24 ¹ وبعد خمس أيام أجاء لقيصيرية حنانيا رئيس الكهنة ومعه بعض الشيوخ ، ومحامي إسموه ترتُلُّسُ، وقدموا شكوتهم للحاكم ضد بولس . ² فا أستدعي الحاكم بولس ، وبدأ ترتُلُّس يوجه له الإتهام ، فقال: " إحنا بسببك عايشين بسلام كثير،والمصالح اللي استفادوا منها الشعب كُلِه بسبب تخطيطك ³ يا صاحب الفخامة فيلكس. نحنا نشكُرك بكل وقت وكل مكان. ⁴ وعشان ما أطول بالكلام عليك ، أتمني إنو تسمع شكوتنا بلطفك بشكل مختصر: ⁵ نِحنا لقينا هذا الرجَّال يسبب المشاكل ويعمل فتنة بين اليهود بالعالم كُلُه، وهو اللي يقود مذهب النصارى. ⁶ ولما حاول إنو ينجس هيكلنا، مِسكنوه وكَنَّا نشتي نُحاكموه مثلما تقول التوراة. ⁷ بس القائد لِيسِياس أجى وشله من يداتنا بالقوة ، ⁸ وأمر خصومه أنهم يرفعوا شكواهم لعندك. فلما تستجوبه أنت بنفسك ، تقدر تعرف إنو الشكوى حقنا علوه صحيحة. ⁹ وافقوا بقية اليهود اعضاء الوفد وقالوا إنو الدعوى اللي قدمه المحامي صحيح.

¹⁰ فأشر الحاكم لبولُس إنو يتكلم ويُدافع عن نفسُه ،فقال بولس:" أنا عارف إنو لك سنين كثير وانت حاكم لهذي البلاد، عشان كِذا شدافع على نفسي وانا مُرتاح . ¹¹ تقدر تتأكد إننا عادنا وصلتو للقدس،عشان العبادة، ماليش أكثر من اثنعشر يوم . ¹² ولا واحد من اليهود شافنا حِتى مرة واحدة بالهيكل او المجامع أجادل أحد أو احرض الناس على الفوضى. ¹³ ومايقدروش يثبتوا عليَّا أي تهمة قُدامك الآن . ¹⁴ بس أعترف قُدامك إننا أعبُد إله آبائي بالطريقة اللي يقولوا هُم إنِه بدعة،ومؤمن بكل المكتوب بالتوراة وكُتب الأنبياء ، ¹⁵ وعندي نفس الرجاء بالله مثلهم، وهذا الرجاء هو إنوه شتكون القيامة للأموات الصالحين والأشرار. ¹⁶ عشان كِذا أنا دائما أدرب نفسي إنو يكون ضميري حي ونظيف أمام الله والناس. ¹⁷ وبعد غياب عدة سنين من القدس، رِجعتُ علشان أجيب لشعبي بعض الهدايا للفقراء وعلشان أقدم بعض القرابين . ¹⁸ ولما كنت أعمل هذا،شافونا بالهيكل بعض اليهود من حق آسيا، وكنت قد تطهرت. وماكانتش بيهذاك الوقت وسط أي تجمُع ولاعملتو أي مشكلة. ¹⁹ ولو كانوا معهم دليل ضدي، المفروض إنهم كانوا يحضروا لعندك ويُقدموا شكوتهم. ²⁰ أو يتكلموا اللي موجودين هِنا الآن، إيش الجريمة اللي عملتها لما قاموا يُحاكمونا بمجلسهم الأعلى؟ ²¹ يمكن عشان الكلام اللي تكلمتو فيبُه قُدامهم لما قُلتو: أنتم تُحاكِمونا اليوم لإنو أنا مؤمن إنو الاموات شيقوموا" ²² كان فِيلِكس يعرف معرفة جيدة عن طريق يسوع المسيح، وبعد ما سِمع رد بولس قرر إنو يؤجل الجلسة، وقلهم :"لما يجي القائد لِيسِيَاسُ شاحكُم بالقضية" ²³ وأمـر الضابط إنو يخلي بولس تحت الحراسة ،وإنو يجيب لُه شوية حرية،ومسموح لصحابُه إنهم يزورونُه ويخدمونُه.

²⁴ وبعد ايام أجاء فيِلِكسُ هو وزوجتُه دروسلا،وهي يهودية. فاستدعى بولس لعندُه وسمع لهُ. فكلمه بولس على الإيمان بيسوع المسيح . ²⁵ ولما اتكلم بولس على الصلاح والعِفة ويوم الحِساب اللي شيجي، خاف فِيلِكس، وقال لبُولس:" روح الآن ، ولما اكون فاضي شاستدعيك مرة ثاني" ²⁶ وبنفس الوقت كان فِيلِكس يتمنى إنو بُولُس يجيب لُه فلوس رشوة علشان يفك له ، علشان كذا كان يرسل ويستدعيه زيادة ويتكلم معه .

²⁷ وجزعين سنتين وبولس على هذا الحال. وآخر شيء أتعين بُوركِيُوس فَستُوسُ حاكم بدل فيلكس ، وفيلكس عشان يكسب رضى اليهود خلي بولس بالسجن.