¹ Ó sìṣe nígbà tí Jésù ti parí fífi ìtóni fún àwọn ọmọ ẹ̀yìn méjìlá rẹ̀ tán, ó kúrò níbẹ̀ láti kọ́ni àti láti wàásù nínu àwọn ìlú wọn. ² Nígbà tí Jòhánù gbúròo nípa ohun tí Jésù ńse láti inú ọgbà ẹ̀wọ̀n, ó rán àwọn ọmọ ẹ̀yìn rẹ̀ síi ³ láti béère lọ́wọ́ rẹ̀ pé, "Ṣé ìwọ ni ẹni tí ó ń bọ̀, àbi ká máa retí elòmíràn?" ⁴ Jésù dá wọn lóhùn wípé, "Ẹ lọ sọ fún Jòhánù ohun tí ẹ ti rí àti tí ẹ ti gbọ́ ⁵ Afójú ńríran, àwọn arọ ńrìn, àwọn adẹ́tẹ̀ ńgba ìmúláradá, àwọn odi ńgbọ́ràn, àwọn òkú ń di alàyè, a sì ǹ sọ ìròyìn ayò fún àwọn aláìní ⁶ Ìbùkún ni fún ẹni tí kò bínú nítorí mìí." ⁷ Bí àwọn ènìyàn yìí ti ń lọ lọ́nà wọn, Jésù bẹ̀rẹ̀ sí ní bá àwọn ènìyàn sọ̀rọ̀ nípa Jòhánù, "Kínni ẹ̀yin lọ sínu asálè láti wò- Ṣé enití ó máa ń yí ọkàn rẹ̀ padà ni? ⁸ Ṣùgbọ́n kínni ẹ̀yin lọ wò- ènìyàn tó wọ́ṣọ́ tó níye lórí? Lóòtọ́, àfin ni irú àwọn wọ̀nyí máa ń gbé. ⁹ Ṣùgbọ́n kínni ẹ̀yin lọ wò- Wòólì? Bẹ́ẹ̀ni, mo wí fún yín, àti ju wòólì lọ pàápàá. ¹⁰ Èyí ni ẹni tí a ti kọ̀wé rẹ̀ wípé, 'Wòó, èmi ńrán oníṣé mi lọ síwájú yín, ẹni tí yóò pèsè ọ̀nà yín sílẹ̀ níwájú mi.' ¹¹ Lóòtọ́ ni mo wí fún yín, láàrin àwọn tí a bí nínú obìnrin, kò sí ẹnití ó gajù Jòhánù onítẹ̀bọmi lọ. Síbẹ̀ ènìyàn pàtàkì tó kéré jù ní ìjọba ọ̀run jùú lọ. ¹² Láti ìgbà tí Jòhánù tí ń wàásù títí di ìsinsìnyí ni ìjọba Ọlọ́run tí di àfi agbára wọ̀, àwọn ọkùnrin akíkanjú ní ń fí agbára gbàá. ¹³ Nítorí gbogbo áwọn Wòólì àti òfin ló ti ń sọ àsọtẹ́lẹ̀ títí àkókò Jòhánù, ¹⁴ tí ẹ̀yin bá sì lé gbàá, òun ní Èlíjà tí a ti sọ wípé yíò wá. ¹⁵ Ẹni tó bá létí láti gbọ́ràn, ẹ jẹ́ kí ó tẹ́tí. ¹⁶ Kínni èmi yóò fi ìran yìí wé? Ó dàbi àwọn omodé tí wọ́n ń seré ní gbàgede ìtajà, tí wọ́n jókòó, tí wọ́n sì ń ké sí ara wọ́n ¹⁷ Wípé, 'àwa fọn fèrè fún yín, ẹ̀yin kò sì jó, àwa ń sọ̀fọ̀, ẹ̀yin kò sì sunkún.' ¹⁸ Nítorí Jòhánù kò wá láti wá jẹ búrẹ́dì àti ọtí wáínì, wọ́n sì ní, 'ó ní ẹ̀mí òkùnkùn.' ¹⁹ Ọmọ ènìyàn wá, ó sì ń jẹ jíjẹ àti mímu, wọ́n sì sọ wípé, 'Wòó, alájẹjù àti ọ̀mùtí ènìyàn ni, ọ̀rẹ́ àwọn agbowó òde àti àwọn ẹlẹ́sẹ̀!' Ṣùgbọ́n ọgbọ́n máa ń gba ìdáláre nípa ìṣe rẹ̀." ²⁰ Nígbànáà ni Jésù bẹ̀ẹ̀rẹ̀ sí ní bá àwọn ìlú tí ó tise iṣẹ́ ìyanu wí, nítorí tí wọ́n ko yípadà. ²¹ "Ègbé ni fún yín ní Kórásìn! Ègbé ní fún yín Bẹtisáídà! Tí ó ba ṣe pé àwọn iṣẹ́ ìyanu tí a ṣe ní Tírè àti Sídónì ni a ṣe nínu yín ni, wọn ìbá ti yípadà tipẹ́tipẹ́ nínú aṣọ ọ̀fọ̀ àti eérú. ²² Sùgbọ́n yóò sàn ju Tírè àti Sídónì ju yìn-ín lọ lọ́jọ́ ìdájọ́. ²³ Ìwọ, Kápánámù, sé o rò wípé a óò gbé ọ ga sí ọ̀run? Rárá o, inú ọ̀gbun ilẹ̀ ni a óò jù ọ́ sí. Nítorí kání Sódómù ni a ti ṣe àwọn iṣẹ́ ìyanu tí a ṣe nínú rẹ̀, yóò sì wà títí di òní. ²⁴ Mo ṣọ fún yín wípé yóò sàn fún ilẹ̀ Sódómù jù yín lọ lọ́jọ́ ìdájọ́." ²⁵ Ní àkókò náà, Jésù wípé, mo yìn Ọ́, Bàbá mi, Ọlọ́run ọ̀run òhun ayé nítorí tí O ti fi àwọn ǹkan wọ̀nyí pamọ́ fún àwọn ọlọ́gbọ́n àti olóye, Ó sì ti fihan àwọn tí a kò kọ́ bi àwọn ọmọ kékeré. ²⁶ Bàbá, torí èyí ni ìfẹ́ inú rẹ. ²⁷ Ohun gbogbo ni bàbá mi tí fi lé mi lọ́wọ́, kò sì ẹnití ó mọ ọmọ àyàfi bàbá, bẹ́ẹ̀ni kò sì sí ẹni tó mọ bàbá àyàfi ọmọ, àti ẹni tí ó wu ọmọ láti fi bàbá rẹ̀ hàn. ²⁸ Ẹ wá sọ́dọ̀ mi gbogbo ẹ̀yin tí ń ṣe làálàá tí a sì di ẹrù wúwo rù, èmi yóò sì fún yín ní ìsinmi. ²⁹ Ẹ gba àjàgà mi sí ọrùn yín, kí ẹ sì kọ́ ẹ̀kọ́ lọ́dọ̀ mi, nítorí onínú tútù àti onírẹ̀lẹ̀ ọkàn ni èmi, ẹ̀yin ó sì rí ìsinmi fún ọkàn yín. ³⁰ Nítorí àjàgà mi rọrùn, ẹrù mi sí fúyé."