3 ¹ يا أهل غلاطية الأغبياء!منه اللي سحرعقولكم،عشان تتوقفوا عن طاعة الحق؟أنتم اللي يسوع المسيح إرتسم بعقولكم وهو مصلوب كأنه قدام عيونكم! ² أشتي أعرف منكم شيء واحد بس: هل أخذتم روح الله بسبب عملكم بالتوراة ولا بسبب إنكم سمعتم الإنجيل و آمنتم فيبه؟ ³ لهذا الحد أنتم أغبياء؟بعد ما بدأتم بروح الله،تعتقدوا انكم بتكملوا بمجهودكم البشري؟ ⁴ وهل اختبرتم كل هذه الأمور بدون فائدة؟وكيف يمكن إنه تكون بلا فائدة؟ ⁵ هل الله يعطيكم الروح، ويعمل بينكم معجزات بسبب التوراة،ولا لإنكم سمعتم الإنجيل وأمنتم فيبه؟ ⁶ مثلما هو مكتوب على إبراهيم :" آمن إبراهيم بالله،فاعتبره الله صالح بسبب إيمانه." ⁷ لازم تعرفوا إنه اللي يؤمنوا هم أولاد إبراهيم بصدق. ⁸ عشان كذا الكتاب تنبأ بأن الله شعتبر الناس من كل الأمم صالحين عنده بسبب إيمانهم،وبشر إبراهيم من قبل وقال له:" كل الأمم شتتبارك فيبك" ⁹ فكل اللي يؤمنوا يباركهم الله،مثلما بارك إبراهيم الذي آمن. ¹⁰ أما اللي يعتمدوا على انهم يعملوا بالتوراة، فهم ملاعين،لإنه الكتاب يقول:" ملعون الذي ما يلتزم بكل ماهو مكتوب بكتاب التوراة." ¹¹ والواضح إنه مافيش احد يعتبرصالح عند الله بواسطة التوراة،لإنه الكتاب يقول:"الصالح بالإيمان يحيا" ¹² أما التوراة ما تعتمدش على الإيمان، تعتمد على الأعمال.فالكتاب يقول:"الذي يعمل بكل الوصايا اللي بالتوراة يحيا فيبها" ¹³ لكن المسيح حررنحنا من اللعنة المذكورة بالتوراة،وطرح نفسه تحت اللعنة من شاننا،لإنه الكتاب يقول:"ملعون كل من يُصلب على خشبة." ¹⁴ فالبركة اللي جابها الله لإبراهيم ، شتنتقل لبقية الأمم بواسطة المسيح يسوع،ونقبل بالإيمان الروح اللي وعدنا الله فيبه. ¹⁵ يا اخوة،بجيب لكم مثال من حياتنا اليومية:لما يكون معنا عقد مكتوب، ماحد يقدر يلغوه أو يضيف عليه. ¹⁶ ونفس الشيء هنا: الله أعطي وعد لإبراهيم ونسلُه،وما قال له"أنسالك" بالجمع،قال "نسلك"بالمفرد،يقصد المسيح. ¹⁷ الذي أقصده هو إنه الله عمل عهد مع إبراهيم،إذن فالتوراة أجاءت بعد كذا بأربعمائة وثلاثين سنة،لا يمكن إنها تبطل الوعد. ¹⁸ لو كنا بنحصل على هذه البركة بطاعتنا للتوراة،مافيش داعي للوعد! لكن المعروف إنه الله جاب البركة لإبراهيم بوعد. ¹⁹ إذن إيش الهدف من التوراة؟ الجواب هو من شان تبين حقيقة المعاصي،وجاءت عن طريق الملائكة على يد وسيط ، لما يجي النسل الموعود فيبه. ²⁰ والوسيط يعني إنه في أكثر من طرف واحد، لكن الله واحد.

²¹ هل يعني هذا إنه التوراة تناقض وعود الله؟ أكيد لا!لإنه لو كانت التوراة قادرة إنه تعطي الحياة ،كنا بنعمل بالتوراة وشنعتبرعند الله صالحين. ²² لكن الكتاب يبين إنه العالم كله مقيد بالمعصية،من شان الله يجيب الوعد بالإيمان بس للي يؤمنوا بيسوع المسيح. ²³ لكن قبل ما جاء هذا الإيمان،كنا محبوسين بالتوراة.وماكنش لنا حرية، حتى كشف الله لنا الإيمان المنتظر. ²⁴ فالتوراة كانت هي المربي لنا، بينما يجي المسيح،من شان نعتبر صالحين عند الله بالإيمان. ²⁵ لكن بعد ما جاء الإيمان، تحررنا من وصاية التوراة. ²⁶ أنتم كلكم أبناء الله بالإيمان بالمسيح يسوع. ²⁷ لإنه كلكم اللي تعمدتم بالمسيح، لبستم المسيح كأنه ثوب. ²⁸ فالآن مافيش فرق بين يهودي ويوناني، ولا بين عبد وحر،ولا بين ذكر وانثى ،أنتم كلكم واحد لإنكم تنتسبو للمسيح يسوع. ²⁹ ولإنكم للمسيح ،إذن فأنتم ذرية إبراهيم ، ولكم نصيب بالبركة اللي وعد الله فيبه.