¹ Mus sumua ti'i, oku'u ngurujuh maleket bukutn munga'u musu suruga do oduh kuasa do baas, ngen bumi do tunera'ng kemuliaan'ou. ² Yuh mogotn nengi yu do jodn, kuwon'ou, "Mungkob! moeh mungkob Babel do baas setn! Yuh moeh jaji sunun ngunu'u sutodn-sutodn ngen punjara unto' sutiyop sumengi do dokus, suroi unto' sutiyop macopm manuk do dokus ngen do tigi'u. ³ Sobob, sumua banca moeh mabuk angur nafsu bugula'ou, ngen pudaga'ng-pudaga'ng nun bumi jaji oduh manon bodo'u awa nafsu'ou do baas." ⁴ Lalu, oku'u kurungoh yu bukutn musu suruga nyono'u, "Ei umot-Ku'u, ruwohlah musu'ou agoe mu'u de' suwo'u wa'ng dusa'ou ngen de' nurumo'u putaka do akon purentuk'ou. ⁵ Sobob, dusa-dusa'ou moeh butumpuk sampei neko' rengit ngen Tompo'u moeh sunuyo'u pungkosot-pungkosot'ou. ⁶ Pubuwotlah kuta setn samoh mun do yuh moeh pubuwotn, bunaros neko'ou duwuh kali lipot unto' pubuwot-pubuwot'ou, ngen wa'ng sawotn do yuh nengi unto' sunampu, sunampulah duwuh kali lipot. ⁷ Kumuwo'u yuh moeh nguromot ngen jugotn kumewah ngen odup'ou dadup, jugotnlah sisa ngen kususoh ngen'ou kumuwo'u setn. Sobob, yuh nyono'u nun wa'ng toi'ou, "Oku'u nguru'u mun seura'ng ratu, oku'u bukutnlah jan'da ngen de' akon perenah ngurujuh kususoh." ⁸ Kerena setn, wa'ng ni'i on'u ja putaka-putaka'ou akon monug neko'ou, yuhlah pungebus, kususoh, ngen suburuk. Yuh akon do tuntuk'ng nengi opui kerena Tompo'u do ngakipm yuh setn bukuasa," ⁹ Raja-raja nun bumi, do moeh bugula ngen mudip nun wa'ng kumuwoh busamoh'ou, akon sietn ngen nowang'ou watu dietn ngurujuh asuh opui pununtuk'ng'ou, ¹⁰ mujog jo'u-jo'u kerena toru turadop punyisa'ou, ngen sietn, "Sulaka! sulakalah, kuta do baas, Babel, kuta do kuwot setn! Sobob, nun wa'ng ni'i jopm ja pungakipm mu'u moeh monug!" ¹¹ Pudaga'ng-pudaga'ng nun bumi akon sietn ngen susoh unto' kuta setn kerena nya' ni'i ra'ng pun akon burih koyuh do juwa'ou agi'e, ¹² yuhlah emos, pera', intodn, mutiara, kaek'ng alus linen, kaek'ng ingu, kaek'ng sutra, kaek'ng kirmizi, bumacopm macop bara'ng musu koyuh do paguh sukuh'ou, koyuh-koyuh do noeh musu bubut, musu koyuh do maha, musu tumogo'u, besi, marmer, ¹³ koyuh manis, rompoh-rompoh, wuwangi, damor, kumonyon, angur, nyo'u, tepuk'ng alus, ganupm, sapi, domba, kuda, kuruta, kuli, bakan asuk'ng musia. ¹⁴ Dietn akon nyono'u, "Buwo'u do nitih asuk'ng mu'u moeh buragotn musu mu'u, sumua do muwah ngen paguh moeh lenyop musu mu'u, ngen de' akon do dopud agi'e." ¹⁵ Suna pudaga'ng koyuh-koyuh setn, do jaji oduh manon togor kuta setn, akon mujog jo'u-jo'u kerena toru ngen sisaan do kunyom kuta setn sam'el sietn ngen susoh owa'ng. ¹⁶ Dietn nyono'u: "Sulaka! Sulakalah kuta baas setn, do bupakei kaek'ng alus linen, do nengi kaek'ng ingu ngen kaek'ng kirmizi, ngen puriyos emos, batuh-batuh intodn, ngen mutiara! ¹⁷ Sobob, wa'ng ni'i jopm ja, sumua kumanon setn moeh do ngancur!" Sumua super kapol, punumpa'ng, ena' buwoh kapol, ngen sumua nya do ngo'u tuwoh musu ra'ut akon mujog jo'u-jo'u, ¹⁸ ngen mogotn watu dietn ngurujuh asuh pununtuk kuta setn, "Kuta epihkah do mun kuta baas ti'i?" ¹⁹ Dietn nam'ur debu ko' baa dietn ngen mogotn sam'el sietn ngen susoh owa'ng, kuwon'ou, "Sulaka! Sulakalah kuta baas setn, do musu'ou sumua nya do umpu'u kapol nun ra'ut moeh jaji kaya bodo'u kulumpoh'ou! Sobob, nun wa'ng ni'i jopm ja, kuta setn moeh do noeh jaji sungi'u!" ²⁰ Busenanglah tunuh yuh, ei suruga, ei nya-nya cuci, suna rasul, ngen nabi-nabi! Kerena Tompo'u moeh purobu'u kupm tunuh kuta setn unto' mu'u. ²¹ Lalu, ni'i maleket do kuwot dokot subuwoh batuh do baas mun batuh pungirik ngen nongkod'ou ko' ra'ut sereta nyono'u, Mun setnlah Babel, kuta baas setn akon do ngancur ngen de' akon purenah do dopud agi'e. ²² Yu suna pumain kucapi, punumpo suulik'ng, punumpo surumpit, ngen aloet musik bukut'ou de' akon do kurungoh agi'e nun wa'ng mu'u. Nya' tuka'ng noeh do dopud noeh sumua pungunoh, do akon do dopud nun wa'ng mu'u. Yu pungirik de' akon do kurungoh agi'e do nun wa'ng mu'u. ²³ Buko'u lampu de' akon umbuko'u agi'e nun wa'ng mu'u. Yu pungantetn dari ngen pungantetn dayuk'ng de' akon do kurungoh agi'e nun wa'ng mu'u, kerena pudaga'ng-pudaga'ng mu'u oduhlah pumumpitn-pumumpitn nun bumi. Sobob, sumua banca moeh do ngkosot sihir mu'u. ²⁴ Ngen, nun wa'ng kuta setn do dopud doyo'u nabi-nabi, nya-nya cuci, ngen doyo'u sumua nya do moeh do nobus nun bumi."