22 ¹ "يا اخواني وآبائي ، اسمعوا الآن دفاعي عن نفسي". ² ولما سمعوه يتكلم باللغة العبرية ، هدأوا أكثر . ³ وقلهم بولس: "أنا يهودي ، ولدت في طرسوس اللي هي بمنطقة كيليكية ، و أنا عشت بهذي المدينة . وكان أستاذي غمالائيل ، وعلمنا شريعة آبائنا ، وكنت غيور على دين الله مثلما أنتم اليوم ، ⁴ فا ضطهدت اللي يتبعوا هذا الطريق إلى الموت ، وكنت أمسكهم رجال ونساء ، وأرميهم بالسجن. ⁵ ويشهد رئيس الكهنة ومجلس الشيوخ على كلامي هذا إنو صدق . واخذت منهم رسائل لعند إخوانهم بدمشق ، ورحت عشان أمسك هاذُم الناس اللي هناك وأجيبهم للقدس عشان نعاقبهم .

⁶ ولما قدنا قريب من دمشق ، وكان الوقت قده ظهر ، فجأة ضاءوا حولي نور ساطع من السماء ، ⁷ فسقطت على الأرض ، وسمعت صوت يقلي: شاول ، شاول ، ليش تؤذينا؟ ⁸ فقلت له: من أنت يا سيد؟ فقال: أنا يسوع الناصري اللي أنت تضطهده . ⁹ والناس اللي معي شافوا النور، بس ما سمعوش صوت اللي يكلمنا . ¹⁰ فقلت له: إيش أعمل يا رب؟ فقلي: قم وادخل دمشق وهناك شتعرف اللي لازم عليك إنك تعمله.

¹¹ وقادونا اصحابي بيدي لدمشق ، لأننا ما كنتش أشوف بسبب شدة النور. ¹² وكان في دمشق رجّال تقي اسمه حنانيا ، يعمل بالشريعة ، ويحترمه كُل اليهود في دمشق . ¹³ فجاء لعندي ووقف وقلي: يا أخ شاول ، شوف . فرجع لي بصري نفس اللحظة وشفته قُدامي ، ¹⁴ وقلي: إله آبائنا اختارك عشان تعرف إيش يشتي ، وتشوف البار وتسمع كلام من فمه . ¹⁵ وتكون شاهد له قُدام الجميع باللي شفته وسمعته ، ¹⁶ والآن، أيش تنتظر؟ قُم وتعمد واتغتسل من ذنوبك ، وادعي باسم الرب .

¹⁷ وبعدين رجعت للقدس . ولما كنت أصلي بالهيكل غبت من الوعي ، ¹⁸ وشفت المسيح يقلي : اسرع اخرج من القدس الآن ، لأن أهل القدس ما يقبلوش شهادتك عليا . ¹⁹ وقلت له: يا رب ، هم يعرفوا أننا كنت أدور في بيوت العبادة بعد المؤمنين فيبك عشان أحبسهم وأضربهم . ²⁰ وكنت موجود لما قتل شهيدك استِفانوس ، وكنت راضي على قتله ، وحارس لملابس اللي قتلوه. ²¹ فقلي: امشي ، شأرسلك بعيد لعند الأمم." ²² والناس كانوا يستمعوا لبولس لما وصل لذكر الأمم ، صيحوا لقائد الكتيبة: "ابعد هذا الرجّال من الأرض ! ما يستحقش الحياة!"

²³ وبعدين جلسوا يصيحوا ويلوحوا بثيابهم ، وينفشوا التراب بالهواء . ²⁴ والقائد أمر عساكره يدخلوا بولس للمعسكر ويجلدوه ويحققوا معه عشان يعرف ليش الناس صيحوا علوه . ²⁵ ولما العساكر ربطوه عشان يجلدوه قال بولس للضابط الموجود: "هل القانون يسمح لكم تجلدوا مواطن روماني قبل محاكمته؟" ²⁶ ولما سمع الضابط هذا الكلام ، راح لعند القائد وقله: "إيش كنا بانفعل من غلطة لو جلدنا هذا الرجّال؟ هذا الرجّال روماني الجنسية!" ²⁷ وراح القائد لعند بولس وسأله: "أنت روماني الجنسية؟" فقله: "ايوه." ²⁸ فقله القائد: "أنا دفعت مبلغ كبير من المال عشان أحصل الجنسية الرومانية." وقله بولس: "أنا ولدت فيبه."

²⁹ وبنفس الوقت ابتعدوا العساكر اللي كانوا مكلفين يحققوا معه ، وخاف القائد لما عرف أنه روماني ، لأنه قد كان قيده بالسلاسل.

³⁰ وباليوم الثاني كان يشتي القائد يعرف ماهي التهمة اللي اليهود قالوها على بولس ، ففك قيوده ، وأمر يجيبوه لعند رؤساء الكهنة وكُل المجلس اليهودي ، وجاب بولس وجلسه قُدامهم .