¹ Lalu, do jugotn neko' ku'u ni'i beta'ng koyatn, ya mun suoh pungukur, ngen nyono'u, "Ge'ih ngen kurlah Romin Tompo'u ngen altar'ou sereta dietn do sumeya'ng nun wa'ng'ou. ² Pa', soolah dawoh Romin Tompo'u do nun sosoh sepa'u, soh ngukur'ou kerena setn moeh do jugotn neko' banca-banca , ngen dietn akon untaja'u Kuta Cuci setn kutuwoi umpot puru'u duwuh burotn. ³ Oku'u akon jugotn kuasa neko' duwuh sasi ku'u ngen diet akon nguramoel kutuwoi suribu duwuh ratus num puru'u on'u nengi kaek'ng susoh." ⁴ Dietn ti'i oduhlah duwuh beta'ng zaitun ngen duwuh kojo'u puluta do mujog nun adop Tompo'u do umpu'u bumi. ⁵ Ngen, kalou oduh nya do ya ngkonop dietn, opui ruwoh musu bobo'u dietn ngen sunouu musuh-musuh dietn. Kalou esih ja ya ngkonop dietn, yuh akon do nobus nengi cara mun setn gi'e. ⁶ Kuduwuh'ou setn oduh kuasa unto' tutu rengit agoe jetn de' robu'u nun on'u-on'u ramoel dietn, ngen oduh kuasa tunuh pi'itn unto' ngubah'ou jaji doyo'u ngen unto' punangkok'ng bumi nengi sutiyop malapetaka, sutiyop kali dietn ro'u. ⁷ Ngen, watu dietn moeh kesig kusasi dietn, bunata'ng do ruwoh musu wa'ng turobih kobus akon pera'ng ngurawotn ngen ngaroh dietn, sereta nobus dietn. ⁸ Ngen, mayot kuduwuh'ou ngure'ng nun jorotn kuta baas, do sucara tanu'u do sunobut Sodom ngen Mesir, antuk'ng Tompo'u to'u do sunalib. ⁹ Ngen, musu sururuh banca ngen suku ngen sono'u ngen kaupm akon ngurujuh mayot kuduwuh'ou kutuwoi taruh on'u sutongoh ngen de' akon ngijetn mayot kuduwuh'ou do pugure'ng nun kubur. ¹⁰ Ngen, do ngunu'u nun bumi akon busenang-senang tunuh dietn, ngen dietn samoh-samoh kiripm adiah ngen ni'i-ni'i'ou kerena kuduwuh nabi ti'i sunisa dietn do ngunu'u nun bumi. ¹¹ Pa', mus taruh on'u sutongoh, sumengi pumudip musu Tompo'u murud ko' wa'ng kuduwuh mayot setn, ngen dietn mujog nun tunuh kojo'u dietn sampei do purangi dietn jaji toru. ¹² Lalu, dietn kurungoh yu do jodn musu suruga nyono'u ngen dietn, "Maadlah geti'u!" Ngen, dietn pun maad ko' suruga nun wa'ng remang, do sunasi musuh-musuh dietn. ¹³ Ngen, nun watu setn, tujadilah bumi tugunca'ng do kuwot sampei sepersumung kuta setn ancur, ngen ju'u ribu nya kobus togor bumi tugunca'ng setn, ngen do sulamoet jaji munu'u toru, lalu memuliakan Tompo'u do nun wa'ng suruga. ¹⁴ Buncana do kuduwuh moeh lalu, ngurujuhlah buncana do kutaruh akon jagu'u monug. ¹⁵ Lalu, maleket do kuju'u numpo surumpit'ou ngen do kurungohlah yu do jodn nun wa'ng suruga do nyonou, "Pemuruntoh dunia moeh jaji pemuruntoh Tompo'u to'u ngen Yuh Do Domurokot-Yuh, ngen Yuh akon muruntoh sampei pagi'ou." ¹⁶ Mus setn, duwuh puru'u umpot tuuh-tuuh do nguru'u nun takhta dietn, nun adop Tompo'u, bulutut ngen sunomoh Tompo'u, ¹⁷ ngen nyono'u, "Omi'u busukur neko'-Kopm, o Tompo'u Do Mahakuasa, Do Oduh ngen Do Moeh Oduh, kerena Kopm moeh nomi' kuasa-Kopm do baas ngen miradn muruntoh. ¹⁸ Nge, banca-banca moeh doruh, pa' doruh-Kopm moeh monug, ngen watu'ou moeh monug unto' nya-nya do kobus unto' do ngakipm ngen jugodn poh jungos-jungos-Kopm, nabi-nabi ngen nya-nya cuci ngen do toru akon gonon-Kopm, do cu' ngen do baas, ngen unto' ngancur suna purusa' bumi!" ¹⁹ Mus setn, tubuka'u lah Romin Tompo'u nun suruga ngen mayanlah Tabut pujanyi Tompo'u nun wa'ng Romin-Ou, ngen tumpo'nglah kilot ngen yu guntur ngen bumi tugunca'ng ngen jetn es do gurumuh.