¹ Mus setn, ni'i musu ju'u maleket do toguh ju'u sawotn setn nyusuk ngen nyono'u neko' oku'u, kuwon'ou, "Geti'i lah, oku'u akon tuju'u neko' mu'u kupm unto' purunte baas setn, do nguru'u nun tunuh muwo'u pi'itn, ² do ngen'ou raja-raja nun bumi bugula ngen dietn do ngunu nun bumi moeh mabuk bodo'u angur bugula'ou." ³ Maleket setn tobotn ku'u wa'ng Roh ko' pada'ng kurongos, ngen oku'u ngurujuh seura'ng dayuk'ng nguru'u nun tunuh ni'i buruk'ng bunata'ng buwarna budoyo'u do tumos bodo'u gonon-gonon do bi'a', do umpu'u ju'u baa ngen sumung tonuk. ⁴ Dayuk'ng setn nengi bukokos buwarna ingu ngen budoyo'u do sunukop emos, batuh-batuh intodn, ngen mutiara. Yuh toguh subuwoh sawotn emos do tumos bodo'u kude'burakor ngen kudokus bugula'ou. ⁵ Nun de'ih'ou, do nulis gonon, do rasia: "Babel do baas, sunu'u suna purunte ngen sugala kude'burakor nun bumi." ⁶ Oku'u ngurujuh dayuk'ng setn mabuk bodo'u doyo'u nya-nya cuci ngen bodo'u doyo'u sasi-sasi Yesus. Watu oku'u ngurujuh'ou, oku'u kunyom mangop munu'u. ⁷ Lalu, maleket nyono'u ngen ku'u, "Monih mu'u mangop? Oku'u akon nyono'u ngen mu'u rasia dayuk'ng setn ngen rasia bunata'ng do gatuh'ou, do oduh ju'u baa ngen sumung tonuk setn. ⁸ Bunata'ng do mu'u ngurujuh setn perenah oduh, pa' titi'u moeh nya' nu'u, ngen akon jagu'u ruwoh musu turobih kobus neko' kubunasa. Ngen, dietn do ngunu'u nun bumi, do gonon'ou de' do nulis wa'ng kitob pumudip miradn dunia do noeh, akon mangop watu ngurujuh bunata'ng setn, do purenah oduh, pa' titi'u moeh nya' nu'u, ngen akon mokot agi'e. ⁹ Hoel ti'i poolu akoel ngen pumantoes. Ju'u baa setn oduhlah ju'u dorud do nun tunuh'ou dayuk'ng setn nguru'u. ¹⁰ Ju'u baa setn gi'e oduhlah ju'u raja, rumuh nun oncoh'ou moeh robu'u, ni'u raja gi'e oduh, ngen ni'i raja agi'e bayuh monug, pa' watu yuh monug, yuh arus ngunu'u de' tuwoi. ¹¹ Bunata'ng do sani nyeh perenah oduh, pa' titi'u nya' nu'u, oduhlah raja kume'i pa' yuh murut nun wa'ng ju'u raja judn nyeh. ngen yuh neko' kubunasa. ¹² Kusumung tonuk do mu'u ngurujuh oduhlah sumung raja do bayuh nurumo'u kerajaan, pa' dietn nurumo'u kuasa subagei raja kutuwoi ni'i jopm busamoh bunata'ng setn. ¹³ Dietn oduh niyot do samoh, ngen dietn jugotn kuasa ngen ha' dietn neko' bunata'ng setn. ¹⁴ Dietn akon bupera'ng ngurawotn Ena' Domba, pa' Ena' Domba akon ngkaroh dietn kerena Yuh oduhlah Tompo'u nug tunuh sugala tompo'u ngen Raja nug tunuh sugala raja ngen dietn do ngen-Ou oduhlah do tabo'u, do punirih, ngen do sutia." ¹⁵ Mus setn, maleket setn nyono'u ngen ku'u, "Pi'itn do mu'u ngurujuh, do nun tunuh'ou purunte setn nguru'u, oduhlah masurakot, nya kopa, banca, ngen sono'u. ¹⁶ Kusumung tonuk do mu'u ngurujuh ngen bunata'ng setn akon tigi'i ngen purunte setn. Dietn akon noeh'ou tulantoer ngen runto'ng, sereta man dagik'ou ngen tuntuk'ng yuh nengi opui. ¹⁷ Sobob, Tompo'u moeh dasotn hoel setn nun wa'ng toi dietn unto' uncapei niyot-Yuh ngen sutuju unto' jugotn kuasa dietn neko' bunata'ng setn sampei sono'u Tompo'u do gunonop. ¹⁸ Dayuk'ng do mu'u ngurujuh setn aduhlah kuta baas do muruntoh nug tunuh raja-raja do nun bumi."