¹ Lalu, oku'u ngurujuh ni'i maleket kuwot bukutn munga'u musu suruga, bupakei remang ngen buka'ng oduh nun tunuh baa'ou, ngen jowi'ou mun botuh on'u, ngen kojo'u'ou mun tungka'ng opui. ² Maleket setn toguh subuwoh kitob cu' do tubuka'u. Ngen, Yuh untaja'u kojo'u untouh'ou nun ra'ut ngen kojo'u moid'ou nun doyuh, ³ lalu mogotn ngen yu do jodn, mun singa do ngao'ng, ngen mus yuh mogotn, ju'u gumuruh guntur payatn yu dietn. ⁴ Watu kuju'u guntur setn moeh biya yu, oku'u ya nulis'ou', pa' oku'u kurungoh yu musu suruga nyono'u, "Sigellah enih do moeh do nyono'u kuju'u guntur setn! Soh nulis'ou!" ⁵ Mus setn, maleket do ku'u ngurujuh mujog nun ra'ut ngen nun doyuh setn dokot tengen untouh'ou ko' rengit, ⁶ ngen busumpoh unto' Yuh do mudip kutuwoi'ou, do noeh rengit ngen sugala abih'ou, bumi ngen sugala abih'ou, sereta ra'ut ngen sugala abih'ou, bawa de' akon do nunda agi'e, ⁷ pa' nun watu yu maleket kuju'u, watu yuh ya numpo surumpit'ou, mengka'ou do gunonoplah rahasia Tompo'u, mun do Yuh sunampei neko' suna jungos-Ou, do oduhlah suna nabi." ⁸ Lalu, yu do judn nyeh oku'u dungoh musu suruga nyono'u agi'e ngen ku'u, kuwon'ou, "Ge'ih ngen nomi'lah gulok'ng kitob tubuka'u musu tengen maleket do mujog nun tunuh ra'ut ngen doyuh setn." ⁹ Mengka'ou, oku'u go'ih neko' maleket setn ngen sungko'u'ou jugotn gulok'ng kitob cu' setn ngen ku'u. Ngen, maleket setn nyono'u ngen ku'u, "Nomi'lah kitob ti'i ngen manlah, setn akon bodo'u putuk mu'u poit, pa' nun bobo'u mu'u, setn akon nyom sujo'u mun pi'itn benyih." ¹⁰ Oku'u nomi' kitob cu' nun tengen maleket setn ngen man'ou, nun bobo'u ku'u nyom sujo'u mun pi'itn benyih, ngen watu oku'u mus man'ou, putuk ku'u jaji poit. ¹¹ Lalu, yuh nyono'u ngen ku'u, "Mu'u arus nguramoel agi'e nun adop suna banca, kaupm, ngen sono'u sereta raja-raja."