¹ Jésù pe àwọn ọmọ ẹ̀yìn Rẹ̀ méjìlá papọ̀, ó sì fún wọn ní àsẹ lórí àwọn ẹ̀mí àìmọ́, láti lé wọn jáde, àti láti wo orísìrísìí àrùn ati onírúurú àìsàn sàn. ² Orúkọ àwọn ọmọ ẹ̀yìn méjìlá náà nì wọ̀n yí. Àkọ́kọ́, Símónì (ẹnití Ó tún pè ní Pétérù), àti Áńdérù tí ó jẹ́ arákùnrin rẹ̀; Jémísì ọmọ Sébédè, àti Jòhánù tí ó jẹ́ arákùnrin rẹ̀; ³ Fílípì, àti Batilómẹ́ù; Tómásì, àti Máttíù agbowó orí; Jémísì ọmọ Álfáúsì, àti Tádẹ́úsì; ⁴ Símónì ajíjágbára, àti Júdásì Ìsìkáríotù, ẹni tí ó sẹ́ Jésù. ⁵ Àwọn méjìlá yǐ ni Jésù rán jáde. Ó sì wí fún wọn pé, "Ẹ má se lọ sí ibi tí àwọn kèfèrí ba ń gbé, ẹ má sì se lọ sí ìlú tí ó jẹ́ ti àwọn ará a Samáríà. ⁶ Dípò bẹ́ẹ̀, ẹ lọ sí ọ̀dọ̀ àwọn àgùntàn ilé Israeli tí ó sọnù; ⁷ bí ẹ sì ti ń lọ, ẹ wàásù kí ẹ sì wípe, 'Ìjọba ọ̀run sún mọ́.' ⁸ Wo aláìsàn sàn, ẹ jí òkú dìde, ẹ sọ àwọn adẹ́tẹ̀ di mímọ́, kí ẹ sì lé àwọn ẹ̀mí òkùnkùn jáde. Ọ́fẹ́ ni a fi fún n yín, ọ̀fẹ́ ni kí ẹ fún ni. ⁹ Ẹ má se mú wúrà, fàdákà tàbí idẹ sínú àpò ìpamọ́ yín. ¹⁰ Ẹ má se gbé báàgì dání fún ìrìn àjò yín, tàbí asọ, tàbí bàtà, tàbí ọ̀pá, nítorí òsìsẹ́ yẹ fún oúnjẹ rẹ̀. ¹¹ Ìlú kílǔ tàbí abúlé tí ẹ bá wọ̀, ẹ se ìwádǐ ẹnití ó yẹ níbẹ̀, kí ẹ sì dé sí ọ̀dọ rẹ̀ títí ẹ ó fi kúrò níbẹ̀. ¹² Bí e bá wọlé, ẹ kí wọn ¹³ Bí ilé náà bá yẹ, kí àlááfìà yín kí ó wá sórí rẹ̀, ṣùgbọ́n tí ilé náà kò bá yẹ, kí àlááfìà yín kí ó padà sọ́dọ̀ yín. ¹⁴ Fún àwọn tí kò gbà yín tàbí tẹ́tí sí àwọn ọ̀rọ̀ yín, nígbàtí ẹ bá kúrò ní ilé tàbí ìlú náà, ẹ gbọ́n iyẹ̀pẹ̀ ẹsẹ̀ yín kúrò. ¹⁵ Lóǒtọ́ ni mo wí fún n yín, ó sàn fún ilẹ̀ Sódómù àti Gòmórà ní ọjọ́ ìdájọ́ jù fún ìlú náà. ¹⁶ Wò ó, mo rán an yín jáde gẹ́gẹ́ bí àgùntàn láarín àwọn ìkokò, nítorínà ẹ gbọ́n bí àwọn ejò, kí ẹ sì jẹ́ aláìlúwu bí àwọn àdàbà. ¹⁷ Ẹ ṣọ́ra fún enìyàn! Nítorí wọn yóò jọ̀wọ́ yín fún àwọn ìgbìmọ̀, wọn á sì nà yín nínú Sínágọ́gù wọn. ¹⁸ Wọn á sì mú u yín wá sí ọ̀dọ àwọn Gómínà àti àwọn ọba nitorí tèmi, gẹ́gẹ́ bí ẹ̀rí fún wọn àti fún àwọn kèfèrí ¹⁹ Nígbàtí wọ́n bá sì jọ̀wọ́ yín, ẹ máse se àníyàn nípa báwo tàbí ohun tí ẹ̀yin ó sọ, nítorí a ó fun yín ní ohun tí ẹ̀yin ó wí ní àkókò náà. ²⁰ Nítorí ẹ̀yin kọ́ lẹ ó ò sọ̀rọ̀; ṣùgbọ́n Ẹ̀mi Bàbá yín ni ó sọ̀rọ̀ jáde nínú yín. ²¹ Arákùnrin yóò jọ̀wọ́ arákùnrin rẹ̀ fún ikú, àti bàbá ọmọ rẹ̀. Àwọn ọmọ yóò dìde lòdì sí àwọn òbí wọn láti jẹ́ kí wọ́n pa wọ́n. ²² A ó kórira yín nítorí orúkọ mi. Ṣùgbọ́n, ẹnití ó bá forítǐ dé òpin, ni a ó gbàlà. ²³ Nígbàtí wọ́n bá pọ́nyínlójú ní ìlú yǐ, ẹ sá lọ sí òmíràn, nítorí looto ni mo wí fún yín, ẹ kò tí ì le la gbogbo ìlú Israeli kọjá tán kí Ọmọ Ènìyan yóò fi dé. ²⁴ Ọmọ-ẹ̀yìn kò ju olùkọ́ rẹ̀ lọ, bẹ́ẹ̀ ni ẹrú kò ju olúwa rẹ̀ lọ. ²⁵ Ó tó fún ọmọ ẹ̀yìn kí ó dàbí olùkọ́ rẹ̀, àti fún ẹrú bí olúwa rẹ̀. Bí wọ́n bá pe baálé ilé ní Bélísẹ́búlù, orúkọ búburú wo ni wọn yóo pe àwọn ẹni tí ó ń gbé inú ilé rẹ̀! ²⁶ Nítorí náà, ẹ má bẹ̀rù wọn, nítorí kò sí ohun tí ó wà ní ìpamọ́ tí kò ní fara hàn, kò sì sí ohun àṣírí tí a kò ní mọ̀. ²⁷ Ohun tí mo sọ fun yín níkọ̀kọ̀, ẹ sọ ọ́ ní gbangba, ohun tí ẹ gbọ́ ní ìdájẹ́jẹ́, ẹ kéde rẹ̀ lórí òrùlé. ²⁸ Ẹ má bẹ̀rù àwọn tí wọ́n pa ara, tí wọn kò lè pa ẹ̀mí. Dípò bẹ́ẹ̀, ẹ bẹ̀rù ẹni tí ó lè pa ẹ̀mí ati ara run ní ọ̀run àpáàdì. ²⁹ Ṣebí meji kọbọ ni wọ́n ń ta ológoṣẹ́?Sibẹ ọ̀kan ninu wọn kò lè jábọ́ sílẹ̀ lẹ́yìn Baba yín. ³⁰ Ṣùgbọ́n gbogbo irun orí yín ni ó níye. ³¹ Ẹ má bẹ̀rù. Ẹ níye lórí pupọ ju ológoṣẹ́ lọ. ³² Nítorí náà, ẹnikẹ́ni tí ó bá jẹ́wọ́ mi níwájú eniyan, Èmi náà yóo jẹ́wọ́ rẹ̀ níwájú Bàbá à mi tí ń bẹ lọ́run. ³³ Ṣugbọn ẹnikẹ́ni tí ó bá sẹ́ mi níwájú eniyan, Èmi náà yóo sẹ́ ẹ níwájú Bàbá à mi tí ń bẹ lọ́run. ³⁴ “Ẹ má rò pé mo wá láti mú alaafia wá sáyé. N kò wá láti mú alaafia wá, bíkòse idà. ³⁵ Nítorí mo wá láti dá ìyapa sílẹ̀, láàrin ọmọkunrin ati baba rẹ̀, láàrin ọmọbinrin ati ìyá rẹ̀, ati láàrin iyawo ati ìyá ọkọ rẹ̀. ³⁶ Ará ilé ẹni ni ọ̀tá ẹni. ³⁷ Ẹnití ó bá fẹ́ràn baba tabi ìyá rẹ̀ jù mí lọ, kò yẹ ní tèmi; ẹni tí ó bá sì fẹ́ràn ọmọ rẹ̀ ọkunrin tabi obinrin jù mí lọ, kò yẹ ní tèmi. ³⁸ Ẹni tí kò bá gbé agbelebu rẹ̀, kí ó máa tẹ̀lé mi, kò yẹ ní tèmi. ³⁹ Ẹni tí ó bá gba ẹ̀mí rẹ̀ là yóo pàdánù rẹ̀. Sùgbọn ẹni tí ó bá pàdánù ẹ̀mí rẹ̀ nítorí mi yóò rí i. ⁴⁰ Ẹni tí ó bá gbà yín, èmi ni ó gbà, ẹni tí ó bá sì gbà mí, ó gba ẹni tí ó fi iṣẹ́ rán mi. ⁴¹ Ẹni tí ó bá gba wolii ní orúkọ wolii yíò gba èrè wolii, ẹni tí ó bá gba olódodo nítorí ó jẹ́ olódodo yóo gba èrè olódodo. ⁴² Ẹnikẹ́ni tí ó bá fún ọ̀kan nínú àwọn kékeré yǐ, àní ife omi tútù mu, nítorí tí ó jẹ́ ọmọ ẹ̀yin, lóotó ni mo wí fún n yín, kò ní sọ èrè rẹ̀ nù.