4 ¹ ಆನೆಕ್ಯೂ ಮುನಕ ವರ್ರಾ ನಾಳತಾಳಿ ಕೆಲವ ವಂಚನೆ ಸೇಯ್ರಾ ಆತ್ಮತಾ ನುಡಿಗಲಿಕಿ ದವ್ವತಾ ಭೋದನೆಗಳಿಕಿ ಲಕ್ಷ್ಯ ಕುಡ್ತು ಕ್ರಿಸ್ತ ನಂಬಿಕೆಯಿಂಡ ಭ್ರಷ್ಟ ಅಕ್ಕದ್ ಅಂಡ್ ದೌರಟಾ ಆತ್ಮು ಸ್ಪಷ್ಟವಾಯಿ ಸೋನ್ನಾರು. ² ಸುಳ್ಳು ಬೋಧಕರಂಗ ವ೦ದು ಸ್ವಂತ ಮನಸಿಂಡ ಅಪರಾಧಿಗಳ ಅಂಗ್ರಾ ಬರೆ ಇಕ್ಕಿರಂಗ ಆನೆಕ್ಯೂ ತಾವು ನೀತಿವಂತ ಕಾಟ್ಪಿಚ್ಚ್ಕೊಂದು ಅಂಗಳಕ ಮರುಳ ಸೆಂದು ³ ಕನ್ಯಾಳ ಆಗಬಾರ್ದ೦ಡ ಇಂತಿಂಥ ಆಹಾರತ್ತ ಮಗಸಬಾರ್ದಂಡ ಸೋನ್ನಾದ್. ಆನೆಕೆ ಏದು ನಂಬ್ರಾದ್ ಸತ್ಯತ್ತ ಗ್ರಹಿಸಾದೋ ಅಂಗ ಕೃತಜ್ಞತಾಸ್ತುತಿ ಸೇಂದು ತಿಂಗರ್ಕ್ ದೌರ್ರ ಅದ್ದಿ ವಿಧವಾಯಿಕ್ರಾ ಆಹಾರತ್ತ ಸೇಂದು. ⁴ ಆಂವು ಸೇಂದಿಕ್ರಾದ್ ಅದ್ನ್ಯು ನಲ್ಲಾದೆ; ದೌರ್ರಟಾ ಸ್ತೋತ್ರ ಸೇಂದು ಅತ್ಗರಾ ಪಕ್ಷತ್ಕ ಎಂದೂ ನಿಶಿದ್ದ ಅಂಡ್ ಸೋನ್ನರಾದ್ ಅಲ್ಲ; ⁵ ದೌರ್ರಟಾ ವಾಕ್ಯತ್ತ ಸೋನ್ನಿ ಪ್ರಾರ್ಥನೆ ಸೇಯರಾದ್ರಿಂಡ ಅದು ಪವಿತ್ರ ಅಕ್ಕದ್ ಅಲ್ಲ. ⁶ ಈ ಸಂಗತಿಗಳತ್ತ ದೆಂಬೆ೦ಗಳಿಕಿ ತಿಲಿಸನೇಕೆ ನೀನು ಅನುಸಾರ ಸೇಯ್ರಾ ಕ್ರಿಸ್ತ ನಂಬಿಕೆತಾ ತಿರಗ ಸುಬೋದನೆತಾ ವಾಕ್ಯತಾಳಿ ಅಬ್ಯಾಸ ಸೇಯ್ರಾ೦ವು ಆಯಿ ಕ್ರಿಸ್ತ ಯೇಸುನಟಾ ಸೇವಕು ಆಗ್ ಇಕ್ಕ್ಯಾರು. ⁷ . ಅಜ್ಜಿಕಥೆಗಳ ತಿರಗ್ ಕೇವಲ ಪ್ರಾಪಂಚಿಕ ಆಯಿಕ್ರಾ ಕಥೆಗಳತ್ತ ತಳ್ಳಿ ವುಟ್ಟು ನೀನು ದೌರ್ರ ಭಕ್ತಿಟಾ ವಿಷಯತಾಳಿ ಸಾಧನೆ ಸೆಂದ್ಗೋ. ⁸ ದೇಹತ್ತ ಸಾಧನೆ ಸ್ವಲ್ಪ ಮಟ್ಟಿಕಿ ಪ್ರಯೋಜನ ಆಗೀದ್, ಭಕ್ತಿ ಆನೆಕ್ಯೂ ಅದ್ದಿ ವಿಧತಾಳಿ ಪ್ರಯೋಜನ ಆಗೀದ್; ಅತಕ ಇಹಪರತಾಳ್ಯು ಜೀವ ವಾಗ್ದಾನ ಇಗದ್. ⁹ . ಈ ವಾಕ್ಯ ನಂಬತಕ್ಕ ತಿರಗ್ ಸರ್ವಾಂಗಿಕಾರತ್ಕ್ ಯೋಗ್ಯ ಆಗಿಂದು ಇಗದ್. ¹⁰ ಇತಕ ನಂಗ ಕಷ್ಟ ಪಡರಕಂಟಿರಂಗ, ಹೊರಾಡಕಂಟಿರಂಗ, ಎಂತಗ್ ಅಂಡೆಕೆ ಅದ್ನ್ಯೂ ಮನುಷಂಗ, ವಿಶೇಷವಾಯಿ ನಂಬ್ರ೦ಗಳಿಕಿ, ರಕ್ಷಕು ಆಯಿಕ್ರಾ ಜೀವ ಇಕ್ಕಿರಾ ದೌರ್ರ ಮೇನೆ ನಂಗ ನಿರೀಕ್ಷೆ ಅಚ್ಕೊಂಡಿರಂಗ. ¹¹ ಈ ಸಂಗತಿಗಳತ್ತ ಆಜ್ಞ್ಯಾಪನೆ ಸೇಯಬೇಕ್ ತಿರಗ್ ಬೋಧನೆ ಸೇಯಬೇಕ್. ಯೌವನಸ್ಥ ಅಂಡ್ ನಿನಕ ಆಸಡ್ದೆ ಸೇಯರ್ಕ ಏದಕೂ ಅವಕಾಶ ಕುಡ್ಕದೇ ನಂಬಂಗಳಿಕಿ ನಡೆ ನುಡಿ ¹² ಪ್ರೀತಿ ನಂಬಿಕೆ ಶುದ್ದತ್ವ ಇವಗಳ ವಿಷಯತಾಳಿ ನೀನೇ ಮಾದರಿ ಆಗಿರು. ¹³ ನಾನು ವರ್ರರಾ ತನಕ ವೇಧಪಾರಾಯಣತ್ತ ಪ್ರಸಂಗತ್ತ ಉಪದೆಶತ್ತಾ ಸೇಯರಾತ್ರಾಳಿ ಆಸಕ್ತ ಆಗಿರು. ¹⁴ ನಿನ್ನಾಳಿ ಇಕ್ಕಿರಾ ವರತ್ತಾ ಅಲಕ್ಷ್ಯ ಸೇಯಮಾಣ; ಸಭೆತಾ ಹಿರಿಯರಂಗ ಪ್ರವಾದನೆತಾ ಸಹಿತ ನಿಂಟಾ ಮೇನೆ ಹಸ್ತಗಳತ್ತಾ ಅಚ್ಚಿನೇಕೆ ಆದ ನಿನಕ ಕುಡ್ಕ್ಸ್ ಅಲ್ಲ. ¹⁵ ಈ ಪಣಿಗಳತ್ತ ಸಾಧಿಸಿಕೊಳ್ಳಬೆಕಾತ್ರಾಳಿ ಆಸಕ್ತ ಆಗಿರು. ಇತರಿಂಡ ನಿಂಟಾ ಅಭಿವೃದ್ದಿಯು ಅದ್ನಿಕ್ಯೂ ಪ್ರಸಿದ್ದ ಅಕ್ಕದ್. ¹⁶ ನಿಂಟಾ ವಿಷಯತಾಳಿಯೂ ನಿಂಟಾ ಉಪದೇಶಟಾ ವಿಷಯತಾಳಿಯೂ ಎಚ್ಚರಿಕೆ ಆಗಿರು. ನೀನು ಈ ಪಣಿತಾಳಿ ನಿರತನಾಗಿರು; ಇನಾಗ್ ಇಕ್ಕಿಬೇಕನಕೆ ನಿನ್ನನ್ನು ನಿಂಟಾ ಉಪದೇಶ ಕೊಕಂಗಳಿಕಿ ರಕ್ಷಣೆ ಸೇಯಾರೆ.