¹ Ní ọjọ́ wọǹnì, bí ọ̀pọ̀ ènìyàn ti péjọ, wọn kò sí ní oúnjẹ láti jẹ. Jesu pe àwọn ọmọ-ẹ̀yìn rẹ̀, ó wí fún wọn pé, ² “Àánú ọ̀pọ̀ ènìyàn wọ̀nyí ṣe mí, nítorí pé ó tó ọjọ́ mẹ́ta tí wọ́n ti wà pẹ̀lú ù mi kò sì sí ohun tí wọn yóò jẹ. ³ Bí mo bá rán wọn lọ sí ilé wọn láì jẹun, wọn le dákú lójú ọ̀nà. Àwọn mìíràn nínú wọn ti ọ̀nà jíjìn wá.” ⁴ Àwọn ọmọ-ẹ̀yìn rẹ̀ dá a lóhùn pé, “Níbo ni a ó ti rí àkàrà tí ó tó láti fi bọ́ wọn nínú aṣálẹ̀ yìí?” ⁵ Jesu béèrè lọ́wọ́ wọn pé, “Ìṣù àkàrà mélòó lẹ ní lọ́wọ́?” Wọ́n wípé, “Méje.” ⁶ Ó pàṣẹ fún ọ̀pọ ènìyàn náà láti jókòó lórí ilẹ̀. Ó mú àkàrà méje náà, ó dúpẹ́, ó sì bù wọ́n sí wẹ́wẹ́. Ó fún àwọn ọmọ ẹ̀yìn rẹ̀ láti gbé sí iwájú àwọn ènìyàn, wọ́n sì ṣe bẹ́ẹ̀. ⁷ Wọ́n tún ní àwọn ẹja wẹ́wẹ́ díẹ̀ pẹ̀lú, lẹ́yìn tí ó dúpẹ́, ó pàṣẹ fún àwọn ọmọ ẹ̀yìn rẹ̀ láti pín wọn fún àwọn ènìyàn náà. ⁸ Wọ́n jẹun wọ́n sì yó, wọ́n kó àjẹkù ti ó kù jọ, agbọ̀n méje sì kún. ⁹ Àwọn tí ó wà níbẹ̀ tó ìwọ̀n ẹgbàajì ènìyàn. Ó sì rán wọn lọ. ¹⁰ Lẹ́sẹ̀kẹsẹ̀, ó wọ inú ọkọ̀ ojú omi pẹ̀lú àwọn ọmọ ẹ̀yìn rẹ̀, wọ́n sì lọ sí agbègbè Dálímánútà. ¹¹ NÍgbànáà ni àwọn Farisí jáde wá, wọ́n sì bẹ̀rẹ̀ sí ń se àríyànjiyàn pẹ̀lú u rẹ̀. Wọ́n ń wá ààmì láti ọ̀run wá lọ́wọ̀ ọ rẹ̀, láti dán an wò. ¹² Ó mí kanlẹ̀ ní ọkàn an rẹ̀ ó wípé, “Èéṣe tí ìran yìí fi ń wá ààmì? Lóòótọ́ ni mo wí fún un yín, kò si ààmì tí a ó fi fún ìran yín.” ¹³ Nígbà náà ni fi wọ́n sílẹ̀, ó padà sínú ọkọ̀ ojú omi, ó sì rékọjá sí apá kejì Òkun náà. ¹⁴ Àwọn ọmọ ẹ̀yìn ti gbàgbé láti mú àkàrà lọ́wọ́. Ẹyọ ìṣù àkàrà kan ṣoṣo ni ó wà nínú ọkọ̀ wọn. ¹⁵ Jesu kìlọ̀ fún wọn pé, “Ẹ máa ṣọ́ra nítorí ìwúkàrà àwọn Farisí àti ìwúkàrà Hẹ́rọ́dù.” ¹⁶ Àwọn ọmọ ẹyìn sí bẹ̀rẹ̀ sí ronú èyí láàrín ara wọn wí pé, “Torí pé a kò mú àkàrà lọ́wọ́ ni” ¹⁷ Jesu mọ ohun tí wọ́n sọ láàrín ara wọn, ó sì dá wọn lóhùn pé, “Èéṣe ti ẹ̀yin fi ń ṣe àròyé pé ẹ̀yin kò mú àkàrà lọ́wọ́? Sé ẹ̀yin kò kíyèsi ni? Sé kò tilẹ̀ yẹ yín ni? Tàbí ọkàn ti rẹ̀wẹ̀sì? ¹⁸ Ẹ̀yin ní ojú, sé ẹ kò ríran ni? Ẹ̀ ni etí, sé ẹ kò sí gbọ́ran? Ǹjẹ́ ẹ̀yin kò rántí? ¹⁹ Nígbà ti mo bu ìṣù àkàrà márùn-ún fún ẹgbẹ̀ẹ́dọ́gbọ̀n ènìyàn, agbọ̀n mélòó ni ó kún fún àjẹkù tí ẹ ṣàjọ?” Wọ́n wí fún n pé, “Méjìlá.” ²⁰ “ Nígbà tí mo bọ́ ẹgbàajì pẹ̀lú ìṣù àkàrà méje, agbọ̀n mélòó ni ẹ kó jọ?” Wọ́n dáhùn pé, “Méje.” ²¹ Ó sì wí fún wọn pé, “Sé kò tilẹ̀ tíì yé yin ni?” ²² Nígbà tí wọ́n dé Bẹtisaídà. Àwọn ènìyàn tí ó wà níbẹ̀ mú afọ́jú kan wá, wọ́n sì bẹ Jésù kí ó fi ọwọ́ kàn án. ²³ Jesu fa ọkùnrin náà lọ́wọ́, ó sì mú un jáde lọ sí ẹ̀yìn ìlú. Nígbà tí ó tu itọ́ sí i lójú, Ó gbé ọwọ́ rẹ̀ lé e, Ó sì bi í léèrè pé, “Ǹjẹ́ ìwọ rí ohunkóhun?” ²⁴ Ó wo okè, ó wípé, “Mo rí àwọn ènìyàn ti wọ́n n rìn kiri bí igi.” ²⁵ Nígbànáà, Jesu tún gbé ọwọ́ rẹ̀ lé ojú rẹ̀, ọkùnrin náà sì la ojú u rẹ̀, a dá ìran rẹ̀ padà, ó sì rí gbogbo nǹkan kedere. ²⁶ Jesu sì rán an sí ilé e rẹ̀, Ó wí fún n pé, “Má ṣe lọ sí ìlú. " ²⁷ Jesu àti àwọn ọmọ ẹ̀yìn rẹ̀ jáde lọ sí àwọn abúlé ní agbègbè Kesaréà Fílípì. Lójú ọnà, ó bi àwọn ọmọ ẹyìn rẹ̀ pé, “Ta ni àwọn ènìyàn ń fi mí pè?” ²⁸ Wọ́n dáhùn pé, “Jòhánù Onítẹ̀bọmi. Àwọn mìíràn wí pé, "Èlíjàh", àwọn míràn si wípé ọ̀kan nínú àwọn wòlíì."' ²⁹ Ó sì bi wọ́n pé, “Ṣùgbọ́n ta ni ẹ̀yin ń fi mí pè?” Peteru dáhùn pé, “Ìwọ ni Kristi náà.” ³⁰ Jesu kìlọ̀ fún wọn, kí wọn má sọ fún ẹnikẹ́ni nípa òun. ³¹ Ó sì bẹ̀rẹ̀ sí kọ́ wọn pé, Ọmọ Ènìyàn kò le ṣàìmá jìyà ohun púpọ̀, a ó sì kọ̀ ọ́ sílẹ̀ láti ọwọ́ àwọn àgbàgbà, àwọn olórí àlùfáà àti àwọn olùkọ́ òfin, a ó sì pa á, lẹ́yìn ọjọ́ mẹ́ta yóò sì jíǹde. ³² Ó sọ èyí láìfi ohunkóhun pamọ́ fún wọn. Pétérù pe Jésù sẹ́yìn, ó sì bẹ̀rẹ̀ si bá a wí. ³³ Ṣùgbọ́n Jesu yípadà, ó wo àwọn ọmọ ẹ̀yìn rẹ̀. Ó sì dá Pétérù lẹ́kun, “Kúrò lẹ́yìn mi, Sàtánì! Ìwọ kò ro ohun tí Ọlọ́run bí kò ṣe ohun tí ènìyàn.” ³⁴ Nígbànáà ni Jesu pe àwọn ọ̀pọ̀ ènìyàn àti àwọn ọmọ ẹ̀yìn rẹ̀ jọ, ó wí fún wọn pé, “Bí ẹnikẹ́ni bá fẹ́ tọ̀ mí lẹ́yìn, ó gbọ́dọ̀ sẹ́ ara rẹ̀, kí ó gbé àgbélébùú rẹ̀, kí ó si máa tọ̀ mi lẹ́yìn. ³⁵ Nítorí ẹni tó bá gbìyànjú láti gba ẹ̀mí ara rẹ̀ là, yóò sọ ọ́ nù, ẹni tí ó bá sì sọ ẹ̀mí rẹ̀ nù nítorí í tèmi àti nítorí ìhìnrere, òun náà ni yóò gbà á là. ³⁶ Nítorí èrè kí ni ó jẹ́ fún ẹni tí ó jèrè gbogbo ayé, tí ó sọ ẹ̀mí rẹ̀ nù? ³⁷ Kí ni ènìyàn yóò fi ṣe pàṣípàrọ̀ ẹ̀mí rẹ̀? ³⁸ Ẹnikẹ́ni tó bá tijú àti gbà mí tàbí ọ̀rọ̀ mi nínú ìran panṣágà àti ẹlẹ́ṣẹ̀ yìí, Ọmọ Ènìyàn yóò tijú rẹ̀ nígbà tí ó bá padà dé nínú ògo Baba rẹ̀, pẹ̀lú àwọn angẹli mímọ́.”