¹ Oku ngurujuh tanu'u bukutn nun rengit, do baas ngen aneh, ju'u maleket do tobotn buncana, oduhlah buncana do turaker, kerena wa'ng kuju'u buncana setnlah punoruh Tompo'u do ngaker. ² Lalu, oku'u ngurujuh koyuh mun ra'ut sulemin busampu opui ngen dietn do moeh ngkaroh bunata'ng setn, tuguno'ou, ngen angka gonon'ou, mujog nun bingih ra'ut sulemin setn ngen toguh kucapi Tompo'u. ³ Dietn nyanyi lagu Musa, jungos Tompo'u, ngen lagu Ena' Domba: "Baas ngen aneh sumua kereja-Kopm, o Tompo'u Do Mahakuasa. Adel ngen munu'u sumua jorotn-Kopm, o Raja sugala banca. ⁴ Esihkah do de' toru ngen-Kopm, o Tompo'u ngen de' nguromot gonon-Kopm? Sobob, anya Kopmlah do cuci. Sumua banca akon monug ngen nyomoh nun adop-Kopm kerena kuadel-Kopm moeh do payatn." ⁵ Mus sumua hoel ti'i, oku'u ngurujuh Romin Tompo'u, junyuk punyasi Tompo'u nun suruga, tubuka'u. ⁶ Ju'u maleket do tobotn ju'u buncana setn ruwoh musu Romin Tompo'u, nengi lenan do budo'u ngen bukulou, ngen nengi sulendang emos nun sudo'u dietn. ⁷ Ni'i musu kuumpot koyuh do mudip jugotn neko' kuju'u maleket setn ju'u sawotn emos, tumos punoruh Tompo'u, do mudip sampei pagi'ou. ⁸ Romin Tompo'u do tunumos nengi asuh musu kemuliaan Tompo'u ngen musu kuasa-Yuh, ngen nya' seura'ng pun dopud purut Romin Tompo'u subayuh ju'u putaka musu kuju'u maleket setn esig.