¹ Lalu, maleket kurumuh numpo surumpit'ou, ngen oku'u ngurujuh subuwoh bunta'ng robu'u musu rengit ko' tunuh bumi, ngen yuh do jugotn kunci ruba'ng turobih kobus. ² Yuh duka'u ruba'ng turobih kobus, mengka'ou maadlah asuh musu ruba'ng setn, mun asuh musu punonuk do baas, ngen botuh on'u ngen rengit jaji putu'u togor asuh ruba'ng setn. ³ Mus setn, musu wa'ng asuh setn ruwohlah saya'ng-saya'ng ko' tunuh bumi, ngen dietn do jugotn kuasa mun kuasa ungkara nun bumi. ⁴ Ngen, neko' dietn do pusutn agoe de' purasoh duh-duh bumi, pumuruh, atou beta'ng-beta'ng koyuh, subukutn anya dietn do nya' sigel Tompo'u nun deih dietn. ⁵ Dietn de' do ngujetn unto' nobus dietn, pa' agoe sunisa dietn kutuwoi rumuh burotn, ngen sisa setn samoh mun sisa ungkara watu yuh nyungut musia. ⁶ Watu setn, musia akon ngo'u pungobus, pa' dietn de' dopud'ou. Dietn ya kobus, pa' pungobus ngela' dietn. ⁷ Saya'ng-saya'ng setn mun kuda-kuda do suniyop unto' pera'ng, ngen nun tunuh baa dietn oduh koyuh mun surouk'ng turomot emos, jowi dietn mun jowi musia. ⁸ Buruh dietn mun buruh dayuk'ng ngen jupuh dietn mun jupuh singa, ⁹ ngen sudo'u dietn mun bojuh besi, ngen yu sayop dietn mun yu kereta-kereta nengi muwo'u kuda do bududos ko' antuk'ng pera'ng. ¹⁰ Ngen, ni'i buruk'ng dietn mun ungkara ngen oduh nyuroi'ou, ngen nun wa'ng buruk'ng dietnlah oduh kuasa unto' ungkonopm musia kutuwoi rumuh burotn. ¹¹ Raja do muruntoh dietn oduhlah maleket turobih kobus, do nun wa'ng sono'u Ibrani do sunobut "Abadon", ngen nun sono'u Yunani do sunobut "Apolion". ¹² Buncana do putama moeh luwot, pa' gi'e oduh duwuh sisaan bukutn do akon monug. ¹³ Lalu, maleket do kunum numpo surumpit'ou, ngen oku'u kurungoh yu musu kuumpot tonuk altar emos do oduh nun jowi Tompo'u, ¹⁴ nyono'u ngen maleket kunum do toguh surumpit setn, "Puroposlah kuumpot maleket do ungkobut nun sungi Efrat do baas setn." ¹⁵ Mengka'ou, kuumpot maleket setn, do moeh do suniyop unto' jopm ngen on'u, burotn ngen sowo'u setn, do puropos agoe nobus sepertaruh umot musia. ¹⁶ Jumlah tentara bukuda dietn oduhlah duwuh ratus juta muwo'ou, oku'u kurungoh jumelah dietn. ¹⁷ Ngen, mungsetnlah oku'u ngurujuh nun wa'ng pungurujuh kuda-kuda setn ngen dietn do nguru'u nun tunuh'ou, suna punengi'ou nengi bojuh besi buwarna mudoyo'u tuuh, biru tuuh, ngen siya'u mun bulura'ng, ngen baa kuda-kuda setn mun baa singa ngen musu bobo'u dietn ruwoh opui, asuh, ngen bulura'ng. ¹⁸ Nengi kutaruh'ou lah sepertaruh musia do nobus, nengi opui, asuh, ngen bulura'ng do ruwoh musu bobo'u dietn. ¹⁹ Sobob, kukuwot kuda-kuda setn oduh nun bobo'u ngen ungkui dietn. Sobob, ungkui dietn mun nyupuh do oduh baa, ngen nengi setn lah dietn nyaya nya. ²⁰ Pa', musia do sulamoet, do de' kobus bodo'u buncana setn, totop de' butobot musu pubuwot-pubuwot tengen dietn, bawa dietn de' buleh nyomoh sumengi-sumengi do bi'a' ngen sugala koyuh musu emos, pera', tumogo'u, batuh, atou beta'ng koyuh, do tau'u ngurujuh, kurungoh, atou pun ponu, ²¹ ngen dietn de' butobot musu pungobus, sihir, bugila, ngen ngongku.