¹ Mus setn, oku'u ngurujuh ni'i buruk'ng bunata'ng buwos ruwoh musu wa'ng ra'ut, do oduh sumung tonuk ngen ju'u baa. Nun sutiyop tonuk'ou oduh subuwoh surouk'ng turomot ngen nun sutiyop baa'ou do nulis gonon-gonon do bi'a'. ² Bunata'ng buwos do oku'u ngurujuh setn puroceh ngen harimou, kojo'u'ou mun kojo'u buruwa'ng, ngen bobo'u'ou mun bobo'u singa. Naga setn jugotn bunata'ng ganos setn kukuwot, takhta, ngen kuasa do baas. ³ Oku'u ngurujuh ni'i musu baa-baa'ou mun do mota'ng do dopud tobotn ko' pungobus, pa' eta'ng setn jaji paguh. Sururuh dunia tupango'u ngen najoh bunata'ng buwos setn. ⁴ Ngen, dietn sunomoh naga setn kerena moeh jugotn kukuwot'ou neko' bunata'ng buwos setn, ngen dietn sunomoh bunata'ng buwos ti'i sam'el nyono'u, "Esihkah do mun bunata'ng buwos ti'i ngen esihkah do dopud bupera'ng ngurawotn yuh?" ⁵ Lalu, ngen'ou do jugotn bobo'u do nyono'u kusumok'ng ngen kubi'a', ngen kuasa unto' bubuwot kutuwoi umpot puru'u duwuh burotn. ⁶ Yuh duka'u bobo'u'ou wa'ng ungki'a' ngurawotn Tompo'u, unto' ngki'a gonon-Ou, ngen junyuk'ng-Ou, ngen dietn do ngunu'u nun suruga. ⁷ Yuh gi'e do bodo'u unto' punera'ng nya-nya cuci ngen ngkaroh dietn, ngen neko'ou do jugotn kuasa tunuh sumua suku, kaupm, sono'u ngen banca. ⁸ Sumua do ngunu'u nun bumi akon sunomoh 'ou, yuhlah sutiyop nya do gonon'ou de' tutulis musu watu dunia do noeh wa'ng kitob pumudip umpu'u Ena' Domba, do moeh do sumuleh. ⁹ Sutiyop nya do oduh kepik'ng ro'u lah yuh kurungoh sono'u ti'i: ¹⁰ "Kalou seura'ng do nontu subagei nya do dokup, yuh akon jaji nya do dokup, suwoh on'u seura'ng nobus nengi peda'ng, nengi peda'ng yuh arus do nobus." Setnlah kurajitn ngen imon nya-nya cuci. ¹¹ Lalu, oku'u ngurujuh ni'i buruk'ng bunata'ng buwos bukutn ruwoh musu wa'ng bumi, ngen bunata'ng setn oduh duwuh tonuk mun ena' domba, pa' yuh nyono'u mun buruk'ng naga. ¹² Yuh nyalotn sumua kuasa bunata'ng buwos do putama setn nun jowi'ou, ngen bodo'u bumi, ngen dietn do ngunu'u nun wa'ng'ou sunomoh bunata'ng buwos putama, do meta'ng parah'ou moeh do umpaguh. ¹³ Yuh noeh tanu'u-tanu'u aneh do baas, bakan punga'u opui musu rengit neko' bumi, nun adop nya kopa. ¹⁴ Ngen, yuh nyosot nya-nya do ngunu'u nun bumi nengi tanu'u-tanu'u aneh do nijetn unto' yuh noeh'ou nun jowi bunata'ng buwos do putama. Yuh nyono'u neko' dietn do ngunu'u nun bumi unto' butodn tuguno bunata'ng buwos do putama, do mota'ng dog peda'ng, pa' totop mudip. ¹⁵ Yuh do ngujetn unto' jugotn napos neko' tuguno bunata'ng buwos setn sampei tuguno setn dopud nyono'u ngen bodo'u nya-nya do de' sunomoh tugono setn do nobus. ¹⁶ Ngen, yuh bodo'u nya kopa, do cu' atou baas, oduh manon atou musuketn, kuli ngen nya do menang, do jugotn ni'i tanu'u nun tengen untouh atou de'ih'ou, ¹⁷ agoe nya' seura'ng pun dopud burih atou juwa kucuali yuh oduh tanu'u setn, yuhlah gonon bunata'ng buwos setn atou ketn gonon'ou. ¹⁸ Hoel setn poolu kupantoes. Soolah nya do burakor tiyop angka bunata'ng buwos setn kerena angka setn oduhlah angka seura'ng nusia ngen angka'ou num ratus num puru'u num.