¹ Wak'tu na,Yesus bejalat lalu ka kabon gandum wak'tu ari Sabat,,wan mapak ya. ² Tapi,wak'tu orak-orak Farisi nele ya,mpu'ya madah ka-Ia,"Tele,anak buah-Kau ngawe ape nang li mbanar ntuk lingawe wak'tu ari Sabat." ³ Tapi,Yesus madah ka mpu'ya,"Gik angin ngkala kah kau mbaca ape nang lingawe Daut wak'tu ia wan rombong nang nuna ya lapar, ⁴ gemane ia tama ka dalap Rumah Allah wan mapak roti pesambahan nang angin limbanar bagi-Ya ntuk mapak ya,gena uga oleh orak-orak nang besama ya,kecuali hanya ntuk rombong imam? ⁵ Ato,gik angin ngkala kah kau mbaca dalap Hukum Taurat,kalo wak'tu ari Sabat, rombong imam ka Baik Allah ngelanggar Sabat wan mpu'ya angin besalah? ⁶ Tapi,Aku madah ka kau bahwa nang labih aya dari pada Bait Allah ada ka kia. ⁷ Tapi,kalo kau udah nao rati ya ntu:'Aku ngendaki balas kasih wan ukat pesambahan', kau angin ngkala ngukum nang angin besalah. ⁸ Sabab,Anak Manusia adalah Tuhan atas ari Sabat." ⁹ Laka ampus dari sana,Yesus cacah ka sinagoge mpu'ya. ¹⁰ Tele,ada seorak ngelaki nang mongkok sebala langan ya.Lalu,mpu'ya betanya ka Yesus,kata mpu'ya,"Apekah libanarkan ntuk nyambuhkan wak'tu ari Sabat?"supaya mpu'ya bisa nyalah Yesus. ¹¹ Lalu, Ia madah ka mpu'ya,"Sape orak ya ka ntara kau nang ada domba siko,wan kalo domba na labuh ka dalap lubak wak'tu ari Sabat,angin kah ia na ngulih ya wan ngeluar ya? ¹² Betapa jauh labih benilai keleno dari pada siko domba! Kae'na, libanarkanlah bebuat baik wak'tu ari Sabat." ¹³ Laka na, Yesus madah ka orak na,"Solorlah langan kau."Orak na nyolor langan ya wan linyambuh babis ya macam langan ya nang lain. ¹⁴ Tapi,orak-orak Farisi ampus dari sana wan sekongkol ngelawan Ia, gemane mpu'ya bisa mbinasakan-Ya. ¹⁵ Tapi,Yesus,wak'tu nao hal na, dari tak sana. Banyak nang nuna-Ya wan Ia nyambuhkan mpu'ya babis, ¹⁶ lalu mere tau mpu'ya ntuk ngawe diri-Ya nang nao. ¹⁷ Hal ntu tejadi ntuk nganapi ape nang li madah ngelalui Nabi Yesaya: ¹⁸ "Telelah, amba-Ku nang dah Kumilih,nang Kukasih,nang ka-Ia jiwa-Ku bekanan.Aku nak naroh roh-Ku ka atas-Ya,wan Ia na madah keadilan ka bangsa-bangsa lain. ¹⁹ Ia angin nak mbantah,ato ngampak,wan angin nak ada seorak pun nang nangar suara-Ya ka jalat-jalat. ²⁰ Buluh nang patah angin nak Ia mutus,wan sumbu nang ampir padap angin ia madap,sampai Ia ngawe keadilan manang, ²¹ lalu dalap nama-Ya,bangsa-bangsa lain nak berharap." ²² Laka na seorak nang kerasukan roh ja'an,nang buta wan awa,libaba ka Yesus.Wan,Yesus nyambuhkan ya sehingga orak nang buta wan awa na ngomong wan nele. ²³ Babis orak njadi manggam wan betanya,"Mungkinkah Ia na Anak Daud?" ²⁴ Tapi, wak'tu orak-orak Farisi nangar ya mpu'ya madah,"Orak ntu angin mungkin ngoser roh-roh ja'an." ²⁵ Yesus nao pikiran mpu'ya nak madah ka mpu'ya,"Tiap kerajaan nang tepacah-pacah ngelawan diri ya sorak,litapuklah.Wan,tiap kotga ato rumah nang tepacah-pacah ngelawan diri ya sorak,angin nak betahan. ²⁶ Lalu,kalo Iblis ngoser Iblis, ia pacah-pacah ngelawan diri ya sorak.Kalo gesana,gemane kerajaan ya na betahan? ²⁷ Lalu,kalo Aku,ngoser roh-roh ja'an ngan Beelzebul,wan sapekah anak-anak kau ngoser mpu'ya? Kae'na na,mpu'ya nak njadi hakim kau. ²⁸ Tapi,kalo ngan Roh Allah,Aku ngoser roh-roh ja'an,Kerajaan Allah udah atak atas kau. ²⁹ Kalo, gemane seorak bisa tama ka rumah orak nang kuan wan ngerampas banda-banda ya kalo ia angin ngaban orak kuan na telabih dulu?Laka na,ia baru ngulis ngerampok rumah na. ³⁰ Sape ja nang angin besama ngan Aku,ngelawan Aku.Lalu,sape ja nang angin ngorok besama ngan Aku,nyerai-beraikan. ³¹ Kae'na na,Aku madah ka kau bahwa tiap dosa wan hujatan keleno lalu lingampun,tapi hujatan teradap Roh angin lingampun. ³² Lalu,sape ja nang madah sesuatu nang ngelawan Anak Manusia na lingampuni,tapi sape ja nang madah ngelawan Roh Kudus angin na lingampuni,baik pada masa ntu maopun pada masa nang nak atak." ³³ "Kalo batak kayu na baik,buah ya na uga pasti baik.Ato,kalo batak kayu na angin baik,buah ya uga angin baik.Sabab,batak likanal dari buah ya. ³⁴ Hai,keturunan ular beludak,gemane mungkin kau nang ja'an madah hal-hal nang baik?Ka'ena dari luapan ati,molon ngomong.. ³⁵ Orak baik ngeluarkan hal-hal nang baik dari kekayaan ya, wan orak ja'an ngeluarkan hal-hal nang ja'an dari kekayaan ya nang ja'an. ³⁶ Lalu,Aku madah ka kau kalo tiap kata na angin sih rati-rati,nang limadah orak,mpu'ya na menanggong jawab ya wak'tu ari pengakiman. ³⁷ Ka'ena nang kau ngomong, kau na libanarkan, wan nang kau ngomong na uga,kau na liukum. 8Laka na,beberape ahli Taurat wan orak Farisi madah ka Yesus,"Guru,orak kitu mao nele tande dari-Kau." ³⁹ Tapi,Yesus nyaun wan madah ka mpu'ya,"Generasi nang ja'an wan berzina ntu nuntun suatu tande.Lalu,angin ada tande nang limere ka mpu'ya,kecuali tande Nabi Yunus. ⁴⁰ Sabab,bage Yunus nang ada ka dalap parun ikat aya selama tiga ari wan tiga malam,laka na uga Anak manusia na ada selama tiga ari wan tiga malam dalap parun bumi. ⁴¹ Orak-orak Niniwe na bedadek besama-sama ngan generasi ntu wak'tu penghakiman wan nak ngukum ya sebab mpu'ya betobat laka nangar khotbah Yunus.Lalu,nele,nang labih aya daripada Yunus ada ka kia. ⁴² Ratu dari selatan na lumpan besama-sama generasi ntu wak'tu ari pengakiman wan nak ngukum ya ka'ena ia atak dari ujuk bumi ntuk nangar hikmat Salomo.Wan,tele,nang labih aya daripada salomo ada ka kia. ⁴³ ''Wak'tu roh ja'an keluar dari keleno,ia lalu tampan-tampan nang angin berae ntuk ngago tampan ngandos,tapi angin namu ya. ⁴⁴ Lalu,ia madah,'Aku nak bebalek ka rumah ku,tampan aku keluar.;Lalu,wak'tu cacah,ia namu rumah na dah kosong,udah dingibo,wan dah lingator. ⁴⁵ Laka na,roh ja'an na dari wan maba besama ya tujuh roh lain nang labih ja'an dari ya,wan mpu'ya tama wan diap ka sana.Akhir ya,keadaan orak na njadi jauh labih ja'an daripada sebelum ya.Laka na uga nang nak tejadi ngan generasi nang ja'an ntu." ⁴⁶ Laka na Yesus masih madah ngan orak banyak,tele,indo wan dua nyadi-Ya bedadek kaluar,berusaha ntuk madah ngan-Ya. ⁴⁷ Seorak madah ka-Ia,"Tele,indo wan dua nyadi-Kau bedadek ka luar,berusaha nak ngomong wan Kau." ⁴⁸ Lalu,Yesus nyaun orak nang mere tau-Ya na wan madah,"Sape indo-Ku wan sapekah dua nyadi-Ku?" ⁴⁹ Lalu,sambel merentangkan langan-Ya ka anak murid-murid-Ya,Yesus madah,"ntulah indo-Ku wan dua nyadi-Ku! ⁵⁰ Kae'na sape ja nang ngawe kehendak Bapa-Ku nang ada ka surga,ialah dua nyadi nang ngelaki-ku,dua nyadi nang bini-Ku wan indo-Ku."