¹ Oku'u ngurujuh Ena' Domba mujog nun Sodoh Sion, ngen busamoh-Yuh oduh suratus umpot puru'u umpot ribu ra'ng, do oduh gonon Samo'u-Yuh nun de'ih dietn. ² Oku'u kurungoh yu musu suruga mun gumuruh pi'itn do baas ngen mun yu guntur do jodn, pa' yu do ku'u kurungoh setn mun yu suna pumain kucapi do gi'e main kucapi dietn. ³ Dietn nyanyi lagu ba'uh nun adop takhta ngen nun jowi kuumpot koyuh do mudip, sereta nun jowi tuuh-tuuh. Nya' seura'ng pun dopud pulajoer lagu setn subukutn anya kusuratus umpot puru'u umpot ribu ra'ng do moeh do nebus musu bumi. ⁴ Dietn oduhlah nya-nya do de' nokus odup'ou nengi dayuk'ng-dayuk'ng kerena dietn gi'e cuci. Dietn oduhlah nya-nya do ngajoh Ena' Domba ko' epih ja Yuh ponu. Dietn moeh do nebus musu oncoh musia subagei buwo'u-buwo'u putama unto' Tompo'u ngen Ena' Domba. ⁵ Nya' pubula'u wa'ng bobo'u dietn, dietn de' osot. ⁶ Oku'u ngurujuh maleket bukutn tumubur nun todo'u-todo'u rengit, tobotn Injil kokoel unto' do sunampei neko' dietn do ngunu'u nun bumi ngen neko' sumua banca, suku, sono'u, ngen kaupm ⁷ ngen yuh nyono'u nengi yu do jodn, "Torulah ngen Tompo'u, jugotlah kemuliaan ngen-Ou kerena watu pungakipm-Yuh moeh monug, sunomohlah Yuh do noeh rengit, bumi, ra'ut, ngen sumua ruba'ng subu." ⁸ Lalu, maleket do bukutn, do kuduwuh, umpuduh ngen nyono'u, "Mungkob, moeh mungkob Babel do baas setn kerena yuh moeh noeh sumua banca suup angur nafsu bugula'ou do de burakor." ⁹ Maleket do bukutn, do kutaruh, umpuduh kuduwuh maleket subayuh'ou, ngen nyono'u nengi yu do jodn, "Kalou esih ja do sunomoh bunata'ng setn ngen tuguno'ou, ngen nurumo'u ni'i tanu'u nun de'ih atou tengen'ou, ¹⁰ nya setn akon suup angur punoruh Tompo'u, do duwotn sukuwot tunaga neko' wa'ng sawotn punoruh-Ou, ngen yuh akon do sunisa nengi opui ngen bulira'ng nun adop maleket-maleket cuci ngen nun jowi Ena' Domba. ¹¹ Ngen, asuh sisaan dietn maad sampei pagi'ou. Dietn nya' watu unto turahat, enihkah wa nira'ng atou bungaru'u, yuhlah dietn do sunomoh bunata'ng setn ngen tuguno'ou, atou esih ja do nurumo'u tanu'u gonon'ou." ¹² Ti'i lah kurajitn nya-nya cuci do nguria puruntoh Tompo'u ngen imon dietn nun wa'ng Yesus. ¹³ Lalu, Oku'u kurungoh yu musu suruga nyono'u, Nulislah ti'i: Musu titi'u, domurokotlah nya kobus, do kobus nun wa'ng Tompo'u." Roh nyono'u, "Munu'u, agoe dietn dopud turahat musu susoh payoh dietn kerena pubuwot-pubuwot dietn najoh dietn." ¹⁴ Oku'u ngurujuh oduh remang budo'u ngen nguru'u nun tunuh remang setn seura'ng mun Ena' Musia, nengi surouk'ng turomot emos nun baa-Yuh ngen aret do rojo'u nun tengen-Ou. ¹⁵ Lalu, maleket bukutn ruwoh musu Romin Tompo'u, ngen mogotn nengi yu do jodn neko' Yuh do nguru'u nun tunuh remang, "Tayudnlah aret-Kopm ngen notupmlah kerena watu unto' ngotupm moeh monug ngen koyuh do ya nusutn nun bumi moeh esa' nu'u." ¹⁶ Mengka'ou, Yuh do nguru'u nun tunuh remang tayudn aret'Ou neko' tunuh bumi, ngen bumi ja do notupm. ¹⁷ Mus setn, maleket bukut ruwoh musu Romin Tompo'u do nun suruga, ngen yuh gi'e toguh aret do rojo'u. ¹⁸ Ngen, maleket bukutn gi'e, do bukuasa tunuh opui, ruwoh musu altar. Yuh mogotn nengi yu do jodn neko' maleket do toguh aret rojo'u setn, "'Tayotnlah aret mu'u do rojo'u setn ngen gunumpulah tumpok buwo'u angur musu beta'ng angur nun bumi." ¹⁹ Mengka'ou, maleket setn tayotn aret'ou neko' bumi ngen gunumpu tumpok buwo'u angur musu beta'ng angur nun bumi ngen nongkod'ou ko' wa'ng batuh pungirik baas punoruh Tompo'u. ²⁰ Pungucud buwo'u angur setn do noeh nun sepa'u kuta, ngen doyu'u mamon musu aloet pungucud angur setn kira-kira kudatuh punyupot kuda ngen kukomuh suribu num ratus stadia.