6 ولما عرف بولس إنو بعض أعضاء المجلس من مذهب الصدوقيين، والبعض الآخر علماء الشريعة، صاح داخل المجلس وقال :"يا إخواني ،أنا واحد من علماء الشريعة وأبن واحد من علماء الشريعة وأتحاكم الان هنا لإننا مؤمن بالقيامة ."
7 لما قال هذا الكلام، حصل خلاف داخل المجلس،بين علماء الشريعة والصدوقيين من أعضاء المجلس، فاتقسموا الحاضرين . 8 لإنو الصدوقيين ينكروا القيامة والملائكة والأرواح ، أما علماء الشريعة يعترفوا بهذا كُلُه . 9 فوقعت مشكلة كبيرة وصياح، فقام بعض من علماء الشريعة ،يعارضوا بحماس ،فقالوا: "مافيش أي ذنب على هذا الرجَّال،يمكن كَلَّمُه روح أو ملاك !"
10 وكبرت المشكلة زيادة وخاف القائد إنو يقطعوا بولس نُصين ، فأمـر العساكر إنهم ينزلوا ويخطفوا بولس من بينهم ويُرجعوه للمعسكر. 11 وبالليلة الثاني ظهر الرب يسوع المسيح لبُولُس ووقف جنبه وقال لُه :" إطمن يا بولُس! مثلما شِهدت ليَ بالقدس ، لازم إنو تشهد لي بروما كمان ." 12 ولما طلع الصبح بعض اليهود عملوا إتفاق بينهم البين، عشان يقتلوا بولس، وحلفوا يمين ما يأكلوا ولا يشربوا إلا بعد مايقتلوا بولس . 13 وكان عدد اللي تأمروا أكثرمن أربعين رجَّال. 14 وراحوا لكبار رؤساء الكهنة والشيوخ وقالوا لهم :" نِحنا حلفنا يمين إنو ما نأكل شيء إلا بعد ما نقتُل بُولُس " 15 فاطلبوا الآن أنتم وبقية اعضاء المجلس من القائد، إنو يحضر بولس لعندكم، إتعذروا إنكم شتشوفوا قضيتُه مرة ثاني ، واحنا مستعدين إنو نقتلُه قبل ما يوصل للمجلس !"
16 فسمع ابن أخت بولس بهاذي المؤامرة، فمشي للمعسكر وكلّم بولس. 17 دعي بولُس لواحد من الضباط وقلُه :" خذ هذا الولد ووصله لعند القائد في شيء مهم يشتي يكلمه فيبُه " 18 فأخذه الضابط ووصلُه لعند القائد وقلُه:" دعي لي السجين بولس وطلب مني إنو أوصِل هذا الولد لعندك ، لإنو عنده شيء مهم يشتي يُكلمك فيبُه" 19 مسك القائد الولد بيده وأخذه لوحده ،وسأله :" إيش الشيء اللي تشتي تكلمنا فيبُه ؟" 20 قلُه:" إتفقوا اليهود إنهم شطلبوا منك تجيب بولس للمجلس بكره، بحجة إنهم يشتوا يعملوا تحقيق بموضوعه. 21 لا توافقش على طلبهم، لإنو في أكثر من أربعين رجَّال منهم عملوا لُه كمين وحلفوا إنو ما شِأكلوش ولا شِشربوا إلا لما يقتلوا بولس، والآن هُـم مستعدين ومنتظرين تُنفذ لهم طلبهم." 22 أمرالقائد الولد إنو يمشي بعدما حذره وقلُه : "لا تكلمش احد إنك كلمتنا بهذا " 23 وبعدين القائد دعي لِثنين من ضُباطُه وأمرهم وقلهم : جهزوا مئتين عسكري ،وسبعين فارس ،ومئتين مُسلح يحملوا الرماح،عشان يروحوا لقيصيرية الساعة تسع بالليل. 24 وفرس يركب فوقه بولس، عشان يوصل سالم لعند الحاكم فيلِكس." 25 وكتب رسالة للحاكم يقول فيبها :
26 " من كُلُودِيُوس لِيسياسَ إلى صاحب الفخامة الحاكم فِيلـِكس: بعد التحية ، 27 هذا الرجَّال مسكنوه اليهود وحاولوا إنوه يقتُلوه. وبعد ماعرفت انا إنو مواطن روماني ، رحت أنا والعساكروانقذته . 28 وكنت أشتي أعرف التُهمة اللي يتهِموه فيبها، قدمته لمجلسهم . 29 أتبين لي إنو تُهمتُه بخصوص مسائل تخُص التوراة ، واتضح لي إنو ماعملش ذنب يستحق الموت أو السجن . 30 وبعدين عرفت إنو في هناك مؤامرة على هذا الرجَّال، فأرسلته لعندك بسرعة ،وأمـرتُ المدعين علوه إنو يُقدموا شكوتهم لعندك ."
31 العساكر نفذوا الأوامر، وأخذوا بولس بالليل ووصلونوه لأنتيباتريس . 32 وباليوم الثاني الصباح الفُرسان أخذوا بولس ورافقوه لقيصرية ، والعساكر رجعوا للمعسكر. 33 ولما وصلوا الفُرسان لقيصرية ، سلموا بولس مع الرسالة للحاكم. 34 فقرأ الحاكم الرسالة ، وسأل من أي منطقة هـو، فكلموه إنو من كِيلِيكِيَّة ، 35 قال لُه:" شاستمِع لقضيتك لما يجيئوا اللي اشتكوا بك". وبعدين أمـر بحراسة بولس بقصر هِيرُودُس.