¹ Oku'u kurungoh yu do jodn musu wa'ng Romin Tompo'u do nyono'u neko' kuju'u maleket, "Ponulah ngen puseya'nglah kuju'u sawotn punoruh Tompo'u setn ko' bumi." ² Maleket putama ponu ngen puseya'ng sawotn'ou ko' bumi, mengka'ou be' mokotlah kudodo' do kutor ngen ungkonopm nya-nya do nengi tanu'u bunata'ng setn ngen do sunomoh tuguno. ³ Maleket kuduwuh puseya'ng sawotn'ou ko' ra'ut, mengka'ou ra'ut burubah jaji doyo'u, mun doyo'u nya do kobus, ngen sumua do mudip nun wa'ng'ou pun kobus. ⁴ Maleket kutaruh puseya'ng sawotn'ou ko' sungi-sungi ngen ruba'ng-ruba'ng subu, ngen sumua'ou jaji doyo'u. ⁵ Lalu, oku'u kurungoh maleket do bukuasa tunuh pi'itn nyono'u, "Kopm adel, o Do Cuci, do oduh ngen moeh oduh kerena Kopm ngakipm sumua ti'i. ⁶ Sobob, dietn moeh puseya'ng doyo'u umot-Kopm do cuci ngen doyo'u suna nabi-Kopm, pa' Kopm jugotn dietn doyo'u unto' do suup. Dietn laya' turumo'u'ou." ⁷ Ngen, oku'u kurungoh altar nyono'u, "O Tompo'u Do Mahakuasa, munu'u ngen adellah pungakipm-Kopm." ⁸ Maleket kuumpot puseya'ng sawotn'ou ko' tunuh botuh on'u, mengka'ou botuh on'u do jugotn kuasa unto' suno'u musia nengi opui. ⁹ Musia do suno'u suru'u do luwo biasa, pa' dietn ngki'a' gonon Tompo'u do oduh kuasa unto' sumua putaka ti'i. Dietn go' butobot ngen nguromot Tompo'u. ¹⁰ Maleket kurumuh puseya'ng sawotn'ou ko' tunuh takhta bunata'ng setn, mengka'ou kerajaan'ou jaji putu'u, ngen dietn kume jira'u dietn kerena nomon monopm, ¹¹ ngen ngki'a' Tompo'u do nun suruga kerena nyom monopm ngen kudodo-kudodo dietn, pa' dietn de' butobot musu pubuwot-pubuwot dietn. ¹² Maleket kunum puseya'ng sawotn'ou ko sungi baas, yuhlah Efrat, mengka'ou pi'itn'ou jaji bedu'u unto' suniyop jorotn raja-raja musu Timur. ¹³ Lalu, oku'u ngurujuh musu bobo'u naga, musu bobo'u bunata'ng setn, ngen musu bobo'u nabi pulosu ruwoh taruh sumengi do dokus do mayan mun kata', ¹⁴ kerena dietn oduhlah sumengi-sumengi do bi'a', do noeh tanu'u-tanu'u aneh, do neko' raja-raja nun bumi unto' gunumpu dietn nadop pupera'ng nun on'u baas, yuhlah on'u Tompo'u, Do Mahakuasa. ¹⁵ ("Ngurujuhlah! Oku'u monug mun pungongku. Do murokotlah nya do totop bugiya'ng ngen nguria bukokos'ou sampei yuh de' akon ponu runto'ng ngen nya-nya de' ngurujuh pumalu'ou.") ¹⁶ Mus setn, sumengi-sumengi do bi'a' setn gunumpu dietn nun antuk'ng, do nun sono'u Ibrani do nyono'u Harmagedon. ¹⁷ Maleket kuju'u puseya'ng sawotn'ou ke rengit, mengka'ou do kurungohlah yu do jodn musu wa'ng Romin Tompo'u, musu takhta setn, nyono'u, "Moeh sulesei." ¹⁸ Ngen, mayanlah kilot do nyamoer-nyamoer, yu ngen gumuruh guntur, ngen bumi bugunca'ng do gurumuh, mun do bayuh perenah tujadi miradn musia oduh nun tunuh bumi, gurumuh gunca'ng setn. ¹⁹ Kuta baas setn mupa' jaji taruh bagi, ngen kuta-kuta banca-banca ancur, ngen Babel do baas setn de do komut Tompo'u unto' do jugotn ngen'ou sawotn angur punoruh-Yuh do muluwop-luwop. ²⁰ Sutiyop purou buragotn ngen dorud-dorud nya' do dopud. ²¹ Jetn es do baas, kira-kira subunuk ni'i talenta (sukutoe taruh puru'u umpot kulo), robu'u musu rengit purentuk musia, pa' musia ngki'a' Tompo'u kerena putaka jetn es setn. Sobob, putaka setn bodo'u nya gurumuh toru.