشتوا ترجعوا عبيد للمبادئ الضعيفة واللي ما منها فائدة اللي كانت بالماضي؟ ¹⁰ تحتفلوا بمناسبات : أيام وشهور ومواسم وسنين! ¹¹ أنا خائف عليكم،أخاف يكون تعبي معكم ضاع بلا فائدة.

¹² أترجيكم يا أخوة ، إنه تكونوا مثلي، مثلما أنا مثلكم.أنتم ما ظلمتونا بشيء. ¹³ أنتم تعرفوا اننا كنت مريض لما زرتكم وبشرتكم بالإنجيل لأول مرة. ¹⁴ ورغم انه مرضي هذا كان مُتعب لكم ،لكن أنت ما احتقرتوناش ولا هربتم مني،بالعكس رحبتم فيبي كأننا ملاك من عند الله،وكأننا المسيح يسوع نفسه. ¹⁵ وين راح مدحكم ليّا؟أنا اشهد لكم إنكم كنتم شتقلعوا عيونكم وتجيبوها لي لو قدرتم. ¹⁶ هل الآن أنا رجعت ُعدو لكم لإننا كلمتكم بالصدق؟ ¹⁷ هذوم اللي يظهروا إنهم يهتموا فيبكم ما همش صادقين،هدفهم إنهم يبعدونكم عليّا،عشان تنضموا معهم. ¹⁸ تمام إنه يهتموا فيبكم،لو إهتمام بصدق وبكل وقت موش بس لما اكون عندكم. ¹⁹ أنتم أولادي، وانا أتألم من شانكم مرة ثاني، مثلما تتألم المرأة وقت الولادة، لما أشوف تنطبع فيبكم صفات المسيح. ²⁰ كنت أتمنى الآن أكون موجود عندكم،عشان أتكلم معكم بطريقة مختلف، لإننا متحيرماعاد دريت كيف أتعامل معكم. ²¹ قولوا لي يا اللي تشتوا ترجعوا عبيد للتوراة: ليش ما تسمعوا إيش تقول التوراة؟ ²² تقول إنه إبراهيم كان معه إثنين أولاد :واحد أمه جارية،والثاني أمه مرأة حُرة. ²³ فاللي أمه جارية خُلق بطريقة طبيعية،أما ابن الحُرة خلق بوعد من الله. ²⁴ وهذا الشيء له هدف،فالثنتين النسوان رمز لعهدين: الأول من جبل سيناء، وينجب أولاد يكونوا عبيد، ورمزه هاجر. ²⁵ وكلمة هاجرتعني جبل سيناء ببلاد العرب،وترمز لمدينة القدس الحالية،لإنه هي وأولاده عبيد الآن. ²⁶ أما العهد الثاني،اللي رمزه المرأة الحرة تعني القدس السماوية اللي هي أُمنا. ²⁷ لإنه الكتاب يقول:" يا عاقراللي ما تولدي إفرحي،صيّحي بكل صوتِكِ ياللي ما تعرفي ألم الولادة،لإن أولاد المره المهجور شيكونوا أكثر من عدد أولاد المتزوجة."

²⁸ أما انتم يااخواني، أبناء الله حسب الوعد ، مثلما كان إسحاق. ²⁹ ومثلما حصل بهذيك الأيام ، إنه الابن اللي وُلِد بطريقة طبيعية كان يسيئ للي ولد بقوة روح الله،وهذا اللي يحصل الآن كمان. ³⁰ لكن الكتاب إيش يقول؟ "إطرد الجارية وابنه بعيد،لإنه ابن الجارية ما يورثش مع ابن الحُرة" ³¹ عشان كذا ياإخوة،نحنا موش أولاد الجارية،نحنا أولاد الحُرة.