¹ Nígbà náà ni, Jésù bá ọ̀pọ̀ ènìyàn àti àwọn ọmọ ẹ̀yìn Rẹ̀ sọ̀rọ̀. ² Ó wí pé, àwọn akọ̀wé àti àwọn farisí jòkó ní ipò Mose . ³ Nítorì náa, ẹ máa gbọ ohun gbogbo tí wọ́n ń sọ fún yín, ẹ máa fiyè sí wọn kí ẹ sì máa ṣe wọ́n. Ẹ máse tẹ̀lé ìṣe wọn, nítorí wọn a máa sọ̀rọ̀ ṣùgbọ́n wọn kìí fi sí ìṣe. ⁴ Bẹ́ẹ̀ni, wọn a máa di ẹ́rù wúwo tí ó nira láti gbé lé áwọn ènìyàn ní èjìká, ṣùgbọ́n, àwọn tìkalára won kìí gbìyànjú láti ṣe ìrànwọ́ láti gbé wọn. ⁵ Wọ́n fẹ́ láti máa ṣe àṣehàn. Nítorí wọ́n a máa ṣe fìláktẹ́rì wọn kí ó tóbi, kí àwọn ìṣẹ́tí àwọn aṣọ wọn sì ṣe gẹ̀rẹ̀yẹ̀. ⁶ Wọ́n a máa fẹ́ áwọn àyè pàtàkì ní ibi àsè àti àwọn ibujoko pàtàkì nínú Sínágọ́gù ⁷ Wọ́n sì tún fẹ́ kí a máa kí wọn ní ìkí ẹ̀yẹ nínú ọjà, kí àwọn ènìyàn sí màa pè wọ́n ní 'Rábì.' ⁸ Sùgbọ́n kí ẹ máṣe jẹ́ kí á pè yín ní 'Rábì', nítorí 'Rábì' kan ṣoṣo ni ẹ ní, ará sì ni gbogbo yín jẹ́. ⁹ Ẹ máṣe pe ẹnìkẹ́ni láyé yi ní bàbá yin, nítorí Bàbá kan ṣoṣo ni ẹ ní, ọ̀run ni ó sí wá. ¹⁰ Bákan náà, kí ẹ máṣe jẹ́ kí á pè yín ní 'olùkọ́ni,' nítorí olùkọ́ni kan ṣoṣo ni ẹ ní, tíí ṣe Krístì. ¹¹ Ṣùgbọ́n ẹni tí o gajù lọ láàrin yín ni yóò jẹ́ ìránsẹ́ yín. ¹² Ẹnikẹ́ni tó bá gbé ara rẹ̀ ga ni a ó rẹ̀ sílẹ̀, ẹnití ó bá si rẹ ara rẹ̀ sílẹ̀ ni a ó gbé ga. ¹³ Ṣùgbọ́n ègbé ni fún ẹ̀yin Akọ̀wé àti ẹ̀yin Farisí, alágàbàgebè! ẹ̀yin a máa tìlẹ̀kùn ọ̀run mọ́ ènìyàn. Nítorí ẹ̀yin tìkalára yín kọ̀ láti wọ̀ ọ́, ẹ kò sì gba àwọn tí ó fẹ́rẹ̀ wọlé láti ṣe bẹ́ẹ̀. ¹⁴ Ègbé ni fún ẹ̀yin akọ̀wé àti ẹ̀yin Farisí, alágàbàgebè! Ẹ̀yin ń lu àwọn opó ní jìbìtì nígbàtí ẹ̀ ń ṣe kárími pẹ̀lú àdúrà gìgùn. Nítorínà ẹ ó gba ìdálẹ́bi tó pọ̀jù lọ ¹⁵ Ègbé ni fún ẹ̀yin akọ̀wé àti ẹ̀yin Farisí, alágàbàgebè! nítorítí ẹ̀ ń lọ sókè sódò láti yi ẹyọ ènìyàn kan padà, nígbà tí ó bá sì di ọmọ ẹ̀yìn n yín, ẹ ó sọ ọ́ dí ọmọ ọ̀run àpáàdì ní ìsẹ́po méjì ti yín. ¹⁶ Ègbé ni fún yín, ẹ̀yin afọ̀jú tí ó ń tọ́ ẹlòmíràn sọ́nà, ẹ̀yin wípé, 'Bí ẹnikẹ́ni bá fi tẹ́mpílì búra, kò já mọ́ nkankan. Sùgbọ́n ó pọn dandan fún ẹnití ó bá fi wúrà tẹ́mpílì láti mú ìbúra rẹ̀ ṣẹ.' ¹⁷ Ẹ̀yin afọ́jú aláìlóye, èwo ló ṣe pàtàkì, wúrà tàbí tẹ́mpílì tó sọ wúrà di mímọ́? ¹⁸ Àti wípé, 'Ẹnikẹ́ni tí ó bá fi pẹpẹ búra, kò já mọ́ ǹkankan. Ṣùgbọ́n ó pọn dandan fún ẹnikẹ́ni tí ó bá fi àwọn ẹ̀bùn orí pẹpẹ búra láti mú ìbúra rẹ̀ ṣẹ. ¹⁹ Ẹ̀yin afọ́jú ènìyàn! Èwo ló ṣe pàtàkì jù, ẹ̀bùn tàbí pẹpẹ tí o sọ̀ ẹ̀bùn di mímọ́? ²⁰ Nítorí náà, ẹni tí ó bá búra pẹ̀lú pẹpẹ, búra pẹ̀lú rẹ̀ àti gbogbo ohun tí ó wà lóríi rẹ̀. ²¹ Ẹni tí ó bá fi tẹ́mpílì búra, búra pẹ̀lú rẹ̀ àti ẹni tí ń gbé nínú rẹ̀ ²² Ẹni tí ó bà sì fi ọ̀run búra, búra pẹ̀lú ìtẹ́ Ọlọ́run àti Ẹni tí ó jòkó lórí ìtẹ́ naa. ²³ Ègbé ni fún ẹ̀yin akọ̀wé àti ẹ̀yin Farisí, alágàbàgebè! Ẹ̀ ń san ìdáméwàá lórí minti, dili ati kumini, ṣùgbọ́n ẹ kọ̀ láti ṣe àwọn ohun tí ó ṣe pàtàkì nínú òfin - tí ń ṣe ìwọ̀nyí, ìdájọ́ òdodo, àánú àti ìgbàgbọ́. Àwọn wọ̀nyi ni ó yẹ kí ẹ máa ṣe láì kọ àwọn ìyókù sílẹ̀. ²⁴ Ẹ̀yin afọ́jú tí ń tọ́ni sọ́nà, ẹ fi ẹ̀tẹ̀ sílẹ̀ ẹ̀ ń pa làpálàpá! ²⁵ Ègbe ni fún ẹ̀yin akọ̀wé àti ẹ̀yin Farisí, alágàbàgebè! Nítorítí ẹ̀yin ń fọ ìta kọ́ọ̀bù àti abọ́ ṣùgbọ́n inú rẹ̀ kún fún ọ̀kánjùa àti àìlèkóra ẹni ní ìjánu. ²⁶ Ẹ̀yin afọ̀jú Farisí, ẹ kọ́kọ́ fọ inú kọ́ọ̀bù àti abọ́ ná, kí ìta wọn náà sì mọ́. ²⁷ Ègbé ni fún ẹ̀yin akòwé àti ẹ̀yin Farisí, alágàbàgebè! Ẹ dàbí àwọn ibojì tí a ṣe lọ́sọ̀ọ́, èyí tó lẹ́wà ní òde ṣùgbọ́n tí inú rẹ̀ kún fún egungun òkú àti ohun àìmọ́ gbogbo ²⁸ Bákan náà, ẹ̀yin fara hàn bíi olódodo níwájú àwọn ènìyàn ṣùgbọn ẹ kún fún àgàbàgebè ati àìṣedéédé gbogbo. ²⁹ Ègbé ni fún ẹ̀yin akọ̀wé àti ẹ̀yin Farisì, alágàbàgebè! Nítorítí ẹ̀yin kọ́ ibojì àwọn wòlíì, ẹ̀ sì ṣé ibojì àwọn eni mímọ́ lọ́ṣọ̀ọ́. ³⁰ Ẹ̀yin wípé, 'Bí ó bá ṣe pé a wà ní àkókò àwọn baba wa ni, àwa ìbá má ti dara pọ̀ mọ́ wọn láti pa àwọn wòlíì náà.' ³¹ Nítorí náà, ẹ̀ ń jẹ́rìí ta ko ara yín wípé ọmọ àwọn ẹni tí ó pa àwọn wòlíì ni yín. ³² Ẹ̀yin fi ohun gbogbo jọ àwọn bàbá yín ní àjọtán ³³ Ẹ̀yin ejò àti ọmọ paramọ́lẹ̀, bá wo ni ẹ̀yin ó ṣe bọ́ lọ́wọ́ ewu ìdájọ́ ọ̀run àpáádì? ³⁴ Nítorí náà, kíyèsi, Èmi ń rán àwọn wòlíì, àwọn ọlọgbọ́n àti àwọn akọ̀wé síi yín. Ọ̀pọ̀ wọn ni ẹ ó pa, tí ẹ ó sì kàn mọ́ àgbélèbú, ọ̀pọ̀ wọn ni ẹ ó nà ní ẹgba nínú sínágọ́gù yín, ẹ o sì lé wọn jáde kúrò láti ìlú de ìlú ³⁵ Orí yín ni ẹ̀jẹ̀ àwọn ẹni mímọ́ tí a ti pa ní gbogbo orílẹ̀ ayé yóò wà, bẹ̀rẹ̀ láti orí ẹ̀jẹ̀ Ábẹ́lì títí dé ẹ̀jẹ̀ Sakaráyà ọmọ Barakia tí ẹ pa sí agbede méjì pẹpẹ àti ibi mímọ́. ³⁶ Lóòtọ́ ni mo wí fún yín, gbogbo nkan wọ̀nyí yóò wá sí ìmúṣẹ lórí ìran yín. ³⁷ Jèrúsalẹ́ẹ̀mù, Jèrúsalẹ́ẹ̀mù, ìwọ ẹni tí ń pa àwọn wolíì, tí o sì ń sọ àwọn tí a rán sí ọ ní òkúta! Mo gbìyànjú láti kó yín jọ bí adìrẹ ṣe máa ń kó àwọn ọmọ rẹ̀ jọ sí abẹ́ ìyẹ́ rẹ̀, ṣùgbọ́n, ẹ̀yin kò fi àyè gbà mí! ³⁸ Kíyèsíi, ilé yín ti di ahoro. ³⁹ Èmi wí fún yín pé, ẹ kì yóò rí Mi mọ́ títí ẹ ó fi wípé, 'Alábùkún ni fún ẹni tí o ń bọ̀ ní orúkọ Olúwa.'"