¹ Nígbà tí Jésù rí Ọ̀pọ̀lọpọ̀ ènìyàn, Ó gun orí òkè lọ. Nígbà tí ó sì ti jókòó, àwọn ọmọ ẹ̀yìn Rẹ̀ wá sọ́dò Rẹ̀. ² Ó ya ẹnu Rẹ̀ ó sì ń kọ́ wọn, pé, ³ Ìbùkún ni fún àwọn òtòṣì ní ẹ̀mí, nítorí tiwọn ni Ìjọba Ọ̀run. ⁴ ni fun àwọn tí ń ṣọ̀fọ̀, Nítorí tí a ó tù wọ́n nínú. ⁵ Ìbùkún ni fún àwọn ọlọ́kàn tútù, nítorí tí wọn ó jogún ayé. ⁶ Ìbùkún ni fún àwọn tí ebi ń pa tí òǹgbẹ sì ń gbẹ fún òdodo, nítorí tí a ó kún wọn. ⁷ Ìbùkún ni fún àwọn aláàánú nítorí tí wọn ó rí àánú gbà. ⁸ Ìbùkún ni fún àwọn ọlọ́kàn mímọ́ nítorí tí n ó rí Ọlọ́run. ⁹ Ìbùkún ni fún àwọn onílàjà, nítorí ọmọ Ọlọ́run ni a ó máa pè wọ́n. ¹⁰ Ìbùkún ni fún àwọn tí à ń ṣe inúnibíni sí nítorí òdodo, nítorí wọn ó jogún ìjọba-ọ̀run. ¹¹ Ìbùkún ni fún yín nígbà tí àwọn ènìyàn bá tàbùkù yín tí wọn sì ṣe inúnibíni sí yín, tí wọ́n sì parọ́ onírúurú ohun ibi mọ́ ọ yín nítorí mi. ¹² Ẹ máa yọ̀ Ẹ sì máa dunnú, nítoirí èrè yín yóó pọ̀ ní ọ̀run. Nítorí báyìí ni wọ́n ṣe sí àwọn wòlíì tí ó wà ṣáájú yín. ¹³ Ẹ̀yin ni iyọ̀ ayé. Ṣùgbọ́n bí iyọ̀ bá sọ adùn rẹ̀ nù, báwo ni a ó ṣe mú u dùn padà? Kò wúlò fún ohunkóhun mọ́ àfi kí á sọ ọ́ nu kí ó sì di ìtẹ̀mọ́lẹ̀ lábẹ́ àtẹ́lẹsẹ̀ àwọn ènìyàn. ¹⁴ Ẹ̀yin ni iyọ̀ ayé. Ìlú tí a tẹ̀dó sórí òkè kò lè f'arasin. ¹⁵ Kò ṣe é ṣe kí àwọn ènìyàn tan fìtílà kí wọ́n sì gbé e sí abẹ́ apẹ̀rẹ̀, ṣùgbọ́n bíkòṣe pé l'órí ọ̀pá fìtílà, yóó sì tàn fún gbogbo ènìyàn nínú ilé. ¹⁶ Ẹ jẹ́ kí ìmọ́lẹ̀ yín tàn kedere níwájú gbogbo ènìyàn kíwọn lè rí i kí wọ́n sì yin Baba yín tí ń bẹ ní ọ̀run. ¹⁷ Ẹ máṣe rò pé mo wá látí pa òfin àti àwọn wòlíì run. Èmi kò wá láti pa wọ́n run, ṣùgbọ́n láti mú wọn ṣẹ. ¹⁸ Lóòótọ́ ni mo wí fún yín títí ọ̀run àti ayé yóò fi kọjá lọ kékeré nínú òfin mi kì yóò lọ láìṣẹ títí gbogbo rẹ̀ yóò fi ṣẹ. ¹⁹ Nítorí náà ẹnikẹ́ni tó bá rú kékeré nínú àwọn òfin wọ̀nyí tí ó sì ń kọ́ àwọn mìíràn láti ṣe wọ́n ní a ó yẹpẹre ní ìjọba-ọ̀run. Ṣùgbọ́n ẹni tí ó bá ń pa wọ́n mọ́ tí ó sì ń kọ́ wọn ni a ó pè ní púpọ̀ ní ìjọba-ọ̀run. ²⁰ Nítorí mo wí fún yín bí kò ṣe pé òdodo yín bá kọjá ti àwọn akọ̀wé àti àwọn Farisí, kò sí bí Ẹ ó ṣe dé ìjọba-ọ̀run. ²¹ Ẹ ti gbọ́ bí a ti wí fún àwọn ará àtijọ́, 'Ìwọ máṣe pàniyàn', àti pé, 'Ẹni tí ó bá pàniyàn yóó wà ní ewu ìdájọ́'. ²² Ṣùgbọ́n mo wí fún yín pé gbogbo ẹni tí ó bá bínú sí arákùnrin rẹ̀ yóó wà ní ewu ìdájọ́; àti ẹnikẹ́ni tí ó bá wí fún arákùnrin rẹ̀ pé 'ìwọ aláìníláárí!' yóó wà ní ewu ìgbìmọ̀, àti ẹnikẹ́ni tí ó bá wí pé 'Ìwọ aláìlọ́gbọ́n!' yóó wà ní ewu ọ̀run àpáàdì. ²³ Nítorí náà bí o bá mú ẹ̀bùn rẹ wá sí ibi pẹpẹ tí o sì rántí pé arákùnrin rẹ sẹ̀ ọ́, ²⁴ Fi ẹ̀bùn rẹ sí iwájú pẹpẹ níbẹ̀ kí o sì lọ ní ọ̀nà rẹ. Kọ́ lọ bá arákùnrin rẹ làjà ná, kí o sì wá fi ẹ̀bùn rẹ sí ibi tó yẹ. ²⁵ Bá oníjà rẹ làjà ná nígbà tí ẹ wà l'ọ́nà ilé-ẹjọ́, kí ó má bà fà ọ́ lé onídàájọ́ l'ọ́wọ́, kí onídàájọ́ má bà fà ọ́ lé amòfin l'ọ́wọ́´, ó sì le jù ọ́ sí ẹ̀wọ̀n. ²⁶ L'óòótọ́ ni mo wí fún ọ, o kò ní bọ́ nínú rẹ̀ títí ìwọ ó fi san kékeré tó kù nínú gbèsè náà. ²⁷ Ẹ̀yin ti gbọ́ tí a wí pé, 'máṣe ṣe àgbèrè.' ²⁸ Ṣùgbọ́n mo sọ fún yín pé gbogbo ẹni tó bá wo obìnrin l'ọ́nà tí kò tọ́ ti bá a ṣe àgbèreè l'ọ́kàn rẹ̀ ná. ²⁹ Bí ojú ọ̀tún rẹ bá mú ọ kọsẹ̀, yọ ọ́ kí o sì sọ ọ́ nù. Nítorí ó sàn kí ọ̀kan nínú ẹ̀yà ara rẹ ṣègbé ju kí a gbé gbogbo ara rẹ jù sí ọ̀run àpáádì. ³⁰ Bí ọwọ́ ọ̀tún rẹ bá mú ọ kọsẹ̀, gé e kí o sì sọ ọ́ nù. Nítorí ó sàn kí ọ̀kan nínú ẹ̀yà ara rẹ ṣègbé ju kí gbogbo ara rẹ lọ sí ọ̀run àpáádì. ³¹ A tún wí pé, 'Ẹnikẹ́ni tó bá lé aya rẹ̀ jáde jẹ́ kí ó fún-un ní ìwé ìkọ̀sílẹ̀.' ³² Ṣùgbọ́n mo wí fún yín, gbogbo ẹni tó bá kọ aya rẹ̀ sílẹ̀ bí kò ṣe nípa ìṣekúse nípa ìbálòpọ̀, sọ ọ́ di alágbèrè. ẹnikẹ́ni tó bá sì gbé e níyàwó lẹ́yìn náà ṣe panṣágà pẹ̀lú rẹ̀. ³³ Ẹ ti gbọ́ bí a ti wí fún àwọn ará àtijọ́, 'Ìwọ máṣe jẹ́jẹ̀ẹ́ èké, ³⁴ Ṣùgbọ́n mú àròyé rẹ tọ Olúwa lọ.' ṣùgbọ́n mo wí fún yín, Ẹ máṣe jẹ́jẹ̀ẹ́ rárá, ìbáà ṣe nípa ọ̀run nítorí ìtẹ́ Ọlọ́run ni; ³⁵ tàbí nípa ayé, nítorí àpótí ìtísẹ̀ Rẹ̀ ni; tàbí nípa Jerúsálẹ́mù, nítorí ìlú àwọn ọba aládé ni. ³⁶ Tàbí kí o jẹ́jẹ̀ẹ́ nípa orí rẹ, nítorí o kò lè mú ọ̀kan nínú irun orí rẹ funfun tàbí dúdú. ³⁷ Ṣùgbọ́n jẹ́ kí 'bẹ́ẹ̀-ni rẹ jẹ́ bẹ́ẹ̀-ni' tàtí 'bẹ́ẹ̀-kọ́ bẹ́ẹ̀-kọ́.' Ohunkohun tó bá jù báyìí lọ láti ọ̀dọ̀ àwọn ẹni ibi ló ti wá. ³⁸ ti gbọ́ bí a ti wí rí pé, 'ojú fún ojú àti eyín fún eyín.' ³⁹ Ṣùgbọ́n mo wí fún yín Ẹ máṣe dí ẹni ibi lọ́wọ́. Dípò bẹ́ẹ̀, ẹnikẹ́ni tó bá gbá yín ní ẹ̀ẹ̀kẹ́ ọ̀tún ẹ kọ ti òsì sí I pẹ̀lú. ⁴⁰ Bí ẹnikẹ́ni bá fẹ́ mú ọ lọ sí ilé ìgbẹ́jọ́ tí ó sì gba agbádá rẹ jẹ́ kí ó gba àwọ̀tẹ́lẹ̀ rẹ pẹ̀lú. ⁴¹ Ẹnikẹ́ni tí ó bá fẹ́ mú ọ lọ sí máìlì kan bá a dé méjì. ⁴² Fifún ẹni tí ó béèrè lọ́wọ́ rẹ má sì ṣe gbé ojú rẹ kúrò lọ́dọ̀ ẹni tí ó fẹ́ yá lọ́dọ̀ rẹ. ⁴³ Ẹ ti gbọ́ bí a ti wí fún yín pé, 'Ẹ gbọdọ̀ fẹ́ràn àwẹn alábágbé yín kí ẹ sì kórira àwọn ọ̀tá yín.' ⁴⁴ Ṣùgbọ́n mo wí fún yín Ẹ fẹ́ràn àwọn ọ̀tá yín, Ẹ sì gbàdúrà fún àwọn tí ń ṣe inúnibíni sí yín, ⁴⁵ kí ẹ lè jẹ ọmọ Baba yín tí ń bẹ ní ọ̀run nítorí Ó ń mú òòrùn Rẹ̀ ràn s'órí ẹni búburú àti ẹni rere, Ó sì ń rán òjò s'órí olóòótọ́ àti aláìsòótọ́. ⁴⁶ Nítorí bí Ẹ̀yi bá fẹ́ràn àwọn tí ó fẹ́ràn yín, èrè kiń ni Ẹ̀yin ó gbà? Ǹjẹ́ àwọn agbowó òde kò máa ṣe bẹ́ẹ̀ pẹ̀lú? ⁴⁷ Bí ẹ bá kí àwọn arákùnrin yín nìkan, kiń ni ẹ ṣe ju àwọn ẹlòmìíràn lọ? Àwọn aláìkọlà kò a máa ṣe bẹ́ẹ̀? ⁴⁸ Nítorí náà Ẹ jẹ́ pípé bí Baba yín tí ńbẹ l'ọ́run ti jẹ́ pípé.